1 S 12 - Mam Ostuncalco Bible

Kyej tq'o'n Samwel kawb'il toj tq'ob' Sawul

1Xi'tzun tma'n Samwel kye kykyaqil aj Israel:

—Makyile', tkyaqilju' saj kyqani'ne' ma nb'inchaye', ex matxi' kyej nq'o'ne' nimaqkawil kyib'aje'.

2Luju' nimaqkawil lu kb'el nej kywitze'. Ayinwe' matxi' chin tijine' ex saqtl nwi'ye', exqe' nk'wale' ate'qe' kyxole'. Ayine' matxi' chin nuk'un kyxole' atxi'x toj nku'xumale' ex tzmax ja'lo,

3ex luqine' lu: Qa matxi' kub' ntzyu'ne' jun twakyix mujqa tb'ur jun xjal, mujqa makub' njtz'o'ne', mujqa mayajti jun xjal wu'ne', mujqa mank'am pwaqe' tu'n nb'inchanteye' kyajb'il xjal, b'a'n tu'n kymanteye' ja'lo twitz Qman Dyos, ex twitzju' nimaqkawil matxi' jaw t-sk'o'n Qman Dyos, kxe'l nchjo'nwe' qa ati nk'ase', chij.

4Aye'tzunkye xikytzaq'we'n:

—B'ajx qo' kub'a' tjtz'o'nta ex b'ajx qo' yajta'ye' tu'na, ex b'ajx tk'ama' ta pwaq tu'n tb'inchanteya kyajb'il xjal, chechij.

5Xitma'ntl Samwel:

—Twitzku' Qman Dyos ex twitzju' nimaqkawil xjaw t-sk'o'n, qa mixti' jun wile' sel yal kyu'ne', chij. Mixti'natzun, chechij.

6Xi'tzun tma'ntl Samwel kyeju' tnam.

—Ate Qman Dyos etz iq'inkye ojtxi' qyajilb'en toj Ejipt kyu'nel Moyses ex Aaron.

7Qu'mtzun kyb'incham kyib'e', qu'n chin yolile' kyuk'i'le' twitz Qman Dyos ti'j tkyaqilju' b'a'n matxi' tb'incha qe ex kyeju' ojtxi' qyajilb'en.

8Tej kyxi' Jakob' kyuk'i'lju' tk'wal toj Ejipt, e oktenju' aj Ejipt yajlalkye, aye'tzunju' qyajilb'en ekub'san twitz Qman Dyos, e'tzajtzun tchq'o'n Qman Dyos Moyses ex Aaron tu'n kyetz kyiq'i'n toj Ejipt, ex e ul kyiq'i'n toju' najb'il lu.

9Aye'tzunkye ik'tna'l Qman Dyos kyu'n, qu'mtzun exi' tq'o'n toj tq'ob' Sisara, ju' nejenel kyeju' xjal te q'oj te Jab'in, nimaqkawil te Asor, ex toj kyq'ob' pilistey ex toj kyq'ob'u' nimaqkawil te Moab', ju' e'q'ojin kyi'j.

10Eltzun kynik'tz qa matxi'toq che b'inchan il twitz Qman Dyos tu'nju' kyej kytzaqpi'n tu'n kyk'ulun kye chukchaq kyilb'ilal B'aal ex twitz Astarte, ex ekub'san twitz Qman Dyos tu'n kyklonjtz toj kyq'ob'ju' kyajq'oj, ex xikytziya'n tu'n kyk'ulun o'kxte.

11Ex ikx e'tzaj tchq'o'n Qman Dyos Jerub'aal, B'arak, Jepte ex Samwel tu'n kytzaqpete' toj kyq'ob' kyajq'oje', e anq'intzuntze' toj nak'b'il.

12Aye'tzunkye' tej kyka'yinteye' xi'toq ttzaj Naas, nimaqkawil kye aj Amon q'ojil kyi'je', tzaj kyqani'ne' jun nimaqkawil tu'n tkawin kyib'aje', extzun atoq Qman Dyos nimaqkawil kyib'aje'.

13Lutzunju' nimaqkawil kyeye' jawkysk'o'ne' lu. Matxi' tzaj tq'o'n Qman Dyos nimaqkawil xikyqani'ne' te.

14Atzu'n ja'lo ati tu'n kynimane' ex tu'n kyk'ulune' te Qman Dyos, ati tu'n txi' kyb'i'ne' tq'ojq'ojel toj twi' ex tu'n txi' kyb'i'ne' tchaq'b'il, ex tu'n kyanq'ine' kse'n tajb'il Qman Dyos, aye'ye' exju' nimaqkawil kyib'aje'. Che anq'iltzuntze' b'a'n.

15Qu'n qatzun min xxi' kynima'ne', exqa matz'elkyik'u'nju'ye' tchaq'b'il, kb'el tz'e'ysa'n kywitze' tuk'i'lxi'ju' nimaqkawil tu'n Qman Dyos.

16Qu'mtzun lan che ik'b'ete' jata'qe'ye', qu'n okkyla'ye' jun nin techlal ktb'incha' Qman Dyos kywitzku'ye'.

17Kanli kywitze' q'ijal ja'lo, tu'n tjaw b'uyit twitz awal, ¿Jek'ax? Oktzun chin kub'sale' twitz Qman Dyos, ex ktzajel tq'o'n q'ankyaq ex jb'al tu'n telkynik'e' te ex tu'n tkane' toj kywitze', kse'n ntka'yi'n Qman Dyos mache b'inchan ile' twitz tu'n tpaj makyqaniye' jun nimaqkawil kyib'aje', chi Samwel.

18Kub'santzun Samweltz twitz Qman Dyos, textzunju' kmuj tzaj q'ankyaq ex jb'al. Kykyaqiltzunju' tnam oktchi Qman Dyos ex tchi Samwel kyi'j.

19Qu'mtzun kykyaqilx xikyma'n te Samwel:

—Kub'sana twitz Qman Dyos kyi'ju' tmajina lu, tu'n lalun qokyime'; qu'n tib'ajxi'tlu' txqan qile' matz'ok qtz'aqtza'n txqantle' tu'nju' xiqqani'ne' jun nimaqkawil, chechij.

20Atzunte Samwel xittzaq'we'n kye:

—Lalun che xob'e'. Mana'tzun che b'inchan ile'; naq o'kx laluntzun tz'el kypa'ntl kyib'e' ti'j Qman Dyos. Che k'ulun qe'ye' te tu'n tkyaqil kyk'u'je'.

21Lalun che'x k'ulune' kywitzju' dyos mixti'x kyajb'en, qu'n lay b'ent kyonin kyi'je' ex lay b'ent kyklete' kyu'n qu'n myana' dyos qe'.

22Lay che kyej tzaqpi'nkye' tu'n Qman Dyos, naqx tu'nju' tb'i nim toklen; qu'n tajb'il tu'n kyoke' te ttanam.

23Ayintzunwe', awt Qman Dyos tz'oninweye' tu'n michin q'ojena'ye' tu'n nkub'sane' kyi'je', tu'n lalun chin b'inchan ile' twitz. Ape' knb'incha'ju'ye', che xe'l nxnaq'tza'ne' tu'n tb'ent kyanq'ine' b'a'n ex toj ttxolilti'j.

24O'kxkye' tu'n kyb'inchante, tu'n kynimane' te Qman Dyos ex tu'n kyk'ulune' axxi'x ex tu'n tkyaqil kyk'u'je' te, qu'n nimxi' ti'xti' tb'incha qe.

25Qatzun atzu' xb'ajxa' kyk'u'je' tu'n kyb'inchanteye' taq'wix tuk'i'lju' nimaqkawil kyeye', kche b'el najsa'ne' tu'n Qman Dyos, chi Samwel.