Esd 8 - Mam Ostuncalco Bible

Kyajlalju' Anjtzkyi'j B'ab'ilon

1A kyb'i nejenel ja'lu, kse'nxju' tku'x toju' u'j ja tz'ib'a'na' kyb'i tojile tja junjun, ju' anjtzkyi'j B'ab'ilon tuk'i'l Esdras tej intoq kawin Artajerjes:

2-3Werson, kyxol tyajajil Pinees;

Danyel, kyxol tyajajil Itamar;

Atus, tk'wal Sekaniy, kyxol tyajajil Dab'i;

Sakariy, kyxol tyajajil Paros, kyuk'i'l wuqnaq lajoj (150) xjal tz'ib'a'nqe' toju' kyajlal;

4Elyeoenay, tk'wal Serayiy, kyxol tyajajil Paat-moab', kyuk'i'l lajnaq (200) xjal;

5Sekaniy, tk'wal Jaasyel, kyxol tyajajil Satu, kyuk'i'l o'lajnaq (300) xjal;

6Eb'ed, tk'wal Jonatan, kyxol tyajajil Adin, kyuk'i'l kab'naqlajoj (50) xjal;

7Isayiy, tk'wal Ataliy, kyxol tyajajil Elam, kyuk'i'l oxnaq lajoj (70) xjal;

8Seb'adiy, tk'wal Mikael, kyxol tyajajil Sepatiy, kyuk'i'l kyajnaq (80) xjal;

9Ab'diy, tk'wal Jeyel, kyxol tyajajil Joab', kyuk'i'l lajnaq wajxaqlaj (218) xjal;

10Selomit, tk'wal Josipiy, kyxol tyajajil B'ani, kyuk'i'l wajxaqnaq (160) xjal;

11Sakariy, tk'wal B'eb'ay, kyxol tyajajil B'eb'ay, kyuk'i'l junaq wajxaq (28) xjaq;

12Joanan, tk'wal Akatan, kyxol tyajajil Askad, kyuk'i'l, jo'naq lajoj (110) xjal;

13Elipelet, Jeyel ex Semayiy, mank'b'il tyajajil Adonikam qe', kyuk'i'l oxnaq (60) xjal, e'anjtz yajxi'tl.

14Utay ex Sab'ud, kyxol tyajajil B'iwb'ay, kyuk'i'l oxnaq lajoj (70) xjal.

Ajb'el toju' Ja te k'u'lb'il

15Ayine', Esdras, inb'uyinkye kykyaqilju' xjal lu ttziju' tb'e a' inpon toju' nin a' Aab'a, ex o'kub'ten oxe' q'ije' atzu'. Tetzunj kyb'aj nka'yi'ne' xjal ex pale, mixti' elyal jun aj Leb'i kyxol wu'ne'.

16Qu'mtzun exi' nchq'one' Elyeser, Aryel, Semayiy, Elnatan, Jarib', Elnata, Natan, Sakariy ex Mesulam, ju' nimaq kyoklen, exqe' xnaq'tzal Joyarib' ex Elnatan,

17tu'n kyxi' nenulte Ido, nejenel toju' najb'il Kasipya, ex b'ajx nma'ne' kye titi'toq tu'n txikyma'n te Ido ex kyeju' kyuk'i'l, aye' ajb'el toj tja Dyos ate'toq toj Kasipya, tu'n kytzaj kyiq'in xjal onilqeye' toju' tja Qman Dyos.

18Ex chjonte te Dyos, ul kyiq'in jun ichan atixi'x b'a'n tu'n, Sereb'iy tb'i, tyajajil jun aj leb'i Mali tb'i, wajxaqlajoj (18) kyb'aj kyuk'i'lxi' tk'wal e' ttzik ex titz'in.

19Expe' eb'ju'l kyiq'i'ntlju' Asab'iy ex Isayiy, tyajajil Merari qe', junaq (20) kyb'aj kyuk'i'lxi' kyk'wal e'kyitz'in ex kytzik.

20Aye'tzu'n ajb'el toj tja Dyos okniqe' tq'o'n Dab'i exqe' nejenel onilkye aj Leb'i, junlajnaq (220) kyb'aj.

21Yajxi'tzuntel nmaye' tu'n tok jun mewayi'n ttziju' nin a' Aab'a, tu'ntzun tok qq'o'ne' qile qi'je' twitz Qman Dyos, ex tu'n txi' qqani'ne' te tu'n qtzajtiq'i'ne' toj tzalajb'il toju' qb'eye' kyuk'i'lju' toj qjaye' exqe' ti'xti' qeye'.

22Qu'n inch'ixwiye' tu'n kyxinqani'ne' xjal te q'oj kyuk'i'lxi' kychej teju' nimaqkawil tu'n kytzaj tq'o'n xq'uqil qe'ye' kye ajq'oj toj b'e, qu'n ojetoqna' txiqma'ne' teju' nimaqkawil qa ate Dyos xq'uqilkyeju' nche niman te, aye'tzu'n mache kyej kolb'ente intzaj tq'o'n tipumal ex ttx'u'jil kyib'aj.

23Ikytzu'n omewayine' ex o'kub'sane' te Dyos tib'aj tkyaqil ja'lu, ex otzaj tb'i'ne'.

24E' jawtzun nsk'o'ne' kab'lajoj (12) nuk'ul kyeju' pale: aye' Sereb'iy, Asab'iy ex lajojtl kyuk'i'l,

25b'ajtzun nmlo'ne' saqpwaq, q'anpwaq exqe' aq'unb'il e'tzaj tq'o'n nimaqkawil kyuk'i'lju' q'ol tnab'l exqe' ajb'el te, ex tkyaqilju' tzaj kyq'o'n aj Israel ate'toq atzu' te oyaj ti'ju' tja Dyos, ex b'ajx nq'o'ne' kyeju' eb'jaw nsk'o'ne'.

26B'aj nmlo'ne' ex xinq'o'ne' junk'al oxnaq junlajoj kyintal tk'i' kyajnaq lajoj lib'r (471.90) saqpwaq, jo'naq (100) aq'unb'il saqpwaqqe', ex oxnaq kab'lajoj kyintal tk'i' oxnaq lib'r (72.60) q'anpwaq;

27expe' junaq (20) laq q'anpwaqqe', masch'i'n wuqlajoj lib'r tk'i' nik'jan kyalal, ex kab'e' aq'unb'il q'ank'uxb'il b'incha'nqe' tb'anilxi'x, twi' wi'yal naku'j q'anpwaq.

28Xi'tzun nma'ntle' kye: Xjansa'n qe'kye' twitz Qman Dyos, kse'nxqe' aq'unb'il. Te Qman Dyos qekye' saqpwaq ex q'anpwaq, aju' Dyos eniman ojtxi' qchman te.

29Ape' kyka'yi'xe' b'a'nxi'x ex kyk'u'nxe' tzmaxi'j ajkykub' kymlo'ne' kywitzju' kynejel pale, ex kywitz aj Leb'i ex nejenel kye toj kyja aj Israel, kyoju' ja ti'j tja Qman Dyos toj Jerusalen, nchije'.

30Xi'tzun kyk'mo'n pale ex aj Leb'i saqpwaq, q'anpwaq exqe' aq'unb'il ju' matxi'toq b'aj mlo'n, xikyiq'i'ntzuntz Jerusalen, toju' tja Qman Dyos.

31O ik'tzun b'ettze' ttziju' nin a' Aab'a, toj tkab'lajoji'n (12) tajlalju' tnejel xjaw, tu'n qule' Jerusalen. Ate Qman Dyos oninqeye', o'tkole' kye ajq'oj ex kye eleq' toj b'e.

32Tetzunj qule' toj Jerusalen o'ojlan oxe' q'ije'.

33Tojtzu'n tkyaji'n q'ij b'ajkub' mlrtju' saqpwaq, q'anpwaq exqe' aq'unb'il toju' tja Qman Dyos, b'ajx q'ettzuntz tkyaqil teju' pale Meremot, tk'wal Uriy. Atitoq Eleasar tk'wal Pinees tk'etz, exqe' aj Leb'i Josab'ad tk'wal Joswe, ex Noadiy tk'wal B'inuy.

34B'aj mlet ex b'aj ajlet tkyaqilju' iqtz texju' q'ij lu, ku'x tz'ib'ettzuntz toj jun u'j.

35Yajxi'tzuntl, b'ajx kyq'o'n xjal, ju' anjtzkyi'j B'ab'ilon, chojb'il k'ok'sb'il te Qman Dyos, ex xikyq'o'n kab'lajoj (12) qpoj tman wakx, kyajnaq qaqlajoj (96) tman rit, oxnaq wuqlajoj (77) qpoj tman rit ex kab'lajoj (12) tman chib' toj kyb'i kykyaqil aj Israel, te oyaj tu'n tpaju' kyil. Kykyaqil e'kub' tz'e'ysa'n ninb'ilte Qman Dyos.

36Xi'tzun kyq'o'n tchaq'b'il nimaqkawb'il kyeju' ati kyoklen toju' kawb'ij ex kyeju' kawil toju' tx'otx' tkub'exq'ij te nin a' Ewprates, ex e'onin ti'ju' tnam ex ti'ju' tja Dyos.