Is 3 - Mam Ostuncalco Bible

Tz'e'ysb'il kywitz aj Juda ex aj Jerusalen

1¡Kyb'intz pekye'! Che eleltiq'i'n Qman Dyos nimtipumal

kykyaqilju' nche q'onte tkyaqil kye aj Jerusalen ex aj Juda

ex tkyaqilju' kywa ex kychewa.

2Kb'el naju' kuw xjal exju' q'ojil tu'n,

e'ajkawil ex sanjelal, e'ajna ex tijwnaq,

3e'nejenel ex nimaqxjal, e'q'olnab'l, e'ajpkab' ex ajk'a,

4ex k'walqe' che okyel tq'o'n te kynejel;

tal q'aqe' che kawil kyib'aj.

5Iktzun kb'ajelju' toju' tnam,

che q'ojil jun ti'j juntl, expe' kyxol kamiw kyib'.

Che q'ojilju' ku'xun kyi'j tijwnaq,

ex che q'ojil prow kyi'ju' q'inun.

6Okpe' kxe'l tma'n jun k'walb'aj te ttzik mo titz'in toj tja tman

kjalu: Atipenata ti'j tu'n toktq'o'na;

toka te qnejile'; kawina kyib'aju' txqan ttx'aq'a'n ja lu, chiku'.

7Atzu'n juntl kxel ttzaq'we'n:

Lay b'ent kyxi' woni'ne' ti'ju' taq'wix saj lu,

mixpeti'we' nwa nja ex wi'je' tu'n tokset.

Lalun chin okkyq'o'ne' te nejenel toju' tnam, chiku'.

8Axxi'x matxi' kub'te' Jerusalen,

makyej xitju' Juda,

qu'n nche q'manjtz ex nche b'inchanjtz taq'wix twitz Qman Dyos atzu',

tu'ntzu'n noka' kyq'o'n ttx'u'jil Qman Dyos.

9Axpe'na' kyb'inchb'en poqilkye;

layx b'ent tewitju' kyil;

junqe'x kse'n tnam Sodom, majx nxikypakb'ankyib' kye xjal.

¡Layqe'xwit, aye'x nche tzaj q'inte tq'ob' tze toj kywi'!

10K'i'wla'nte' tnik'alti'j, qu'n b'a'n kxe'la

ex ktnik'b'e' taq'unb'en.

11¡Malayxwitju' b'inchal myab'a'n, mixyab'a'n kxe'la'!

Kb'el ttz'e'ysa'n Qman Dyos twitz tu'n tpaju' tb'inchb'en.

12K'walte' nimaqkawil nyajun tib'aj ntaname' ja'lo;

toj kyq'ob' qya ta'ju' kawb'il ja'lo.

Inkub' sb'u'na' kyu'n tnejenela ntanam,

toj junxi'tl b'e nxa' q'i'na kyu'n.

13B'incha'ntltib' Qman Dyos tu'n t-xjelun,

ex tu'n t-xitljo'n ttxolil kawb'il ti'ju' ttanam.

14Che ttxka' Qman Dyos tijwnaq

exqe' nejenel toju' tnam, tu'n kyok toj xjel kjalu:

Mab'aj kyaju'ne' tqan wawale';

mab'je'l kyalq'a'ne' ati kye prow,

ex mab'ajx kyk'u'ne' kyeleq'e' kyjaye'.

15¿Ti'tzu'n kyoklene' tu'nju' nche oktene' yajulkye ntaname'

ex nche kub' kywab'e'ne' prowqe'?

Chi Qman Dyos nimtipumal.

Tz'e'ysb'il kywitzju' qya aj Jerusalen

16Ikx tma Qman Dyos:

Aye' qya aj Jerusalen, inxi'x kynima'n kyib',

nkyb'aq'la'n ti'jkywi' ajkyb'et,

elsal ch'xawqe'

b'o'schaq txol kyqan nche b'et naku'j nche b'ixin,

inxi'x che chilub'ti u'wj ti'j kyqan,

17kb'eletz nq'uli'ne' kywi' te tz'e'ysb'il kywitz

ex majx k'elil kych'ixaw, chi Dyos.

18Toju' Q'ij lu,

kb'je'lel tiq'i'n Qman Dyos tkyaqill u'wj,

nb'jo'k ti'j qanb'aj ex tzuyb'il wi'yj,

19e'tojẍkyinb'aj, tqulq'ob'aj, su'tj txayl towi'yb'aj.

20k'alb'il wib'aj, tal xpatx'k'uxb'il ti'j qanb'aj,

pasj, k'ok'sb'il, kolb'il qanb'aj,

21e'xmilq'ob'aj, ex u'wj nche ok ti'j txa'nb'aj,

22e'tb'anil xb'alun, xb'alun te xmuj, ẍa'y exqe' tq'ob'pa,

23e'ka'yb'il witzb'aj,

tb'anil xb'alun, si'pj.

24Tzu'wil ktenb'el t-xel k'ok'sb'il,

aqwil te t-xel pasj,

sk'o'j wi'yj te t-xel xyeb'i'n wi'yj,

tx'a'y xb'alun te t-xel tz'umin xb'alun,

jun sleq'ub' te t-xel tb'anil ka'yin.

25Aye' t-xjala che kb'el b'yo'n,

che kyimelju' t-xjala te q'oj toj q'oj.

26Kjawil oq'e'n toju' nintnam ex che b'jo'kyel xb'alun jochin,

ex majx kjel kolb'i'n.