1-2Tzaj tma'n Qman Dyos te Moyses twi' witz Sinayi tu'n t-xitma'n kye aj Israel kjalu:
Ajkyokxe' toju' tx'otx' kxe'l nq'o'ne' kyeye', ati tu'n tojlanju' tx'otx' te ninb'ilweye'.
3B'a'n tu'n kyawan waqaq ab'q'iye' twitzju' kytx'otx'e'. Ikx waqaq ab'q'i tu'n kypodarinteju'ye' tqan kylob'aje' ub'a ex tu'n kyb'u'yinteye' twitz,
4atzu'n twuqi'n ab'q'i ati tu'n tojlanju' tx'otx' te ninb'ilweye'; lalun che awane' twitzju' kytx'otx'e' toju' ab'q'i lu ex lalun kypodari kylob'aje' ub'a.
5Ex lalun jaw kych'umi'ne' triy intzaj ch'iy tu'nxtib' tjawlenxi'ju' b'ajsb'il kyawale', ex lalun jaw kyb'u'yi'ne' twitz lob'j ub'a mya podari'n kyu'ne'; ati tu'n tojlanju' tx'otx' b'a'nxi'x.
6Kkanunelte' tawalju' tx'otx' ktzajel ch'iy tu'nxtib' toju' tojlab'l te kywaye', kywaju' kymajine' ichan ex qya, kywa aq'unal ex kywaju' te najchaq xjal najliqe' kyuk'i'le',
7kywaju' kyalu'ne' ex kywaju' tojk'ul txkup toju' tx'otx'. Tkyaqil tawalju' tx'otx' matzaj ch'iy k'ajb'el te kywaye'.
8Ati tu'n t-xi' kyajla'ne' wuq sman ab'q'i, mujqa wuq maj wuq ab'q'i, oktzun kjapumel tajlaltz toj kab'naq b'eljoj (49) ab'q'i,
9Tojtzun tlajoji'n q'ij teju' twuqi'n xjaw, ju' Tq'ij Najsb'il, kxel kyq'ajtza'ne' tuk'a rit toj tkyaqilju' tx'otx'.
10Atzunju' Tkab'naqlajoji'n (50) ab'q'i k'okyel kyu'ne' te xjan: k'okyel te ab'q'i te tzaqpib'l, ex ati tu'n tex kyma'ne' tqanilju' tzaqpib'l kye kykyaqilju' xjal najliqe' toju' tx'otx' toju' ab'q'i lu. Kykyaqilju' xjal k'anjelkyi'j kyk'etzju' kywitze'l ex che okyel jumajtl tajawju' kytx'otx'.
11K'okyelju' tkab'naqlajoji'n (50) ab'q'i kyu'ne' te ab'q'i te tzaqpib'l, ex lay che awane' toju' ab'q'i lu ex lalun jaw kychmo'ne' triy intzaj ch'iy tu'nxtib' ex lalun kypodariye' tqan ky-ub'aye' ex mixti' tu'n kychmonteju'ye' twitz,
12Qu'n xjante' ab'q'i lu ex te tzaqpib'l kyeye'. O'kx kxel kywanju'ye' o'kxju' ktq'a'ju' tx'otx' tu'nxtib'.
13Tojtzunju' ab'q'i te tzaqpib'l lu kykyaqilxe' kb'el kytzyu'n jumajtlju'ye' kytx'otx'e'.
14Qa ati jun mak'ayin mujqa malq'on ttx'otx' te juntl xjal, lalun kyb'incha jun sb'ujtib'il ti'j;
15ati tu'n tchjonteju' kloq'ol kse'nxju' tab'q'iyil matxitoq tzik' tik'lenxi'ju' ab'q'i te tzaqpib'l, exju' kk'ayil ati tu'n tqaninte kse'nxju' jte'tl ab'q'i tu'n tjaw awal:
16qa atix b'a'npun ab'q'itl tu'n tjaw twitz awal, wi'yilx ch'i'ntl twi'; qatzun naqjte'x ab'q'itl, ex naqjni'x ch'i'ntl twi', qu'n ate in k'ayetju' aju' jte' ab'q'i tu'n tjaw twitz awal twitz.
17Lalun kub' kysb'u'n kyib'e' jun te juntl, kyyek'ume' ninb'il nwitze', qu'n ayine' Dyos Manb'aj.
18Che japunxju' nkawb'ile' kyu'ne', kyb'inchamqe'ye' nnuk'b'ile'. Che japunx kyu'ne', che anq'iltzuntze' toj nak'b'il toju' tx'otx';
19ktq'a' te tx'otx' tawal, kche anq'ile' toj nak'b'il twitz ex che wale' ti'ju' tawal tzmaxi'j aj kynoje'.
20Qajlo in kyxima'ne': ¿Ti'tzu'n kxel qwan toju' twuqi'n ab'q'i, qa lay qo awan ex lay qo b'uyin twitz qawal? qa chechiye'.
21Ktzajel nq'o'nwe' nb'anq'ob'e' toju' twaqaqi'n ab'q'i, exju' twitz kyawale' kjawil kab'alx te oxe' ab'q'i;
22kche waltzuntze' ti'ju' twitz awal k'u'n akx inche awan jumajtle' toj twajxaqi'n ab'q'i, expe' kche wale' ti'j toju' tb'eljoji'n ab'q'i, akx inpon tq'ijlalil tu'n tjaw kyb'uyi'ne' twitz kyawale'.
23Lay b'ent tk'ayetju' tx'otx' tejumajx: wewe' tx'otx', aye'tzunkye' naq ajb'etu'nqe'ye' twitz, naq ulaqe'ye' weye'.
24Tu'ntzunju', alkyexku' kytx'otx'e', ati tu'n kyq'onteye' anb'il kyeju' tnejel tajaw tu'n kylq'onte jumajtl.
25Qa ati jun kywnaqile' makyej toj prowil ex makyej tk'a'yi'n ttx'otx' kyeye', aju' twitze'l atixi'x kylontekyib' tuk'i'l b'a'n tu'n tkolpilteju' ojetoq tk'ayiju' twitze'l.
26Qatzun ati jun mixti' jun twitze'l tu'n tkolpinteju' ttx'otx' exqa mab'ent tu'nx tu'n tel tkolpi'n,
27kxel ximetju' tq'ijlalil matxi' tzik'xi' t-xilen tk'a'yi'n, k'anjel tanjsa'n ti'ju' twi' tx'otx' teju' lq'onte jte' kpomila' tajlal jte' ab'q'itl tu'n tulju' ab'q'i te tzaqpib'l, ex ktzyetel jumajtlju' ttx'otx'.
28Qatzun min xb'uyetju' medi tu'n, tu'n tkotpetju' ttx'otx', kjel tentzun tx'otx'tz teju' loq'ol tzmaxi'j ajtul kanunju' ab'q'i te tzaqpib'l, tzmaxitzun ktzaqpetel te tx'otx'tz, atzunju' k'ayinte kttzyu' jumajtlju' ttx'otx'.
29Qa ati jun matk'ayi jun ja toj nintnam tok tapi ti'j, ati toklen tu'n tlq'onte jumajtl toj jun ab'q'i t-xilenxi' tk'a'yi'n.
30Qatzun min xb'ent tkolpetju' ja toj jun ab'q'i, kjeltzuntz tejumajx teju' lq'onte ex kye tk'wal. Lay b'ant ttzaqpet toju' ab'q'i te tzaqpib'l.
31Aye'tzu'n ja toj tnam min tok tapi kyi'j ikx che okyela' kse'n tx'otx' toj kojb'il; b'a'n tu'n kykolpet ex tu'n kytzyet jumajtl toju' ab'q'i te tzaqpib'l.
32Ati kyoklen aj Leb'i kukxju' tu'n kylq'onte jumajtlu' ja ate' kyoju' nimaqkytanam.
33Qa jun aj Leb'i kkolpilte, kjel ttzaqpi'n loq'olu' ja toju' ab'q'i te tzaqpib'l ex tu'n tpon aj Leb'i toju' tetzb'il toj nintnam, qu'n o'kxte kyetzb'il aj Leb'iju' kyxol aj Israel o'kxju' kyja ati toj ninkytanam.
34Mixti' tu'n kyk'ayetju' tx'otx' kyi'jile ninkytanam aj Leb'i, qu'n kyetzb'ilqe' tejumajx.
35Qa ati jun kywnaqile' makyej toj prowil ex mapon kyuk'i'le', ati tu'n kyonine' ti'j kse'n jun te najchaq xjal toj b'e ex tu'n t-xi' kyiq'i'ne' kyjaye'.
36Lalun tz'el kyqani'n ti'xti'ye' te ex lalun kyqaniye' tub'chilju' tch'ex qama t-xi' kyq'o'ne'; che xob'pekye' nwitze' ex kyk'mome' kywnaqile' tu'n tten kyjaye'.
37Lalun kyqani tub'chilju'ye' ch'ex medi qama txi' kyq'o'ne', ex lalun jax kych'isa'ne' twi'ju' twa kxel kyq'o'ne'.
38Qu'n ayinwe' Dyos Manb'aj, inetz q'inkyeye' Ejipt tu'n t-xinq'o'ne' tx'otx' kanaan kyeye' ex tu'n kyk'ulune' weye'.
39Qa ati jun kywnaqile' makyej toj prowil ex kyk'etze' ta', ex matk'ayitib' kyeye', lalun tz'aq'unan kyu'ne' te jun majin lq'o'n;
40kyq'onke' kse'n jun aq'unal mujqa jun ula. K'aq'unal kyuk'i'le' tzmaxi'j ajtul kanunju' ab'q'i te tzaqpib'l,
41k'ik'el b'ettzuntz kyjaye' ex kxe'l kyuk'i'lxi'ju' tk'wal tu'n tpon jumajtl kyuk'i'lju' twitze'l toju' ttx'otx';
42qu'n nmajin qewe'; ayine' netz q'inkye Ejipt ex mixti' tu'n kyk'ayet te majin.
43Lalun che oktene' yajulkye; che xob'x pekye' nwitze'.
44Qa kyajb'ile' tu'n kyten kymajine' ichan mujqa qya lq'o'nqe', kylq'onqe'tze' kyoju' txqantl nimaqtnam ate' kyi'jileye'.
45Ex b'a'n tu'n kylq'onteye' te najchaq xjal najliqe' kyxole', exqe'ju' kyk'wal mache itz'ji akx ate'qe' toj kytx'otx'e'; aye'tzun b'a'n tu'n kylq'onteju'ye'
46ex tu'n kykyaj kyq'o'ne' te kyetzb'il kyk'wale' aj kykyime'; kche ajb'el kye kukxju'. Atzunkye' aj Israel, mixti' junkye' tu'n tkawin ex tu'n tkub' kyyaju'n kytzike' mujqa kyitz'ine' kyyajajilxe'.
47Qa ati jun najchaq xjal najli toj kytx'otx'e' majaw q'inumax, atzun jun kywnaqile' tb'esinju' najchaq xjal makub' prowix ex matxi tk'a'yi'ntib' teju' najchaq xjal lu, mujqa te juntl najchaq xjal,
48ati toklen tu'n tlq'etju' tzaqpib'l te maskye t-xilenxi' tk'a'yi'ntib'. Kb'antel tkolpetl tu'n jun ttzik,
49tu'n jun ttiy, tu'n jun tk'wal ttiy mujqa tu'n alkyexku' juntl twitze'l nqaku' ta'; ex ikx kb'antel tkolpintetib' tu'nxtib', qa ati tu'me'l tu'n,
50kxel t-xima'n junx tuk'i'lju' lq'onte, tzajx toju' ab'q'i tk'a'yintetib' kpomelx toju' ab'q'i te tzaqpib'l: ax twi'ju' kse'nxju' kyajlal ab'q'i, ex jte'xi' ab'q'i matxi tz'aq'unanxi' kxel ximet kse'nxju' twikyk'u'j aq'unal.
51Qa atix b'a'npun ab'q'itl tu'n tjapun, axtzun kxel ximetju' jni' kxe'l tq'o'n te kotpib'lte ti'ju' pwaq tk'am tej t-xi' tk'a'yi'ntib';
52qatzun naq jni'xtl tu'n tul kanunju' ab'q'i te tzaqpib'l, a kxel tq'o'nju' te kolpib'lte o'kxju' te jte'tl tq'ijlalil tu'n tjapun.
53Ik k'okela'ju' kse'n jun aq'unal in b'entti'j tu'n taq'unan te jun ab'q'i; lalun kyaje' tu'n tyajunjtz.
54Qatzun min xb'ent tkolpet toju' tq'ijlalil lu, ktzaqpetel toju' ab'q'i te tzaqpib'l junx kyuk'i'lju' tk'wal,
55qu'n nmajin qewe' aj Israel, nmajin qeku'xi'xe'; ayine' inetz q'inkyeye' Ejipt. Ayine' Dyos Manb'aj.
Who We AreWhat We EelieveWhat We Do
2025 by iamachristian.org,Inc All rights reserved.
