Ec 6 - Mam Ostuncalco Bible

1Atix juntl ti'xti' matxi' tz'el nnik'e' ti'j nb'aj kyxol xjal twitzju' tx'otx' lu:

2intzaj tq'o'n Qman Dyos txqan kyq'inumal ex ninb'ilkye junjun xjal, ex majx atiyileju' ti'xti' kye aju' npon kyk'u'j ti'j; extzun min q'o'n kye tu'n kynik'b'ente tkyaqil, junxi'qe'tlkye' nche nik'b'elte. ¡Ex mixti'x ttx'o'lajil ja'lu ex b'isb'ajilx!

3Jaku' ten jo'naq tk'wal jun xjal ex jaku' tz'anq'in b'a'npun ab'q'i; naqtzun aju' maskye maten nimtoj, qa min xtzalaj toju' b'a'n, expe' qa min xku'x mqu'n; ape'te b'a'n jun k'wal noq e'la'n kyetwitzju' xjal lu.

4Maskye naq xkub'naju' k'wal lu toj qxopin ja kjela' naja' tb'i,

5b'a'ntzun qa min xtilju' q'ij ex mixti'xte sok tb'i'n, maspe' matz'ojlan twitzju' xjal lu,

6b'a'npe'wtlo qa matz'anq'in jo'k'al (2,000) ab'q'i, qa min xtnik'b'eju' ati te. ¡Junxna' qo pomela'te' qkyaqil!

7Inxi'x oktilil tu'n taq'unanju' xjal tu'n twan, extzun mixti'x nqe tk'u'j.

8¿Ti'xi'xtzu'n ati teju' xjal ati tnab'lju' mixti' teju' mixti' tnab'l, qa myaju' tojtzqib'l tu'n tb'ent tanq'in?

9Ate b'a'nju' nnok qka'yi'n kyetwitzju' naq nkub' qxima'n. Expe' ikx mixti'x ttx'o'lajil ja'lu, ikxju' kse'n qajb'il tu'n qxi' knolte kyq'iq'.

10Aju' ati ja'lo, ojtxi'ku' toklen q'o'n tb'i, ex b'i'n alkye. Mix-a'lo' jun kb'entel tq'ojin tuk'i'lju' nimxi'x tipumal.

11Qa jun xjal nim nyolin, nim txqan tyol mixti'x tajb'en; ex mixti'xte nkanb'et tu'n ja'lu.

12Qu'mtzun mix-a'lo'xte b'ilte alkyexi'xju' b'a'n teju' xjal toju' jte' q'ij tchwinqlal naqx tal witzik' twitzju' tx'otx'. K'ik'elju' jte' q'ij tchwinqlal naku'j leku'n, ¿alxi'xkye kpomel q'malte te titi' kb'ajel twitzju' tx'otx' tkyimlenxi'?