Ec 4 - Mam Ostuncalco Bible

1Inximatzuntze' ti'ju' yajb'il nb'inchanjtz twitz tx'otx'. E'wilju'ye' xjal nche yajlanjtz intoq che oq' ex mix-a'lo' nq'uqb'ante kyk'u'j; inxi'xtoq che yajlanjtz kyu'nju' yajlalkye ex mix-a'lo' nklonkye.

2Qu'mtzun elnnik'e' ti'j qa tzalajb'ilxi'x kyeju' oje che kyim kyekywitzju' itz'qe'x;

3b'a'nxi'xpena' ta'qe'ju' namx kyitz'ji kyekywitzju' kab'e' tnej lu, qu'n na'mx tik' kywitz ti'ju' il nb'inchanjtz twitzju' tx'otx'.

4Ex matz'el nnik'e' ti'j, qa nnoktilil tu'n qaq'unan exqa b'a'n inela'ju' qaq'un, njaw tx'a'lti'j tk'u'j jun xjal ti'j juntl tu'n tpaj, ex ikxjalu mixti'x ttx'o'lajil, ikxu' kse'n qajb'il tu'n qxi' knolte kyq'iq'.

5Inkyma'n xjal kjalu: Naq chle'n tq'ob'ju' xjal mixti' tnab'l ex ax nkub' tb'o'ljsa'n tib', chechij.

6Atzu'n nchiwe': Ate b'a'n naq jun jtoj tuk'i'l ojlab'l kyetwitz kab'e' jtoj nim sikte'n ti'j, naqx tu'n qxi' knolte kyq'iq'.

7Tej txi' nmiltz'u'n nwitze' toj jun plajtl, wile' juntl ti'xti' mixti'x ttx'o'lajil twitzju' tx'otx':

8jun xjal naq tjunal, mixti'qe' tamiw, mixti' tk'wal, mixti'qe' titz'in, ex mixti'x nnojlan ch'i'n ex miẍti'x nqjen tu'n tchmon tq'inumal, ex mixti' nkub'ten ximalte alqe nnaq'unana' ex tiqu'n nkub'a' t-xk'a'yina'tib' ti'ju' ati te. Ex mixti'x ttx'o'lajil ja'lu ex jun iqtz alxi'x.

Nten qipumal qa mujli qten

9Ate b'a'nju' kab'e' qb'aj kyetwitz qjunal, qu'n inka'yin ch'i'ntl twitzju' qaq'unb'en.

10Qatzun makub' tz'aq junkye, aju' juntl kjawil wab'ante. ¡Atzu'n xjal tjunal, qab'anx twitz qu'n qama kub' tz'aq, mix-a'lo' kajwil wab'ante!

11Expe' qama che ktan kab'e' junx, che maq'tel kykab'ilx; qatzun naq jun, ¡lay maq'ti!

12Qa naq tjunal jun ati lwiy kb'elti'j, qatzun kab'e' kyb'aj lay kub'kyi'j. Expe' ky'jaj te oxe' twitz lay laqnaj.

Mya o'kxtzu' ta'te' nab'l tuk'i'lju' matxi' tzaj tab'q'i

13Toj juntl tu'me'l, ate nim toklenju' ku'xun prow ati tnab'l kyetwitzju' nimaqkawil matxi' tijin ex mixti' tnab'l, qu'n min ntk'mo'ntl nab'l.

14-15Maskyepe' akxtoq tetzju' ku'xun toj kars ajtok te t-xelju' nimaqkawil matxi' tzaj twinqil, mujqa toj prowil setza' xpon toj kawb'il, matxi' tz'el nniky'e' kyi'ju' xjal nche onin tuk'i'l.

16Ex b'a'nqa tnamju' xjal jakkawila', lay che tzalaj ti'j, exqe' kyyajajil che ul yajxi'tel. Ex mixti'x ttx'o'lajil ja'lu, ikxi'xte' kse'n qajb'il tu'n qxi' knolte kyq'iq'.