Is 57 - Mam Ostuncalco Bible

1Inche kyimju' xjal tnik'alkyi'j

ex mix-a'lo'te nb'ajxtk'uj kyi'j;

inche kub' naju' b'a'n xjal,

ex mix-a'lo'te nkane toj twitz

qa ajkykyim mixti'tlte yajb'ilkye

2ex nche pon toju' nak'b'il.

Mana' che b'et toj b'a'n b'e

atzu'n ja'lo nche ojlan toj kymuqb'il.

Yol kyi'ju' k'u'lb'il te witzleb'i'n

3Che lq'etze', e'tk'wal ajk'ayi'n,

aye'ye' e'itz'jiye' toj ajpaji'n:

4¿Alqi'j nche xmayina'ye'?

¿Alqi'j nche sq'iluna'ye'?

¿Alqi'j netza' kyiq'ina' kyaq'e'?

Tk'wal ilqe'kye', twi' chalyolqe'ye';

5Inche aq'wiye' b'inchal ti'xti' mijsoq'x

kyxe k'ol ex kyxe kykyaqil tze pujinqe',

ex nche kub' kyq'o'ne' k'wal te chojb'il

kytzi a' nche etz kyxol ab'j.

6Majx akyajb'ilju'ye' aj Israel,

tu'n kyk'ulune' kywitzju' ab'j sq'ib'un ttzi a',

majxna' ati jatu'n kyk'uluna'ye' atzu',

Matxi' kub' kyqo'ne' chojb'il b'in kywitz,

matxi' kub' kyq'o'ne' twitz awal k'ok'e'kywitz kye.

¿Ma oktzun chin tzalajele' tu'n tkyaqil ja'lu?

7Kub' kyq'o'ne' kykuẍb'ile' twi' jun witz nimin twe' jupin kyu'n tzaj,

ex atzu' ejaxa'ye' q'olku' chojb'il.

8E'kub' kyq'o'ne' kywitzleb'e' taq'wiqe'xi'x

ttze'lti'ju' tjpel tjaya.

Ik'nna'le' kyu'ne', ex kub' kyẍb'iqb'a'n kyib'e'

ex ekub'kẍeye' tib'aj kykuẍb'ile' nim twitz;

kyejb'ent kyole' kyuk'i'lju' ichan

e'kub' toj kywitze' tu'n kykub'kẍeye' kyuk'i'l,

ex majx tokkywitze' ti'ju' witzleb'.

9Matz'oktilil kyu'ne' q'ol aseyt twitz dyos Melek

ex txqan k'ok'sb'il;

exikychq'o'ne' sanjelal najchaq,

mache b'ajx kylmu'ne' tzmax toj tkawb'il kamik.

10E'kub' siktiye' tu'n kyb'ete' nim,

ex min elkynik'e' qa mixti' tajb'en.

Q'i'ntoq kywaye',

qu'mtzun mixtoqti' nche siktiye'.

11¿Alkyeqe'tzu'n dyos lu jatoq nche xob'a'ye' ex jatoq nche nimana'ye',

tu'nju' min xjapun kyyole' wuk'i'le'

ex majx matzik' nna'le' kyu'ne' tejumajx?

Tej mixtoqti' nche nimane' weye',

mixti'we' nyol ex naku'j min nxi' toj nwinqile'.

12Oktzun kxe'l nchik'b'a'nwe' kychwinqlale',

toj kynab'le' qa majx tzinun ta'qe'ye'.

13Ajkyẍch'ine' qanil o'nb'il,

lay che oninjtze' ex lay che klete' kyu'n kywitzleb'e'.

Naq che kxe'lqi'n kykyaqil tu'n kyq'iq';

naq tu'n jun xupin che b'ela' naj.

Aye'tzunkye' q'uqlok kyk'u'j wi'je'

che najal toju' tnam

ex che najal twi'ju' witz xjan weye', chi Dyos.

Tz'e'ysb'ilkywitz aj Israel ex q'a'nb'ilte

14Kb'injtzeltzuntz aj tq'manjtz kjalu:

Kyb'inchame' jun b'e plan,

che kyiq'imilju'ye' maqb'il tu'n tik'xju' ntaname'.

15Qu'n aju' Dyos te jawnixi',

aju' ati tejumajx

ex xjan tb'i, intma'n kjalu:

Najliqinwe' toj jun najb'il toj kya'j ex xjansa'n,

ex atinqine' tuk'i'lju' me's ex nb'isun,

inxiwoni'ne' ex inkuwsa'ne'.

16Lay chin oktene' poqilte ntaname' kukxju',

ex lay chin q'ojine' kukxju' ti'j;

qu'n jaku' lay qetl kyk'u'ju' xjal

ju' oje che nch'isaye' wi'je'.

17Majx ten jun tq'ijlalil ntx'u'jile'

tu'n tpaju' kyil aj Israel,

kub' ntz'e'ysa'ne' kywitz ex elnpa'n wib'e' kyi'j;

aye'tzunkye jawkyiq'i'nkyib' ex kub' kypi'sa'nxi'xtlkyib'.

18Matxi' wilju'ye' kyb'inchb'aj,

kche nq'a'na'we' ex che ojlal wu'ne'

ex che tenb'el toj nak'b'il b'a'nxi'x.

Knq'uqb'a'ye' kyk'u'ju' nche b'isun,

19kxel nma'ntzuntze' kye kykyaqil:

¡Tenx nak'b'il kyeju' ate'qe' najchaq,

ex tenx nak'b'il kyeju' ate'qe' naqaku'!

¡Knq'ana'we' ntanam! nchiku'ye'.

20Aye'tzunkye' b'inchal myab'a'n ikyqe' kse'n ninnjab' ntinun,

mixjun nb'ent tkub' nak'e

ex nche etz t-xonju' xoq'l ex tz'il tu'n ttolob'.

21Mixti'xte b'a'n kyeju' b'inchal myab'a'n, chij.

Aku' Qman Dyos q'mante.