Is 58 - Mam Ostuncalco Bible

Mewayi'n axxi'x

1Tzaj tma'n Qman Dyos weye' kjalu:

Ẍch'ina kuwxi'x, lalun xob'a,

jawx toj twi'ya kuw kse'n jun chun;

tzak'unxju'ya ntaname' tu'n kypaju' til,

tzak'unxa tyajajil Jakob' kyi'ju' kyil.

2Inche jyon wi'je' tkyaqil q'ij

inxi'x che tzalaj tu'n nelkynik' ti'ju' nb'eye',

ku'xi'xtej jun tnam ntb'incha'n b'a'n

ex min nche kub' kytxa'ju'n nkawb'ile';

nche qanin kawb'il tnik'alkyi'j weye'

kuxi'xtej nche tzalaj nche tzaj lq'e nk'etze',

3extzun a nkyma'nju':

¿Titi' qomewayila', mina'jon ntka'yi'nte Dyos?

¿Tiqu'n kqyaju'ya'qib', mina'jon ntzaj tka'yi'nte'? chechij.

Inkub' kyq'o'n kyk'a'ẍe' toj tq'ij mewayi'n

ex nche oktene' yajulkye kyaq'unale';

4Inche iline' ex nche q'ojine' kyxolxe' toju' q'ij te mewayi'n

inxi'x che b'ujune' tu'n kyq'ob'e'.

Mixti'x tajb'en nche mewayine' ikju',

layx tzaj nb'i'ne' kyna'j Dyose'.

5¿Ma atzu' nchin tzalaja'ye' ti'ju' kymewayi'ne'

tu'nju' nxi'x che b'isune'

nxi'x che kub' tzipeye' nwitze' naku'j ajlaj

exqa tu'nju' nche kub' kẍeye' tuk'i'l kyxb'alune' te b'is toj tza'j?

¿Ma atzun mewayi'nju' toj kywitze',

toju' q'ij nchin tzalaje' ti'j?

6Myanate'.

Anate' mewayi'n nchin tzalaje' ti'j:

aju' tu'n kyelkyiq'i'ne' yajb'il mya tnik'alilkyi'j

ex tu'n kyel kypju'ne' iqb'il ti'j kyqul xjal;

tu'n kytzaqpi'nte qe'ju'ye' yaju'nqe' kyu'ne'

ex tu'n lan che oktle' mya'l kyib'aj xjal;

7tu'n t-xikyq'o'ne' kywaju' nche we'yajti ti'ju' kywaye'

tu'n t-xikyq'o'ne' kyposad prow mixti' kyja;

tu'n t-xikyq'o'ne' kyxb'alunju' mixti' kyi'j

ex tu'n kyonine' kyi'j kyxjalile'.

8Kspik'eb'eltzun toj kywitztze' kse'n ajqsqix

ex lwiy che q'anetelju' kyk'ixb'lene'.

Kb'el neju' tojxi'x tu'me'l kywitze'

ex kxel lpeju' wajwalile' kyi'je'.

9Che tzajel ntzaq'we'ntzuntze' qama chin kytxoke';

qama che ẍch'ine' nche qanin o'nb'ile', kxe'l nma'ne' kyeye': Luqine' lu

Qama kub' kynajsa'ne' tkyaqil yajb'il,

qa min ẍe ok kyili'n junjuntle'

exqa min xjaw kyiq'i'n yole' kyi'j,

10Qama kyaq'kyib'e' ajb'el teju' nwe'yajti,

qama che onine' ti'ju' nojqelan kye nche b'isun,

kqoptz'ajeltzun spik'untz kyeye' toj qlolj,

k'okyelju' qlolj kyeye' te spik'un kse'n wanq'ij.

11Che kxelnẍaqlu'ne' kukxju',

nim kywaye' kxe'l nq'o'ne' toj chq'ajlaj,

k'okyel kyipumale' wu'ne'

ex che okyele' kse'n jun tnej awal chab'a a'li'n,

kse'n jun t-xiklil a' majx ati a' toj.

12Kjawil kyb'incha'ntlju' kytaname' xitjni

ex kjawil kyb'incha'ntl tib'aju' tq'uqlil ojtxi' tkub'len.

K'okyel q'o'n kyb'iju' ttanama B'inchaltl nimaqtapi kub'ni xitj,

B'inchal jumajtl ja xitjni.

Yol ti'ju' q'ij te ojlab'l

13Kynimanku'ye' q'ij te ojlab'l;

lan kyb'inchaye' ti'chaq kyajb'ile' toju' q'ij xjan weye'.

Tz'okxju' q'ij lu kyu'ne' te tzalajb'il,

te jun q'ij xjan tu'n tnimet weye' ayine' Dyos Manb'aj;

nimanku'ya, lan kub' tb'incha'n tu'n ti'xti'ya toj.

14Qama kyb'inchaye' lu, knetel kytzalajb'ile' wuk'i'le',

che kxe'lwiq'i'n tzuntze' tu'n kuykanb'ane' kywi' witz toju' tx'otx'

che okyel jumajtle' tajawju' tetzb'il ojtxi' kyyajilb'ene' Jakob', chij.

Aku' Qman Dyos inq'mante ja'lu.