Lv 19 - Mam Ostuncalco Bible

Kawb'il tib'aj xjanb'il ex tnik'alilti'j

1-2Tzaj tma'n Qman Dyos te Moyses tu'n t-xitma'n kye aj Israel kjalu:

Kyxjansam kyib'e', qu'n xjan qinwe', ayine' Dyos Manb'aj.

3Teyle junjunkye' che nimane' te kymane' ex te kytxuye'.

Ex kynimanku'ye' q'ij te ojlab'l. Qu'n ayine' Dyos Manb'aj nchin q'mante.

4Lalun che'xe' k'ulul te witzleb', ex lalun kub' kyb'incha'n kydyose' k'uxb'il ttx'otx'al, qu'n ayinwe' Dyos Manb'aj.

5Ajtkub' kyq'o'ne' chojb'il te b'inchjtib'il nwitze' ayine' Dyos Manb'aj, kyb'inchame' b'a'nxi'x tu'n nk'monteye'.

6Ati tu'n t-xi' ch'yetju' alu'mj ax q'iju' ajtkub' kyq'o'ne', ex b'a'n t-xi' ch'yet toj tkab' q'ij, qatzun makyej ch'i'ntl te toxi'n q'ij, ati tu'n tkub' tz'e'yset.

7Qatzun matxi kych'yo'ne' oyaj toj toxi'n q'ij, k'elel wik'o'ne' ex lay nk'ame';

8alkye matxi ch'yonte, kjelten il tib'aj ex k'elex iq'et kyxolju' ttanam tu'nju' makub' ttxa'ju'nju' xjansa'ntl nwitze'.

9Ajtpon tq'ijlalil tu'n tjaw twitz awal, lalun majx tek' b'jawju' twitz kyawale' toj kytx'otx'e' ex lalun che'xe' sakwilteju' triy xkyaj tz'aqi.

10Ex lalun che'xe' sakwilteju' ub'a toj tqanb'en ex lalun jawkysk'o'ne' naq inche kub' tz'aq; kyq'onkje' kyeju' prow ex kye najchaq xjal. Ayine' Dyos Manb'aj nchin q'mante.

11Lalun che elq'ane'. Lalun che chanyole' ex lalun b'ajkub' kysb'u'n kyib'e'.

12Lalun tz'ajb'enju' nb'iye' kyu'ne' tu'n ttziyet jun kyole' lay japun, qu'n naq ate'kye' txa'julteju' nb'iye'. Ayine' Dyos Manb'aj.

13Lalun che jaw tzaqpaje' ti'j kywnaqile' ex lalun tz'el kyiq'i'ne' ati te. Lalun txi' kychjo'ne' twitk'u'j aq'unal tojxi' juntl q'ij.

14Lalun che yoline' taq'wix ti'ju' xjal chkyin.

Lalun kub' kyq'o'n xpatxab'e' toj tb'eju' moẍ. Kyyek'ume' ninb'ilweye', qu'n ayine' Dyos Manb'aj.

15Lalun kub' kyq'o'ne' tz'e'ysb'il witzb'aj mya toj tnik'alilti'j: mya tu'nwtu' prow lay tz'e'yset twitz, ex mya tu'nwtu' nim toklen lay tz'e'yset twitz. Che lpekye' ti'ju' tnik'alilti'j ajtkub' tz'e'ysb'il kywitz xjal.

16Lalun che jk'un yole' kyxol kyxjalile'.

Lalun kyaq'kyib'e' tu'n tkub' b'yetju' kywnaqile'. Ayine' Dyos Manb'aj nchin q'mante.

17Lalun majx kux kyawa'n kyq'oje kyi'j kytzikye' toj kyanmiye'.

Kytzak'unxe' kywnaqile' qa ati til, tu'ntzun lalun che ele' junx tuk'i'l toju' til.

18Lalun kyaq' tu'me'l t-xele' ex lalun ku'x kyk'u'n kyq'oje kyi'j kywnaqile', kyk'u'jlame' kywnaqile' kse'nx aye'ye'. Ayine' Dyos Manb'aj nchin q'mante.

19Kyb'inchanqe'xe' nkawb'ile'.

Lalun kyaje' tu'n kyẍchanju' kywakyixe' tuk'i'l alkyexku' juntl txkup.

Lalun tz'ok kyawa'n b'a'npun tyajajil kyijaje' toj kyawb'ile'.

Lalun tz'ok kyq'o'n jun kyxb'alune' b'incha'n tu'n chukchaq q'in.

20Qa ati jun makub' kẍe tuk'i'l jun qya majin k'a'yi'n exqa tetoq juntl ichan, na'mxtoqtzun t-xi' lq'o'n ex na'mxtoq ttzaqpet, ati tu'n tchjonte te kykab'il, ex lay che kub' b'yet, qu'n mya tzaqpi'nju' qya lu.

21Ati tu'n ttzaj tiq'i'n ichan jun tman rit nwitze' te chojb'il tu'n tten b'a'n wuk'i'le', ati tu'n t-xi' tiq'i'n ttziju' Ja te Mujb'ab'ltib'il.

22Tu'ntzunju' tman rit lu te chojb'il tu'n tten b'a'n wuk'i'le', ktzajel tqani'n pale weye' tu'n tkub' najset tilu' ichan lu, ex kb'el nnajsa'ne' til xtb'incha.

23Ajkyokxe' toju' tx'otx', qa makux kyawa'ne' tze tqan lob'j, lalun tz'el kyt'uxi'n oxe' ab'q'iye' twitz te kylo'ye'.

24Atzu'n toj tkyaji'n ab'q'i kykyaqilju' twitz lob'j kxjansetel nwitze' toj jun ninq'ij,

25tojtzu'n tjwe'yi'n ab'q'i b'a'n kylo'nteye' kywitz. Kkyq'a'tzun kye tzetz kywitz. Ayine' Dyos Manb'aj nchin q'mante.

26Lalun txi' kych'yo'n chib'je' tuk'i'lxi' chik'.

Lalun che ajpkab'ine' ex lalun tz'ok kyq'o'n kyib'e' q'malte titi' tzul.

27Lalun tz'el kyjon kywi'ye' sewun, ex lalun tz'el kyjone' ttxa'n kyxmatziye'.

28Lalun tz'ok kyky'ixb'sa'n kyib'e' tu'n tpaj jun kyimni. Lalun tz'ok kyq'o'n tilb'ilale' ti'j kychib'jile'. Ayine' Dyos Manb'aj nchin q'mante.

29Lalun che'x kyq'o'ne' kymyale' toj ajpaji'n. Lalun kub' tzuwixju' tx'otx' kyu'ne' tu'n txqan il taq'wixi'x.

30Kynimanku'ye' q'ij te ojlab'l weye', tenx tchiylal njaye' xjan kyeye'. Ayine' Dyos Manb'aj.

31Lalun che'xe' jyol kyi'je' kyuk'i'l spritist ex ajpkab'. Lalun kytz'ilsa kyib'e' tu'nju' joyb'ilkyi'je'. Qu'n ayine' Dyos Manb'aj.

32Che q'olb'enqe'ye' ex che nimane' kye tijwnaq. Tenx nchiylale' kyeye'. Qu'n ayine' Dyos Manb'aj.

33Lalun kub' kyyaju'ne' najchaq xjal najli kyxole'.

34Kyq'onke' kse'n jun kywnaqile'; kyk'u'jlame', qu'n ikxju' kse'n aye'ye'. Expena' ikxkye' e'okye' te najchaq xjal toj Ejipt. Ayine' Dyos Manb'aj nchin q'mante.

35Lalun che sb'une' kyi'j echb'il tx'otx', peẍ ex juntl malb'il.

36Ati tu'n kyajb'en echb'il kyu'ne', e'peẍ ex juntl malb'il tz'aqliqe'. Qu'n Ayine' Dyos Manb'aj, inetz q'inkyeye' toj Ejipt.

37Qu'mtzun kyb'inchanqe'xe' nkawb'ile' ex nnuk'b'ile'; che japunx kyu'ne'. Ayine' Dyos Manb'aj, chi Qman Dyos.