Sal 19 - Mam Ostuncalco Bible

Tajwalil Qman Dyos toju' tb'inchb'en

1Intma'n kya'j ninb'ilte Dyos;

aju' twitz kya'j nyek'unteju' taq'unb'en tq'ob'.

2Atl junjun q'ij nkyma'nju' tb'inchb'en Dyos;

exju' qonik'an nxitma'n tqanil te juntl qonik'an.

3Maskyepe' mixti' jun tqanil tu'n tyol

ex mixti' jun tq'ojq'ojel yol nb'injtz,

4atiju' tqanil toj tkyaqil twitz tx'otx',

tzmax toj mankb'il t-xe kya'j,

atzuntzu' kub'a' tq'o'n Dyos tkub'elu' q'ij.

5Ntzyet tb'ettzuntz kse'n jun ku'xun ajtmje,

kse'n jun xjal aj txi' ojqelanjeb'il,

6In jawu'lu' q'ij toj jun plaj kya'j

ex innex toj jun plajtl,

ex mix-a'lo' jun nb'ent tewan teju' ttantonil.

7Ttzinunalxi'xte' t-xnaq'tzb'il Qman Dyos,

qu'n intq'o'n ak'a'j chwinqlal.

Tnik'alti'jte' tchaq'b'il Qman Dyos,

qu'n intq'o'n tnab'lju' xjal mixti' xnaq'tzb'il te.

8Tz'aqliqe'ju' tkawb'il Qman Dyos,

qu'n intzalaj qanmi kyu'n.

Tb'anilxi'xte' tchaq'b'il Qman Dyos,

in t-spik'b'a'n toj qwitz.

9Majx Ẍtilunte' nqo niman te Qman Dyos,

ex ati tejumajx.

Ax qe'kye' tchaq'b'il Qman Dyos,

kykyaqil tz'aqliqe',

10¡nimxi'x kyoklen kyetwitz tb'anil q'anpwaq!,

¡maj chi'xi'x kyetwitzju' ta'lkab' nb'ent kyu'n onon!

11Ex k'asb'ilqe' weye' ayine' tmajena,

ex b'a'nxi'x tu'n kyxi' nnb'i'ne'.

12¿Alxi'xkye jun inel tnik' ti'jxu' tchuksb'en?

¡Nman Dyos, najsanku'ya jni'xu' nb'inchb'ene' min inel nnik'e' kyi'j!

13Iq'imilju'ya nimjtib'il woje';

lalun taja tu'n tkub' wi'je' tu'nju' nimjtib'il.

Tu'ntzun wokye' mixti' ntz'ilile' twitza;

ex tu'n ntzaqpete' te nimaq il.

14Che elxwit b'a'nju' nyole' exju' nxime' toj twitza,

Nman Dyos, wewb'ile' ex tzaqpil weye', chiju' b'itzal.