1Tzaj yolin Qman Dyos weye', tma:
2Jumaj ate'toq kab'e' qya junx kytxu.
3Xikyq'o'nkyib' toj ajpaji'n atxi'x tzmatoq txinqe'; xikyq'a' tzyu' kyimi'ẍ toj Ejipt ex kub' naju' kyqpojil.
4Oola tb'iju' tzikb'aj (a ntyek'u'nju' Samarya), atzu'n titz'in Oolib'a tb'i (a ntyek'u'nju' Jerusalen). E'tzaj wiq'i'ne' te nxu'jile', e'ul nk'wale' ex nmyale' kyuk'i'l.
5Myab'a'n sela' Oola weye' ex matz'ok laqj kyi'ju' tichan, aye' q'ojil aj Sirya,
6tb'anil kyxb'alun morad ka'yin, kykyaqil nejenelqe' ex kawilqe', tb'anil ku'xunqe', chejilqe' ate'kx kyi'j chej,
7¡Sk'o'nqe'xi'x kyxol aj Sirya! xitq'o'ntib' Oola toj ajpaji'n kyuk'i'l, majxpe' oklaqj kyi'j kykyaqilju' kywitzleb' ex ku'tz toju' toklen tu'n tk'ulun kye.
8Ok te jun ajpajil atxi'x tej tten Ejipt, ex mixti'x kyej tu'n. Nim eb'ajkub' kẍe tuk'i'l atxi'x txinxtoq ex elkyiq'i'n tqpojil, soktzuntz te qya ajpajil.
9Qu'mtzun xinq'o'ne' toj kyq'ob' aj Sirya ju' tyaẍ, jamatxi'toq tz'oklaqja',
10ex e'kub' kẍe tuk'i'l; eb'je'ltzun xk'ayu'n tal, ichan ex qya, atzunte kub' kyb'yo'n tu'n k'uẍtx'e'nb'il, ikytzu'n tz'e'yseta' twitz. Ex mab'aj yoli'n ja'lu kyxol qya.
11Tka'yi Oolib'a ju' titz'in ja'lu, extzun xi'pe' t-xonxi'xtltib' kyetwitzju' ttzik toju' ajpaji'n.
12Ex ikxte oklaqj kyi'ju' aj Sirya, kykyaqilx nejenelqe' ex kawilqe', aj q'ojilqe', tb'anilqe' toj kyxb'alun, chejilqe', iqa'nqe' kyu'n chej, tb'anilxi'x ku'xunqe'.
13Elnnik'e' qa ikxte matxi'toq ttz'ilsatib', ex matxitoq txitb'incha'n kse'nte' ttzik.
14-15Xipe' tq'o'nxi'xtltetib' toj tajpaji'n: e'tilju' kyilb'ilal aj B'ab'ilon b'incha'nqe'k twitz tapi ex u'ksa'nqe' tu'n kyeq; kykyaqil tajb'el tnam che ka'yin, tu'n kyok xjal toj xjel kyu'n tu'n jitz'b'il kyk'u'j ex tu'n jitz'b'il kywi'.
16Tej kyoktka'yi'n aj B'ab'ilon lu, oklaqj kyi'j ex exi' tchq'o'n t-sanjelal B'ab'ilon.
17Eb'ju'ltzu'n aj B'ab'ilon ex eb'ajkub' kẍe tuk'i'l ex kub' kyyaju'n, kytz'ilsa toj ajpaji'n. B'aj kytz'ilsa'n b'a'nxi'x ex tzaj molmon tk'u'j kye.
18Xitq'o'ntzun tib'tz toj ajpaji'n tojxi'x q'ancha'l, xityek'u'ntib' ẍb'iqli, majx ntzaj molmone' te kse'n ntzaj molmone' te ttzik.
19Extzun txitq'o'nxi'xtltib' toj ajpaji'n, ntzaj tna'nju' tq'ijlalil tej txintoq, tej tajpaji'n toj Ejipt
20ex okb'aj kyi'j aj Ejipt ju' tyaẍ, ikyqe'toqju' kse'nqe' b'anchej ex b'ur toju' kyajpaji'n.
21Oolib'a, tzaj tna'nju'ya tej txintoqa, intoq che xb'iyunjtz timi'ẍa kyu'n aj Ejipt.
22Qu'mtzun inma'e' ayine' Dyos Manb'aj: Knb'incha'ye' tu'n kyok miltz'uju' tyaẍa te tajq'oja, aye' ntzaj molmon tk'u'j kye ja'lo. Che tzajel nq'o'ne' toj tkyaqil plaj ti'ja,
23e'aj B'ab'ilon ex kaldey, e'aj Pekod, aj Soa ex aj Koa, ex kykyaqilju' aj Asirya; kykyaqil ja'lu ku'xunqe' ex tb'anilqe', nejenel ex kawilqe', ajb'el ex q'ojilqe', kykyaqil chejilqe'.
24Che b'ju'l ti'ja, kyuk'i'l txqan karwaj ex txqan xjal te q'oj; kb'ajex kytxoli'n kyib' ti'ja toj tkyaqil plaj iq'i'mile kyq'ojb'il, tojx toj kywi' ex q'i'n kykolb'il, kxe'l nq'o'ne' anb'il kye tu'n toka toj xjel kyu'n kse'nxju' kykawb'il.
25Ktzajel nb'ajsa'ne' ntx'u'jile' tib'aja, ex che q'ojil ti'ja tuk'i'l kytx'u'jil; k'elel kyjonju' ttxa'na exqe' t-ẍkyina, aye'tzu'n che kjel anq'in che kb'el kyb'yo'n tu'n k'uẍtx'e'nb'il. Che b'ajex kyiq'i'n tala ichan ex qya, kb'ajel tz'e'ysa'na tu'n q'aq'.
26Che b'je'lel kyiq'i'n t-xb'aluna ex che b'ajex kyiq'i'n tachb'ila.
27Iktzu'n kb'ajela' ttxa'n tzaqpib'ltib'a exju' tajpaji'na jaxa' tq'o'na'tib'a toj Ejipt, lay che tiljumajtla aj Ejipt ex lay che tzaj tna'ntla.
28Atzunwe' nxinma'n, ayine' Dyos Manb'aj: Kxel nq'o'na toj kyq'ob'ju' nimaqtnam nche eltik'o'na, ex kyeju' ntzaj molmona kye.
29K'elel ik'o'na kyu'n, kb'elkyetza'nju' matxi' tkanb'aya tu'n taq'unb'ena ex majx kjel ẍb'iqb'a'na kyu'n; kjel q'ancha'lixju' t-xmilala xitq'o'na toj ajpaji'n. Tu'ntpaju' tzaqpi'n tib'a exju' tajpaji'na
30nnik'a'ya toj ja'lo, qu'n xitq'o'ntib'a toj ajpaji'n kyuk'i'l nimaqtnam lu ex ku'tza toju' toklena tu'n tpaj k'uluna kye kywitzleb'.
31Xi' xa' lpeya toj tqanb'en ttzika; qu'mtzun ax k'wab'ju' kxe'l nq'o'ne' teya axju' xinq'o'ne' te ttzika.
32Awe' inma'n, ayine' Dyos Manb'aj:
Axtzu' kk'wala'ya tiju' tk'wab'l ttzika,
jun k'wab'l nimin, nimtoj ex nim t-xe,
nojni tu'n xmayi'n ex ik'b'il,
33nojni tu'n tx'uyb'il ex xitb'il
Ktx'ojtela ex kch'yol toj twinqila
tu'n tk'wab'l Samarya ju' ttzika.
34Kxel tk'wa'na tzmaxi'j ajtb'aj,
kb'el tb'uchi'ntzuntza
ex che b'ajel txluch'i'na timi'ẍa.
Ayine' Dyos Manb'aj matxi' chin yolin;
matxi' txinma'ne'.
35Qu'mtzun inma'ne', ayine' Dyos Manb'aj; Matxina' tzik'nna'le' tu'na ex matzaj tmiltz'u'n ttze'lti'ja weye', ktz'e'ysetel twitza tu'n tpaj tzaqpi'ntib'a toj tajpaji'na, chi Dyos.
36Tzaj tma'n Qman Dyos weye':
Tzunta ichan, ¿Ma kxe'l tma'na tz'e'ysb'il kywitz Oola ex Oolib'a? Majxna' pejunxa kyb'inchb'aj taq'wixi'x kyplajku'.
37Min xkub' kyk'u'nkyib' nwitze' ex b'ajni txa'j kyq'ob' toj chik'. Myab'a'n xkyb'incha weye', nche k'ulun kye kywitzleb' ex mache kub'kytz'eysa'n kyal te chojb'il kywitz, aye' nk'wale' e'itz'ji kyuk'i'l.
38Ma'xi'xpe' kyb'inchatlju'lu weye': toj jun q'ijx kub' kytxa'ju'n njaye' xjan ex min ẍekynimaju' q'ij te ojlab'l weye'.
39Ex ax q'iju' tej kykub' kyq'o'n kyal te chojb'il ninb'ilkye kywitzleb', e'ul toju' njaye' xjan ex kub' kytxa'ju'n ¡Atzun matxi' kyb'inchaju' tojku' njaye'!
40Exi' kychq'o'n kysanjel txkolkye ichan te najchaq, ex e'ul. Kykab'ilx eb'aj ichin, b'aj kyuk'tza'n kywitz ex eb'jo'k kyq'o'n kyachb'il tu'n kyex k'molkye;
41E'kub' qe tib'aj jun tb'anil kuẍb'il, ex jun mes tkub'iletl wab'j tib'aj, tib'ajtzu'n mes lu kub'a' kyq'o'n sturak exju' aseyt elni pa'n tu'n tajb'en weye'.
42Intoq che b'injtz txqan xjal ntoq che ẍch'in intoq che ik'san q'ij; ichanqe' eb'ajtzaj toj chq'ajlaj, intoq che okkyq'o'n kyachb'ilju' qya, nche okkyq'o'n xb'alun kyi'j kyq'ob' ex e'tb'anil koron toj kywi'.
43Intoqtzun kub' nxima'ne': oktzun che ajb'elkye' qya ajpajilqe' lu ja'lo kyu'n. ¡Aye'na' ate'ju' kyuk'i'l!
44Che ul kyk'etz Oola ex Oolib'a, aye' qya tzaqpi'nkyib', kse'n nxi' jun ichan kyxol qya ajpajilqe', nchije'.
45Aye'tzu'n ichan tnik'alkyi'j che kb'el q'onte tz'e'ysb'il kywitzju' qya ajpajil ex b'yol xjalqe' lu. Qu'n ajpajilqe', ex b'ajni txa'j kyq'ob' toj chik', chi Dyos.
46A ntma'n Qman Dyos ja'lu:
Kyb'u'yiku'kyib' tnamj kyi'j, tu'n kyb'aj xob' ex tu'n kykub' elq'a'n;
47tu'n kykub'yo'n tu'n tkyaqilju' tnam toj ab'j ex tu'n kyb'aj xyu'n tu'n k'uẍtx'e'nb'il; tu'n kykub' kyb'yo'n kyal ichan ex qya, ex tu'n kykub' tz'e'ysa'n kyja.
48Kb'el nnajsa'ne' che anq'in xjal ch'ixb'ilx lu toju' tx'otx'. Kykyaqiltzu'n qya k'elel junkynab'l ti'ju' xnaq'tzb'il lu ex lay che'x lpe ti'ju' kyb'inchb'en myab'a'n.
49Kb'el tz'e'ysa'n kywitzju' kab'e' qya lu tu'n tpaju' nkyb'incha'n myab'a'n exju' kyil tu'n witzleb'i'n. K'eleltzun kynik'tze' qa ayine' Dyos Manb'aj, chi Dyos.
Who We AreWhat We EelieveWhat We Do
2025 by iamachristian.org,Inc All rights reserved.
