Esd 5 - Mam Ostuncalco Bible

1Xikyma'n t-sanjelal Dyos Akey ex Sakariy tk'wal Ido, kye aj Juda ex aj Jerusalen, ju' matxi'toq tzaj tma'n Qman Dyos kye.

2Aye'tzunkye Sorob'ab'el, tk'wal Salatyel, ex Joswe, tk'wal Josadak, eb'jo'kten jumajtl aq'unal tu'n tjaw b'inchetlu' tja Dyos toj Jerusalen, ex ate'toqju' t-sanjelal Dyos onilkye.

3-4Atzunte Tatenay, kawil toju' tx'otx' tkub'exq'ij te nin a' Ewprates, ex Setar-b'osnay exqe' kyuk'i'l, e'pon q'malte kye toj Jerusalen: ¿Alkyetzu'n xq'mante kyeye' tu'n tjaw b'inchetlu' ja te k'u'lb'il lu, ex tu'n tjawx kyq'o'ne' tz'len tib'aj? ¿Titi' kyb'iju' xjal nche jaw b'inchante jumajtju' tja Dyos lu? chechij.

5Atzunte Dyos kolon kyi'ju' nejenel kye aj Juda, qu'mtzun mixti'x e'myet ti'ju' aq'untl, tzmaxi'j txi' tqanil te Dariy ex tu'n tulju' tzaq'web'l tu'n.

6Ajun tilb'ilal u'j ja'lu xikytz'ib'a'n Tatenay, kawil toju' tx'otx' tkub'exq'ij te nin a' Ewprates, ex Setar-b'osnay exqe' kyuk'i'l, nim kyoklen toju' kawb'il tkub'exq'ij te nin a' Ewprates, ju' xikysma'n te nimaqkawil Dariy,

7-8intma'n ikjalu:

Nxi qq'olb'e'nq nimaqkawil, b'a'nwt ta'ya toj tchwinqlala, nxiqq'o'ne' tqanil teya, oxt'anje' toju' tx'otx' Juda, ljo'n tb'inchanjtz jumajtl tjaju' Dyos nimxi'x toklen kyu'n txqan ab'j jso'n kywitz. Atzuntl ja'lo ljo'n tktxunjtzu' tapi tu'n tz'lan, inxi'x oktilil kyu'n ex lwiyxi'x nxilq'eju' aq'untl ti'j.

9Xiqqani'ne' kyeju' kynejel aj Juda alkye xq'mante kye tu'n tjaw kyb'incha'n jumajtlju' tja Dyos, ex tu'n tb'aj kyktxu'n tu'n tz'lan,

10ex ti'ti' kyb'iju' xjal q'ilte twitzju' aq'untl lu, tu'n tku'x tz'ib'itju' kyb'i ex tu'n t-xiq'met teya nimaqkawil.

11Aye'tzunkye tzaj kytzaq'we'n qa nche niman te Dyos te toj kya'j ex twitz tx'otx', qu'mtzun ljo'n tjaw kyb'incha'n jumajtlu' tja Dyos matxi' b'et b'a'npun ab'q'i tjawlen tb'incha'n jun nin kynimaqkawil aj Israel.

12Ex kyma qa okkyq'o'n ojtxi' kyyajilb'en ttx'u'jil Dyos te toj kya'j, ex a Dyos kub'q'o'nkye toj tq'ob'u' nimaqkawil Nab'ukodonosor toj B'ab'ilon, aj kaldeytoq, ju' kub' xitunteju' ja te k'u'lb'il lu, ex eb'ax tiq'i'n tzmax B'ab'ilon.

13Yajxi'tzuntel, tchaq' Siro, toju' tnejel ab'q'i nkawin toj B'ab'ilon, tu'n tjaw b'inchet jumajtlju' tja Dyos.

14Ex kymatl qeye' qa eb'je'tz tiq'i'n nimaqkawil Siro aq'unb'il q'anpwaq ex saqpwaqqe' toju' ja te k'u'lb'il toj B'ab'ilon, ju' eb'je'tz tiq'i'n Nab'ukodonosor toju' tja Dyos toj Jerusalen ex b'aj pon tiq'i'n toju' ja te k'u'lb'il B'ab'ilon, exqa e'xitq'o'n te Sesb'asar, ju' ojetoq tz'oktq'o'n te kawil.

15Tchaq' Siro te Sesb'asar tu'n kytzaj tiq'i'nju' aq'unb'il lu ex tu'n kyul tq'o'n jumajtl toju' tja Dyos toj Jerusalen, ex tu'n tjaw tb'incha'n jumajtlju' tja Dyos.

16Tetzunj tul Sesb'asar ex eku'x tq'o'n tq'uqlilju' tja Dyos toj Jerusalen; atxi'xtzu'n tzyet tjaw b'inchet jumajtlu' tja Dyos, ex na'mx tb'ent ja'lo, chechij qeye'.

17Atzu'n ja'lo, qama kub' toj twitza nimaqkawil, inxiqqani'ne' tu'n tjyontz kyoju' k'ub'l tu'j nimaqkawil toj B'ab'ilon, ex tu'n tka'yit qa ax qa tchaq' nimaqkawil Siro tu'n tjaw b'inchet jumajtlju' tja Dyos toj Jerusalen, ex tu'n ttzaj tma'na t-xima nimaqkawil tib'aj ja'lu, chiju' xikytz'ib'a'n.