Ec 7 - Mam Ostuncalco Bible

Aju' nimxi'x toklen tu'n t-xib'inchet

1Ate b'a'nju' b'a'n qyolinjtz

kyetwitz tb'anil k'ok'sb'il.

Ate q'iju' b'a'n aj qkyim

kyetwitzju' q'ij aj qitz'ji.

2Ate b'a'nju' tu'n qxi' muqul

kyetwitz tu'n qxi' tzalajeb'el;

kykyaqil nakye' xjal nche kyim,

na'nwtlote' tu'n kyk'u'ju' itz'qe'.

3A b'a'nju' tu'n qoq' kyetwitz tu'n qtze'n,

b'a'ntzun myab'a'n tka'yinku' qwitz

atzu'n te qanmi b'a'n nnela'.

4Inximante' xjal ati tnab'l ti'ju' kamik,

atzu'n xjal mixti' tnab'l o'kxtzu' nximana' tu'n txi' tzalajeb'el.

5Ate b'a'nju' tu'n txiqb'i'n tzak'b'il kyu'n ati kynab'l

kyetwitz tu'n qjaw nima'n kyu'n xjal mixti' kynab'l.

6Ikytq'ojq'ojel kytze' xjalju' mixti' kynab'l

kse'n ch'i'x nspoq'ob'ti toj q'aq',

ex ikx mixti'x ttx'o'lajil ja'lu.

7In okju' q'oj te takpuje'n teju' xjal ati tnab'l,

ex tu'nju' pwaq nk'met ti'j myab'a'n nkub'a' b'o'lju' tchwinqlal.

8Ate b'a'nju' tu'n tpon b'aj ttxa'n jun qaq'un

kyetwitz tu'n ttzyet.

Ate b'a'nju' ati qpasens

kyetwitz nqnima'n qib'.

9Lalun naq tx'u'jina, qu'n ate xjalju' mixti' tnab'l naq ntx'u'jin.

10Lalun t-xjelu'ya tiqu'n majx b'a'nju' tq'ijlalil ojtxi' kyetwitz ja'lo, mya tuk'i'l nab'lte' xjel lu.

11Tb'anilxi'xte' ojtzqib'l ex nim tajb'en kyeju' nche anq'in twitz tx'otx', qa mujli tuk'i'l jun etzb'il.

12Qu'n inqotklo'n nab'l kse'n pwaq, naqtzun ate' nab'l atixi'x tajb'en qu'n ntq'o'n tchwinqlalju' xjal ati tnab'l.

13Ximanxpe'ju'ya taq'un Qman Dyos matxi' tb'incha: ¿alxi'xkye jun kb'antel tz'anjtz tz'umante ti'ju' kyejni tch'okyi'n?

14Qa b'a'n tela, tzalajxa toju' b'a'n lu; qatzun myab'a'n tela, ximanku'ya qa tu'nile Dyos tkyaqilju' tu'me'l lu, ex min b'i'n tu'nte' xjal titi' tzul ti'j yajxi'tel.

15Tkyaqil ja'lu matxi' wile' toju' tq'ijlalil nchwinqlale', naqxtojqwitz nnok: inche kyimju' b'a'n xjal extzun b'a'n wnaqqe', ate'tzuntl xjal myab'a'n kyb'inchb'aj nche anq'in nimtoj.

16Lalun tz'oka b'a'nxjalile,

ex lalun tyek'uxi'x tnab'la.

¡Titi' ktyaju'ya'xi'x tib'a!

17Lalun tz'oka txkupxi'x,

ex lalun naq tyo'ka.

¡Qu'n jaku' tz'el tchwinqlala lwiy!

18Ate b'a'n tu'n qtzyunte ja'lu b'a'nxi'x

ex mixti' tu'n txi' qtzaqpi'nju' juntl.

Alkyete nniman te Qman Dyos

k'elel b'a'n toj tkyaqil ja'lu.

19Nimxi'x tipumalju' ati tnab'l tu'n nab'l,

kyekywitz lajoj kawil toju' nintnam.

20Mixna' a'lo'te jun xjal twitz tx'otx' majxwit tz'aqli, o'kxwitju' b'a'n ntb'incha'n exwit min nb'inchan il.

21Lalun txitoksla'na tkyaqilju' nq'umli, laytzun tb'i'tza aj tyolinju' tmajina taq'wix ti'ja.

22Expena' ikxta, kanlixi'x twitza, b'a'npun majxi' yolina kyi'j txqantl.

Tjyonjtzju' nab'l

23Ik'nwitze' ti'j tkyaqil ja'lu tuk'i'l nab'l, qu'n kub' nq'o'ne' toj wanmiye' tu'n woke' atixi'x nnab'le'; mixtzunti'x npon kanune' ti'j.

24¡Mixti'x nchinpon kanune' kyi'j tkyaqilju' ati! Nimxi'xte' t-xilen. ¿Alxi'xkye kpomel kanun ti'j?

25Oktililtzuntz wu'ne' tu'n tten wojtzqib'le', ex nxnaq'tza wib'e' tu'n tel yalju' nab'l wu'ne'. Eltzun nnik'tze' ti'j qa myab'a'nte' xnakyil, ex tontilte' xtrakyil.

26Matxi' tz'el yal jun ti'xti' wu'ne' kuwxi'x tk'ayil kyetwitz kamik: aju' qya chab'axi'x nkub' twitz ichan tu'n ex nkuttz'u'li'n kyu'n tq'ob'. Alkye nniman te Qman Dyos ktzopajel toj tq'ob', atzu'n aj il kb'eltz'aq toju' t-xpatxab'.

27Tej soktilil wu'ne' tu'n tjyet chik'b'ab'l titiqu'n nb'aja' junjun ti'xti', ayine' pakb'al, el nniky'e' ti'j ikjalu:

28¡na'mx tknetju' injyo'ne'! naq junku' ichan matxi' tz'el yal wu'ne' kyxol kab'k'al lajnaq (1,000), atzun mixti'x jun qya kyxol kykyaqil.

29O'kxte matxi' tz'el yalju' wu'ne': tz'aqlite' ichan kub' tb'incha'n Qman Dyos, axtzunte nkub' b'o'ljsantetib'.