Am 9 - Mam Ostuncalco Bible

Mix-a'lo' kkletil toju' tz'e'ysb'il witzb'aj tu'n Qman Dyos

1Wile' Qman Dyos atitoq tk'etzju' q'olb'eb'l, ex intoq tzaj tma'n weye':

Che tjuminka kywi' tqanju' ja tu'n ktzaj kolb'iju' tqul;

¡tu'ntzun ktzaj tilj toj kwi' xjal!

Qatzun ate'x junjun minti' ẍekyim, che kb'el nb'yo'ne' tu'n k'uẍtx'e'nb'il:

maskye mache kub' oq, mix-a'lo' jun kjel anq'in;

2b'a'n qama che kub' ewan t-xexi' tx'otx',

kche eletz wiq'i'ne' atzu';

b'a'n qama che japun twitz kya'j,

kche b'eletz wu'ne' atzu'.

3Qama che jax ewal twi'ju' witz Karmelo,

chin kxe'le' jyolkye atzu';

qama che kub' ewan nwitze' t-xexi' ninnjab',

kxe'l nchq'o'ne' nin txkup toj ninnjab' tu'n txi' tx'a'lkye;

4qama che'x iq'i'n toj juntl tnam kyu'nju' kyajq'oj,

kxe'l nxone' k'uẍtx'e'nb'il ex che kyimel tu'n.

¡Mache'xkye' toj myab'a'n kukxju' nwitze'!

5Ate Qman Dyos nimtipumal,

ajtok ttzyu'nju' tx'otx', majx nkub' niwj

ex nche oq'ju' xjal najlqe' twitz.

Aju' tx'otx' nch'iy ex nkub'

kse'n nin a' Nilo.

6Ate Qman Dyos b'inchante tnajb'il toj kya'j

ex a b'inchanteju' kya'j tib'aj tx'otx';

a ntzaj q'i'n a' toj ninnjab'

ex ntzaj tchto'n tib'aj tx'otx'.

A Qman Dyos, ex a tb'iju' lu.

7Lu ntma'n Qman Dyos kjalu:

Aj Israel, mixti' junwe' ch'exb'eb'l toj nwitz kxole' kyuk'i'lju' aj Etyopiy.

Kse'n e'tzaj wiq'i'ne' toj Ejipt,

ikxtzun e'tzaj wiq'i'ne' pilistey toj Kreta,

ex e'tzaj wiq'i'ne' aramey toj Kir.

8Intzaj tka'yi'n Qman Dyos nimaqkawb'il b'inchal il lu, ex ntma'n:

Kb'el nnajsa'ne' twitzju' tx'otx',

noqtzun o'kx lay kub' nb'ajsa'ne' tyajajil Jakob' tejumajx.

Ayine' Dyos Manb'aj nchin q'mante.

9Knchq'a'ye' tu'n kb'aj krib'i'n tyajajil Israel,

kse'n nb'aj krib'itju' triy toj krib',

ex mixti'te' jun twitz inwt kub' tz'aq twitz tx'otx'.

10Kykyaqilju' xjal b'inchal il toj ntaname'

che kyimel tu'n k'uẍtx'e'nb'il;

kykyaqilju' nche' q'mante: Mixti'te k'ik'el qi'j;

lay tzul kanunte' myab'a'n qi'j.

Kb'entel jumajtlju' tnam Israel kse'n tnejel

11Tzulju' q'ij tu'n tjaw nb'incha'n jumajtlju'ye' tja Dab'i kub'ni xitj. Kb'el njpu'ne' b'e janche okxa' xjal, kjawil nb'incha'n jumajtlju'ye' kub'ni xitj kse'nxju' tten ojtxi',

12tu'ntzun tokju' atix te Edom exju' tkyaqil atix teju' nintnam etza'n wu'ne', tu'n tokjumajtl te Israel. Matxi' tmate Qman Dyos tyol, ex kjapumel tu'n.

13Tzul tq'ijlalil, atixte' triy nb'uyit ajttzyet tkjetju' tx'otx', ex na'mxtoqpe' tb'aj yitz'etju' ta'l ub'a aj toknaj awetlju' triy. Kb'etilju' b'in kse'n a' kwi'ju' witz ex k'ul.

14Ktzajel wiq'i'ntzun ntanamtze' Israel ja exa' q'i'na'. Che jawil kyb'incha'n jumajtlu' nimaqtnam kub'niqe' xitj, ex che najal kyoj; k'okyel kyq'o'n kyawal ub'a, ex che k'wal ti'ju' ta'l, che okyel kyawa'n awal ex che wal kyi'j.

15Che b'elex wawa'ne' tojku'xi'x kytx'otx', ex milo najchi'j tu'n kyex q'i'ntl toju' tx'otx' xinq'o'ne' kye. Iku' chi Qman Dyos.