1Jun q'ij xjelun Dab'i: ¿Ma ati jun kyxol tyajajil Sawul kyejni anq'in, tu'n wonine' ti'j te nab'ab'lte Jonatan?, chij.
2Atitoqtzun jun majin toj tja Sawul, Sib'a tb'i, xi' txokb'aj tu'n tpon tk'etz Dab'i. Tetzunj tpon, xitqani'n nimaqkawil te:
—¿Ma aya Sib'a?, chij.
Atzunte xittzaq'we'n:
—Ayin na'tzune', ajb'el teya, chij.
3Xi'tzun tqani'n nimaqkawil te:
—¿Ma atix jun kyxol tyajajil Sawul xkyej anq'in tu'n nb'inchanteye' b'a'n te toj tb'i Qman Dyos?, chij.
Atzunte' Sib'a xittzaq'we'n:
—Atix jun tk'wal Jonatan, tzkajqe' kab'e' tqan, chij.
4—¿Jatzun ta'ya'?, chi nimaqkawil.
—Xi' ta'ya' tja Makyir tk'wal Amyel, toj Lodeb'ar, chi Sib'a xittzaq'we'n.
5Tchaq'tzun nimaqkawiltz tu'n txi' iq'b'aj jatoq ta';
6tetzunj tpon Mepi-b'oset, tk'wal Jonatan ex tchman Sawul, twitz Dab'i, kub' tzipe te ninb'il.
—¡Mepi-b'oset! chi Dab'i xitma'n te:
Atzunte xittzaq'we'n:
—Luqine' lu nimaqkawil, titi' wajb'ene' teya, chij.
7Xi'tzun tma'n Dab'i te:
—Lalun xob'a, qu'n kxel nka'yi'nta b'a'nxi'x te nab'ab'lte Jonatan ju' qtzan tmana. Knb'incha'ye' tu'n kyxi' anjsa'n tkyaqilju' ttx'otx' qtzan tchmana Sawul teya, ex kwala wuk'i'le' kukxju', chij.
8Atzunte Mepi-b'oset kub' tzipe ex xitma'n:
—¿Tiqu'ntzun ntzaja' laqj tk'u'ja wi'je', nimaqkawil, extzun ikqinju'ye' ja'lo kse'n jun kyimni tx'yan?, chij.
9Atzunte nimaqkawil tzaj ttxko'n Sib'a, ju' ojtxi' ajb'eltoq te Sawul, ex xitma'n te:
—Matxi' txinq'o'ne' tkyaqilju' atitoq te Sawul ex tkyaqilju' atitoq kye tyajajil te Mepi-b'oset ju' tchman.
10Qu'mtzun aya kb'el aq'unanteju' tx'otx' kyuk'i'lju' tk'wala exqe' tmajena, ex kxe'l tk'u'nju'ya kjawil twitz, tu'ntzun kywanju' tyajajil Sawul kukxju', expe' atzu' kwala' Mepi-b'oset ju' tchman nk'etze', chij te.
Ate'toq o'lajoj (15) tk'wal Sib'a ex junaq (20) tmajen,
11xittzaq'we'n Sib'a te nimaqkawil:
—Knb'incha'we' tkyaqilju' matxi' tmaya weye', chij.
Atoqtzuntzu' nwana' Mepi-b'oset kukxju' tja Dab'i, naku'xwitloj tk'walku' nimaqkawil.
12Expe' atitoq jun tk'wal b'o's, Mikayiy tb'i, kykyaqiltzunju' najlqe'toq tja Sib'a intoq che ajb'en te Mepi-b'oset.
13Atzunte Mepi-b'oset, tu'nju' tzkajqe'toq kykab'il tqan, najlitoq Jerusalen, qu'n atoqtzu' nwana' tk'etzu' nimaqkawil.
Who We AreWhat We EelieveWhat We Do
2025 by iamachristian.org,Inc All rights reserved.
