Jue 6 - Mam Ostuncalco Bible

Txokli Jedeon tu'n Qman Dyos

1Aye'tzu'n aj Israel myab'a'n kyb'inchb'aj twitz Qman Dyos, ex exi' q'o'n wuq ab'q'i tu'n Qman Dyos toj kyq'ob' aj Madyan.

2Tu'ntzunju' ljo'ntoq kyokxi'xtl aj Madyan kuwxi'xtl yajlalkye aj Israel, e'xi' aj Israel b'inchal kyewb'il kywi'witz, kyoj jul toj pik ex ja lay che kneta', tu'n kyxob'el kye aj Madyan.

3Kukxtoqju' qa atitoq kyawal aj Israel awa'n, inche tzaju' aj Madyan, aj Amalek exqe'ju' xjal te tjawetzq'ij q'ojil kyi'j.

4Intoq che kub'ten toju' kytx'otx' aj Israel, nche oktentzuntz yajulte kyawal, nche ponx tzmax toju' tx'otx' Kasa, ex mixti'x kywa aj Israel nkyaj kyq'o'n, majx nche mankunju' rit, wakx, ex b'ur kyu'n.

5Intoq b'aj pon kyiq'i'n kypach xb'alun exqe' kywakyix, inche kub'tentzuntz toj kytx'otx' aj Israel ex inb'aj kyyaju'n tkyaqil. Intoq che b'ajpon kyuk'i'l kychej kamey nim txqan kyb'aj, kse'n jun yajb'il kyu'n ẍt'ikt'u'l.

6Intoq che kyej prowixxi'xju' aj Israel tu'n kpaju' aj Madyan, xikyqani'ntzun o'nb'iltz te Qman Dyos.

7Tej t-xi' kyqani'n aj Israel te Qman Dyos tu'n kyklet kyeju' aj Madyan,

8tzaj tchq'o'n Qman Dyos jun t-sanjelal ex xitma'n kye qa intma'n Qman Dyos ikjalu: Ayine' ẍin etzq'inkyeye' Ejipt, janajlqe'toqe' k'ayi'nkyib'e',

9ex mya o'kx e'nkole' kye aj Ejipt, ikxkye kykyaqilju' inche yajun kyib'aje'. E' b'je'x wiq'i'ne' kywitze', ex xinq'o'ne' kytx'otx' kyeye'.

10Ex xinma'ne' kyeye' qa ayine' Dyos Manb'aj, ex tu'n lalun che xob'e' kye kydyos amorey, ju' toj kytx'otx' najlqe'ye' ja'lo; aye'tzunkye' min ẍinxkyb'i'ne', chi Dyos.

11Ultzun tanjl Qman Dyostz, kub' qe tjaq'ju' b'ansi toj tnam Opra, te Joas, kyxolju' k'loj tyajajil Ab'yeser. Intoq xq'iq'in triy Jedeon tk'wal Joas toj ewaj, jatoq nkub'a' wab'etju' lob'j ub'a tu'n tb'inchet b'in, tu'n lalun che ilwi kyu'n aj Madyan.

12Kub' tyek'u'ntib' tanjl Qman Dyos twitz ex tzaj tma'n te ikjalu:

—¡Ichan, kuwa ex min nxob'a, ati te Qman Dyos tuk'i'la! chij.

13Xi'tzun ttzaq'we'n Jedeon te:

—Najsama taye, qa ati Qman Dyos quk'i'le', ¿Tiqu'ntzun inik'a' tkyaqilju' lu qi'je'? ¿Jatzun ta'qe' kykyaqilju' b'a'nq'ob'aj inkyma'n ojtxi' qyajilb'ene', tu'nju' inkyma'n qa a Qman Dyos setz q'inqeye' Ejipt? Matxi' qokyaj ttzaqpi'ne' Qman Dyos, ex matxi' qo'x tq'o'ne' toj kyq'ob' aj Madyan, chij.

14Atzunte Qman Dyos tzaj ka'yin te ex tzaj tma'n te ikjalu:

—Kutxi'ya klol kye aj Israel toj kyq'ob'u' aj Madyan tu'nju' tipumala ati. Ayine' nchinx chq'onteya, chi Dyos.

15Atzunte Jedeon xittzaq'we'n junmajtl te:

—Najsamxi'xa taye, ¿se'n taq'wi tu'ntkletu' tnam Israel wu'ne'? aye' na'we' k'loj nwitze'l prowqe'xi'x kyxol kykyaqil tyajajil Manases, ex naq ch'i'nxi'xwe' woklen kyxolju' toj njaye', chij.

16Atzunte Qman Dyos tzaj ttzaq'we'ntl te:

—Kb'entelte' tu'na qu'n chin tenb'ile' tuk'i'la. Kb'elkyi'ju' aj Madyan tu'na, kse'n nkub'ti'j jun tal ichan, chij.

17Xitzun tma'n Jedeon kjalu:

—Qama chin elb'a'ne' twitza, q'ontz jun techlala weye', qa axxi'x aya in yolina wuk'i'le'.

18B'incham xtalb'ila, lalun tzik'naj b'eta tza'lu, machinxe' q'el jun woyaje' tu'n tkub' nq'o'ne' twitza, chij.

B'a'natzun, knyo'ya ajtanjtz ti'ja, chi Qman Dyos te.

19Xi'tzun Jedeon, kub' tb'incha'n jun tal chib' ex kub' tb'incha'n jte' wab'j mixti' ttx'amal tu'n winqi'n litr arin; ku'x tq'o'ntzun chib'jtz toj jun chi'l, atzu'n ta'l toj jun k'wil, xitiq'i'ntzuntz tk'etzju' tze b'ansi.

20Tzaj tma'n tanjl Qman Dyos te tu'n kykub' tq'o'n chib'j ex wab'j mixti' kytx'amal tib'aj jun pik ex tu'n tkub'tqo'nju' ta'l. Tb'ajlenxi'tzun tb'incha'n Jedeon xiq'ma'n te,

21oktmko'n anjlju' chib'j kyuk'i'lju' wab'j tu'n ttze iq'i'ntoq tu'n, ex etz q'aq' toju' pik, eb'aju' chib'j ex wab'j tu'n; kub'tzun naj tanjl Qman Dyos twitz.

22Tetzunj teltnik' Jedeon qa tanjltoq Qman Dyos, tma ikjalu:

—¡Taye, Taye! ¡matz'okku' nka'yi'ne' tanjla Nman Dyos! chij.

23Atzunte Qman Dyos tzaj ttzaq'we'n te:

—Lalun xob'a, lay kyimta. Qex tk'u'ja, chij.

24Jawtzun tb'incha'n Jedeon jun q'olb'eb'l te ninb'ilte Qman Dyos atzu', ex oktq'o'n tb'i: Ate Qman Dyos nak'b'il. Majx kyej tenju' q'olb'eb'l lu toju' nintnam Opra, kytanam tyajajil Ab'yeser.

25Texju' qonik'an lu tzaj tma'n Qman Dyos te Jedeon kjalu:

—Q'intza jun tman wakx kyi'ju' talu'n tmana, aju' tkab' tman wakx te wuq ab'q'i, ex xitunku'ju'ya q'olb'eb'l te B'aal ati tu'n tmana. Ex ik'sanku'ju'ya tze xjansa'n kyu'n tk'etzju' q'olb'eb'l te B'aal,

26kjawel tb'incha'ntzuntza jun q'olb'eb'l weye' ayine' Dyos Manb'aj twi' witz kuwsa'n lu. Ktzajel tiq'i'ntzuntza tkab' tman wakx, kb'el tq'o'na nwitze' te jun chojb'il k'ok'sb'il, ex k'okyex tq'o'na xjan tzeju' kb'el tik'sa'na te t-siyil, chij.

27E'tzajtzun tiq'i'n Jedeon lajoj (10) tmajin ex tb'incha tkyaqilju' matxitoq tzaj tma'n Qman Dyos te; qonik'an tokten b'inchalte ex mya q'ijtl, qu'n xob' kyeju' twitze'l tman ex kyeju' xjal aj nintnam.

28Tetzunj kyjawe'ju' xjal najlqe' toj nintnam te prim, xikyka'yi'n q'olb'eb'l te B'aal matxitoq kub' xitu'n, ex matxitoq kub' tx'e'mu'nju' tze xjan tk'etzu' q'olb'eb'l, expe' matxitoq kub' q'o'n jun tman wakx te chojb'il k'ok'sb'il tib'aju' ak'a'j q'olb'eb'l.

29Intoq che xjelun kyxolilex: ¿Alokye xb'inchante ja'lu? chechij.

Tu'ntzunju' inxi'xtoq che jyon ex inxi'xtoq che xjelun, kyb'i qa a Jedeon tk'wal Joas b'inchante, exi'tzuntz tk'etz Joas ex xikyma'n te:

30—Iq'imitzju'ya tk'wala qu'n kb'el qb'yo'ne'. ¡Matxi' kub' t-xitu'nju' q'olb'eb'l te B'aal exju' tze xjansa'n tk'etz! chechij.

31Atzunte Joas xittzaq'we'n kye ikjalu:

—¿Ma kche okyeltene' klolte B'aal ex q'ojil tu'n tpaj? ¡Na'mtoqwit qsqix ajtkyim alkyexku' makolon ti'j B'aal! Qana'tzun dyos te' B'aal, xtkolku'tib'j tjunalx, qu'n tena'ju' q'olb'eb'l matxi' kub' xitu'n, chij.

32Atxi'xtzunj okkyq'o'n tb'i Jedeon te Jerob'aal, ex nkyma'n: klomtib' B'aal te, chechij, qu'n ana'te Jedeon kub' xitunte q'olb'eb'l te B'aal.

33Kykyaqilxtzunju' aj Madyan ex aj Amalek exqe' xjal te tjawetzq'ij, b'aj kyb'u'yi'n kyib' ex e'jlajin tib'aju' nin a' Jordan, e'kub'tentzuntz toju' b'ya' Jesreel.

34Tentzun tipumal Jedeon tu'n t-xew Qman Dyos, ex xitq'ajtza'n jun tuk'a rit tu'n kymujb'ante kyib' tyajajil Ab'yeser tuk'i'l;

35expe' exi tchq'o'n sanjelal txkolkye kykyaqil tyajajil Manases tu'n kymujb'ante kyib' tuk'i'l. Ex exi' tchq'o'n sanjelal txkolkye kyyajajil Aser, Sab'ulon ex Neptali, ex ikx e'etz tu'n kymujb'ante kyib' tuk'i'l.

36Xitzun tma'n Jedeon te Qman Dyos ikjalu: Qa ax qa chin ajb'ele' tu'na tu'n kyklet aj Israel kse'nxju' matxi' tmaya,

37kb'el nq'o'ne' jun ttz'umal rit nimaq tlanil toju' er ja inela' triy, qa ak'ju' lan lu te prim tu'n ta'l che'w, extzun tzqiju' tx'otx' ja tkub'a', oktzun k'elel nnik'tze' qa chin ajb'ele' tu'na tu'n kykletju' aj Israel, kse'nxju' oje tmaya, chij.

38Ex ikx b'aj ju'. Tej tjawe' Jedeon te prim el tytz'o'nju' tzmal tz'u'n ex noj jun b'as tu'n ta'l che'w el toj.

39Tu'npetzunju', tma Jedeon kjalu: Lalun tzaj ttx'u'jila wi'je' qa matxinma'n junmajtle' teya. Naq aju' wajb'ile' tu'n nb'inchanteye' juntl twitzlalil. Toju' maj lu ktb'incha'ya tu'n tkyaju' lan tzqij, atzunju' tx'otx' ak' tu'n ta'l che'w, chij.

40Ex tb'incha Qman Dyos ikju' toju' qonik'an lu. Tetzun juntl prim, tzqij toqju' tlanil alu'mj, atzu'n tx'otx' ak'toq tib'aj tu'n ta'l che'w.