1Tetzunj atitltoq Dab'i toju' ja te kawb'il, xitma'n te Natan ju' t-sanjelal Dyos:
—Ka'yintzpe'ya, najlqine' toj jun ja te kawb'il k'ute, atzu'n kax k'ub'lteju' tyol Qman Dyos kyejni b'entti'j, naq kyjaq' jte' tal plaj xb'alun tkub'a', chij.
2Xitzun ttzaq'we'n Natan te:
—B'inchamna'ya tkyaqilju' tb'is tk'u'ja, qu'n atite' Qman Dyos tuk'i'la, chij.
3Textzunju' qonik'an lu, tzaj yolin Dyos te Natan ex tma:
4Kutxi'ya yolil tuk'i'lju' nmajine' Dab'i, ex q'manxa te, qa ayine' Dyos Manb'aj ẍin q'mante ikjalu: Myata kjawil b'inchante jun jatu'n nnajane' toj.
5Atxi'xj tej kyetzwiq'i'ne' aj Israel, tzmax ja'lo, b'ajxa' chin najana'ye' kyoj ja te k'u'lb'il, naq toj jun ja xb'alun matxi' chin tenaye' kyoj b'a'npun najb'il.
6B'ajx txa' nma'ne' te junju' nejenel kye, ju' e'kub' nq'o'ne' tu'n kykawin kyib'aju' ntaname', ttzalenxi'ju' tq'ijlalil matxi' chin tene' kyuk'i'l, tu'nwt tjaw tb'incha'n jun njaye' k'ute'yile.
7Qu'mtzun q'manxa teju' nmajine' Dab'i qa ayine' Dyos Manb'aj nimwipumale', nchin q'mante: Matz'el wiq'i'na ti'j k'ik'lej rit tu'n toka te nejenel teju' ntaname' Israel;
8matxi' chin tene' tuk'i'la jaxjaku', oje che b'aj kykyaqilju' tajq'oja wu'ne', aye' e'oktzaqpaj ti'ja, ex matxinq'o'ne' toklena, kse'n kyoklen nimaqxjal twitz tx'otx'.
9Expe' oje kub' nb'incha'ne' jun kynajb'ilu' ntaname' aj Israel, atzuntzu' ẍe kub'a' nq'o'ne' tu'n kynajan toj kytx'otx' kyeku', ja mix alo'kye k'okyel ik'lenkye ex lay che yajuntl b'inchal il kyi'j, kse'n tnejel,
10tej kyoknq'o'ne' nejenel tu'n kykawin tib'aju' ntaname' Israel. Che b'el nme'ssa'ne' kykyaqilju' tajq'oja. Kxe'l nma'ne' teya qa che tenb'il tyajajila wu'ne',
11ajtzun tjapunju' tchwinqlala ajtkyima, k'okyel nq'o'ne' jun kyxolju' tyajajila ex knkuwsa'ye' toju' kawb'il.
12Ate kjawil b'inchanteju' njaye', ex knkuwsaju'ye' tkawb'il tejumajx.
13Ayine' chin okyel te Manb'aj te, atzunte k'okyel te nk'wale'. Lay tz'el wiq'i'ne' nxtalb'ile' tib'aj kse'n nb'inchaye' teju' ok nejtl twitza,
14okpe' ktenb'il wu'ne' toju' njaye' ex toju' nkawb'ile' tejumajx. Ex kjeltenju' tq'uqb'il tejumajx, chiku'ya te Dab'i, chi Dyos.
15Tkyaqil ja'lu xitma'n Natan te Dab'i, ikxi'xu' kse'n matxi'toq til ex tb'i.
16Okxtzu'n nimaqkawil Dab'i yolil twitz Qman Dyos, ex tma: Nman Dyos, ¿alkye qintzune' ex titi' kyoklenju' toj njaye' tu'nju' matxi' chin ule' tza'lu tu'na?
17¡Ex naqch'i'n ja'lu teya Nman Dyos, expe' matxi' tzaj tma'na titi' kt-se'ya kyuk'i'l tyajajilju' tmajina lu toju' tq'ijlalil tzul ex machin tzaj tka'yi'na naku'j nimaqxjal qine' nimaq toklen!
18¿Mixti'tl nyole' tu'n txi' nma'ne' teya, tu'nju' oklenj saj tq'o'na teju' tmajena, tojtzqi'na'teju'ya tmajina lu?
19Taye, mache tb'inchaya tkyaqilju' ti'xti' lu tb'anilqexi'x weye' ayine' tmajina, kse'nxju' tb'is tk'u'ja ex tu'n tyek'u'nteya.
20Nman Dyos, mixti' juntl kse'n aya, ex mixti' juntl dyos ti'jxi'ya, kse'nxju' oje qb'iye'.
21Expe' Israel, ju' ttanama, ¡mix-a'lo' juntl kse'nte, qu'n o'kxte jun tnam toj tkyaqilu' tx'otx'! E' tzaqpet tu'na Nman Dyos tu'n kyok te ttanama, ojexi'x yolinjtza b'a'n tej tb'inchanteqe'ya ti'xti' te lab'te'n ex nimaq kyoklen. E' b'je'l t-xla'ja'na txqantl tnam twitzju' ttanama, tzaqpet tu'na toj Ejipt,
22qu'n oktq'o'na Israel te ttanama tejumajx, ex teya Nman Dyos che k'ulula'.
23Ikytzu'n Taye, tziyankjxi'xju'ya tyola tejumajxju' matxi' tmaya teju' tmajina ex kyeju' tyajajil, japunxju' xkyaj ttziya'na.
24¡Japunxwitju' tyola b'a'nxi'x xttziyaya ex jawxwit nima'n tb'iya kukxju', ex q'manjtzwit qa aya Dyos Manb'aj nimtipumal Kydyos aj Israel! ¡Che tenxwit tyajajil Dab'i ju' tmajina kukxju' twitza!
25Nman Dyos, matxi' tzaj tma'na weye' qa che tenb'elju' nyajajile' twitza; qu'mtzun maskye tmajinqina, chin kub'sale' twitza.
26Taye, aya Dyos, nim xtalb'il matxi' tzaj ttziya'na weye' ayine' tmajina;
27atzu'n ja'lo matxi' che tzaj tky'i'wla'na nyajajile' tu'n kyten kukxju' te nimaqkawil toj tq'ob'a. Nman Dyos, matxi' che tk'iwlaya, k'i'wla'nqe'tzun ja'lo tejumajx, chi Dab'i te Dyos.
Who We AreWhat We EelieveWhat We Do
2025 by iamachristian.org,Inc All rights reserved.
