Dn CHIK'B'AB'L - Mam Ostuncalco Bible
CHIK'B'AB'LAju' tuj Danyel kub' tz'ib'a'n toju' tq'ijlalil tej intoq che yajti aj Juda ex tej intoq che kub' jtz'o'n toju' tnam B'ab'ilon. Toktoq Danyel kuwsalkye t-xjalil toj kyokslab'l tu'nju' ntzaj tyek'u'n Dyos te ex tu'nju' tyol Dyos tu'ntzun tokqe kyk'u'j ti'j Dyos ex tu'ntoq tik'xju' yajte'n kyu'n. Toktoq Danyel q'uqb'alte kyk'u'j ex intoq xitma'n kye qa kpomel jun tq'ijlalil che klonjtzel tu'n Dyos toj kyq'ob'ju' nche yajlankye, ex k'anjetztoq kyi'j toju' kytanam tu'n lay che yajtitl. Aju' u'j lu atzu' kub' tz'ib'a'na' toj tnam B'ab'ilon toj tq'ijlalil nimaqkawil Nab'ukodonosor. Atzu' nyolina' u'j kyi'ju' jte' ku'xun aj Juda, aye' kykuwsa kyib' tu'n kyniman te Qman Dyos ex mixti' ek'ulun teju' witzileb'. Maskye nim ti'xti' eb'jik'a', aye' ku'xun lu e'niman te Qman Dyos tojx kyokslab'l ex kywitz kyxjalil.Aju' tuj Danyel aq'pu'n toj kab'e': Aju' tnejel nyolin ti'ju' tchwinqlal Danyel exqe'ju' tuk'i'l, ex nyolin kyi'j tej kykuwsante kyib' twitzju' nimaqkawil, ex min ek'ulun teju' kywitzleb' (Caps. 1-6). Atzunju' tkab' nyolin kyi'ju' oxe' ti'xti' tzaj yek'u'n te Danyel, kyuk'i'l txqan techlal, nyolin ti'ju' ninb'ilkyib' txqan nimaqtnam ex tej kyb'aj kub' tz'aq, tzajx ti'j B'ab'ilon. Ex qa che kb'el tz'aqju' nimaqtnam ate'qe'k yajulkye ttanam Dyos, exqa aye' ttanam Dyos che kanb'al kyib'aj (Caps. 7-12).
