Sal 74 - Mam Ostuncalco Bible

Na'j Dyos qanb'il tzaqpib'lteju' tnam

1Nman Dyos,

¿Titiqu'n xqokyej tkolb'e'na tejumajx?

¿Titiqu'n saja' ttx'u'jila

kyi'ju' rit toj tch'laja?

2Na'ntzju'ya ttanama,

ju' jawni t-sk'o'na ojtxi',

ex klet tu'na tu'n tok te ttanama;

na'ntzju'ya witz Syon, ja matxi' najana'ya.

3Kutzaja ka'yilteju' tnam majx kub'ni xitu'n;

¡oktenju' ajq'oj xitulte tkyaqilju' tjaya xjan!

4Inche b'itzanju' tajq'oja tu'n ẍekanb'an ti'ju' tjaya xjan;

¡matxi' kub' kyq'o'n kyb'ander te juntl tnam

5tib'aju' ttzija, janche okxa' xjal!

Naku'j si'wilqe' kyxol tze toj k'ul q'ajin,

6eb'jo'kten pa'lkye tilb'ilal toj tjaya

tu'n k'uxb'il te si'wb'il ex tu'n pojb'il

7Okkyq'o'n tq'aq'alju' tjaya xjan;

¡naku'j mixti'x toklen,

kub' kytx'u'yi'n twitz tx'otx'!

8Kyma tu'n qkub' kyxitu'ne' qkyaqile';

¡eb'jo'kten xitulkyeju' ja te k'u'lb'il toj tnam

ja nqb'u'yi'natoq qib'e' tu'n qk'ulune' teya!

9Mixti' nche qka'yintlju'ye' techlal xjan;

mixti' juntl t-sanjela xkyej,

expe' min b'i'n qu'ne' jtoj we' ttxa'njalu.

10Nman Dyos,

¿ma kukxtzun kyajun ajq'oju' qi'je'?

¿Ma kukxtzun tu'n kyolil taq'wixju' ti'ja?

11¿Tiqu'n nxa' tewa'nju'ya tipumal tq'ob'a?

¿Tiqu'n nkyeja' tchle'n tq'ob'a ttzitk'u'ja?

12Atxi'x ojtxi' aya nninaqkawile'.

Nimxi' kanb'ab'l matxi' kub'ti'n tu'na, Nman Dyos

tza'lu twitz tx'otx':

13kub' taq'pu'nju'ya ninnjab' tu'n tipumala,

kub' tpa'na kywi'ju' nimaqtxkup toj ninnjab',

14b'ajkub' tpch'u'na twi'ju' nin txkup Leb'yatan

ex xitq'o'na te kychi' txkup toj chq'ajlaj.

15Eb'jatz poq'chaj a' ex eb'et nin a' tu'na,

ex e'kub' ttzqijsa'nju'ya nin a' min nche kub' tzqij.

16Te teya q'ij exju' qonik'an;

aya b'inchante xjaw exju' q'ij;

17aya kyej q'onte techelju' b'ajsb'il ttxa'n tx'otx';

kyej tnk'u'na q'ijal tuk'i'lju' jb'alil.

18Na'nku'ya Nman Dyos, nnok ik'le'na tu'n ajq'oj,

exqe' xjal mixti' kynab'l nche yolin taq'wix ti'ja.

19¡Lalun tzik'xi'x qna'le' tu'na!

Mixti'x qipumale' kse'nqe' paloms b'o's kyyajil;

¡lalun qo'x tq'o'na kyeju' tojk'ul txkup!

20¡Na'ntzju'ya tyola kyej b'entti'j tu'na,

qu'n nojniju' tnam tu'n taq'wixil

expe' toj tkyaqil twitz tx'otx'!

21Lalun taja tu'n tkub' me'sa'nju' xjal nyajunjtz;

¡b'inchama tu'n tjaw nima'na tu'n prow ex tu'n me's!

22¡Iq'i'nktz tib'a Nman Dyos! ¡B'inchama tkawb'ila!

¡Na'ntza nche oktenju' xnak q'ol ttx'u'jila kukxju'!

23Lalun tzik'tna'l tq'ojq'ojel kywi' tajq'oja tu'na,

ex inxi'x che ẍch'inju' min nche okslan teya. Chiju' b'itzal.