Lv 5 - Mam Ostuncalco Bible

Nuk'b'il ti'j chojb'il tu'ntpaj il

1Qa ati jun xjal matxi txko'n tu'n t-xi' tziyal ti'j jun ti'xti' matil mujqa matb'i, extzunqa min xtaj tu'n ttziyante, ilju' intb'incha'n ex k'okel q'et te til.

2Qa ati jun xjal matxi ttzyu'n jun ti'xti' tz'il, jun kyimni txkup tz'il, tojk'ul txkup mujqa aluma'n, mujqa txkup in qittinje twitz tx'otx', kjel tz'ilix tu'n ex ati tpaj, maskyepe' min xtil.

3Qa ati jun xjal matxi ttzyu'n ttz'ilil xjal ex min xtil, exqa yajxi'tl sel tnik' ti'j, ati tpaj.

4Qa ati jun xjal matz'el tma'n jun tyol toj ojqelb'il tu'n tb'inchante jun b'a'n mujqa jun myab'a'n, extzunqa yajxi'tl sel tnik' ti'ju' xttziya ju' min xima'ntoq tu'n, ati tpaj.

5Aju' xjal matz'elyal toj alkyexku'ju' il lu, ilti'j tu'n tjatz tpa'n til

6ex kb'eltq'o'n jun ttxu rit mujqa jun ttxu chib' te chojb'il nwitze' tu'n tpaju' il xtb'incha, tu'ntzunju' chojb'il lu kchjetel tilju' xjal tu'nju' pale, kb'el najsettzun tiltz.

7Qatzun mixti' tu'me'l tu'n tlq'onte jun qpoj tman rit, ktzajel tiq'i'n jun muj xlak'uk' mujqa jun muj tal paloms tu'n tpaju' il xtb'incha: jun te chojb'il tu'n tpaj il, atzu'n juntl te chojb'il k'ok'sb'il.

8Che kxe'l tq'o'n teju' pale, atzunju' pale nejl kb'el tq'o'nju' chojb'il tu'n tpaj il, k'elel tiq'i'n twi';

9ex kxel twitxk'a'n ch'i'n tchk'elju' alu'mj te chojb'il tu'n tpaj il toj jun plaj teju' q'olb'eb'l, atzunju' txqantl chik' k'elel tytz'o'n t-xeju' q'olb'eb'l, qu'n chojb'il tu'n tpaj il.

10Atzunju' tkab' kb'eltq'o'n te chojb'il k'ok'sb'il, kse'nxju' nuk'b'il q'ma'ntl; iktzu'n kchjetela' tilju' xjal tu'nju' pale, knajseteltzun tiltz.

11Qatzun mixti'x tu'me'l tu'n tlq'onte jun muj xlak'uk' mujqa jun muj tal paloms, ktzajel tiq'i'n kyaje' lib'r tk'i' nik'jan tb'anil arin te jun oyaj tu'n tpaju' til, mixti' tu'n tkux tq'o'n aseyt mujqa sturak tib'aj, qu'n jun oyajte' tu'n tpaj il.

12Kxe'l tq'o'n teju' pale, atzunju' pale kjawil tiq'i'n jun jot te nab'ab'l ex kb'el ttz'e'ysa'n tib'aju' q'olb'eb'l junx kyuk'i'lju' oyaj inche tz'e'yset te ninb'ilweye'. Jun oyajte' tu'n tpaj il,

13tu'ntzun tchjet alkyexku' il xtb'inchaju' xjal tu'nju' pale, kb'el najsettzun tiltz. Atzunju' minti' xb'aj ti'ju' oyaj twitz awal kxe'l teju' pale, chiku'ya kye, chi Qman Dyos te Moyses.

Chojb'il tu'ntpaj kyil aj Israel

14Tzaj tma'n Qman Dyos te Moyses ikjalu:

15Alkyete naqx myanim xb'inchan il tu'n qa min xkub' tq'o'n tkyaqilju' oyaj tu'n tq'onte weye', ati tu'n ttzaj tiq'i'n jun tman rit mixti' ttzakajil kyi'ju' talu'n te jun chojb'il tu'n tten b'a'n nwitze'. Ati tu'n toktq'o'na twi'ju' tman rit kse'nxju' tajlal tu'n saqpwaq, kse'nxju' malb'il q'ma'n toju' ja xjan kyeju' oyaj tu'n kytene' b'a'n wuk'i'le'.

16Aju' xjal lu ati tu'n tchjonte twi'ju' xkyej tiq'i'n ti'ju' oyaj xjansa'n nwitze', tuk'i'l jun tjwe'yi'n tnejtl tib'ajxi'ju' lu, aju' tajlal lu kxe'l tq'o'n teju' pale. Tu'ntzunju' tman rit kb'eltq'o'n te chojb'il tu'n tten b'a'n wuk'i'le', oktk'ma' najsb'il til tu'n pale, knajseteltzun tiltz.

17Qa ati jun xjal mab'inchan il tu'nju' matb'incha jun myab'a'n min tma'n toj nchaq'b'ile', maskye minti' sel tnik', ati tpaj ex kjelten myab'a'n tten wuk'i'le'.

18Qu'mtzun ati tu'n ttzaj tiq'i'n jun tman rit mixti' ttzakajil kyi'ju' trit, ati tu'n tmanteya jte' twi', ex kxe'l tiq'i'n teju' pale te jun chojb'il tu'n tten b'a'n wuk'i'le', tu'ntzun tk'monteju' xjal lu najsb'ilteju' til, ju' min xima'ntoq tu'n, tu'n tb'inchante, knajseteltzun tiltz.

19Jun chojb'ilte' tu'n tten b'a'n wuk'i'le', qu'n myab'a'n ttenju' xjal lu nwitze', chi Dyos.