1Atitoq jun tmyal Dab'i tb'anilxi'x ka'yin, Tamar tb'i, tanab' Ab'salon. Matzajtlte Amnon, tk'walx Dab'i, oklaqj ti'j,
2expe' majxkub' yab'ti tu'n tpaj; mixtoqti'x tu'me'l toj twitz tu'n tb'inchante jun ti'xti' ti'j, qu'n na'mxtoq txi' tzyu'n te Tamar tu'n jun ichan.
3Atitoqtzun jun tamiw Amnon, tx'yan tuk'i'l, Jonadab' tb'i, tk'wal Sima, kyitz'in kyib' tuk'i'l Dab'i.
4Jun q'ij xitqani'n Jonadab' te:
—¿Titi' nniq'ina, tk'wal nimaqkawil, qu'n atl junjun q'ij q'ancha'lxi'xtl twitza? Q'mantza weye', chij te.
Atzunte Amnon xittzaq'we'n te:
—Naq tu'n tpaju' matxi' chin oklaqje' ti'j Tamar, tanab' witz'ine' Ab'salon, chij.
5Xi'tzun tq'o'n Jonadab' jun tnab'l:
—Kutxi'ya kẍeb'il ex yab'sanku'tib'a. Ajtzun tpon tmana ka'yilteya, kub'sanxa te tu'n ttzaj tchq'o'n Tamar ju' tanab'a q'olte twaya ex tu'n tkub' tb'incha'n axtzu' tk'etza, tu'n toktka'yina ex tu'n t-xitwanju'ya tb'inchb'aj, chij te.
6Xi'tzun Amnontz kẍeb'il ex kub' tyab'sa'ntib'. Tetzunj tponju' nimaqkawil ka'yilte, xitma'n Amnon te:
—¡Taye, najsama! Qaj saj tchq'o'n ch'inta wanab'e' Tamar tu'n tkub' tb'incha'n nwaye' tza'lu, ex aku' ktzajel q'onte weye', chij.
7Xitzun tchq'o'n Dab'i Tamar ja, ex xitma'n te:
—Kutxi' ch'i'nta tja t-xib'ena Amnon, ex b'inchankx jun twaya, chij te.
8Ku, chi Tamar xi' tja t-xib'en Amnon, kuẍlitoq. Tzaj tiq'i'n Arin ex b'aj t-xyuq'i'n, axtzu' b'aja' tb'incha'na' ex okx ttzq'ajsa'n;
9tzajtzun tiq'i'n tlaq ex xitq'o'n twa; atzunte Amnon mixti' taj tu'n twan ex xitma'n kye kykyaqilju' te'qe'toq tu'n kyb'je'x.
10Tetzunj matxi'toq che b'je'x kykyaqil, xitma'n Amnon te Tamar:
—Iq'i'ntza wab'j tza'lu toj kuẍb'il, ex aku'ya ktzajel q'onte weye', chij.
Ku, chi Tamar e'tzaj tiq'i'nju' muqin e'kub' tb'incha'n ex xitiq'i'n te t-xib'en Amnon toj tkuẍb'il,
11tetzunj tpon lq'e tu'n twan, kub' ttzyu'n ex xitma'n te:
—Kutzaja, wanab', kẍeku'ya wuk'i'le', chij te.
12Atzunte xittzaq'we'n:
—Lay, Amnon, lalun tb'inchaju'ya lu wi'je', qu'n minti' in b'inchanjtzte' lu toj Israel. ¡Lalun tb'inchaju'ya taq'wixil lu!
13¿Jatzun chin xe'laye' tuk'i'lu' nch'ixawe' lu? Atzunta, k'okyel q'o'na te jun xjal mixti'x tnab'l toj Israel. B'inchama xtalb'il q'manxa te nimaqkawil, layna' tmaqte' tu'n wokye' te teya, chi Tamar te.
14Atzunte Amnon mixti' xitb'i'n, kub' tkutz'i'n Tamar ex kub'kẍe tuk'i'l, qu'n atixixte tipumal kyetwitz.
15Yajxi'tzuntel majx tzaj tx'a'lti'j tk'u'j ti'j, ex majx el tik'u'nxi'x kyetwitz intoq tk'u'jla'n. Qu'mtzun xitma'n te:
—We'k'tza ex kutxi'ya, chij.
16Atzunte Tamar xittzaq'we'n te:
—¡Lay, Amnon, qu'n qama chin ex t-xla'jana ja'lo tzalu, nimaq ilxi'xtl kyetwitzju' matxi' tb'inchaya wi'je'!, chij.
Atzunte Amnon mixti' xitb'i'n;
17tzajpe' txko'nju' tmajin ex xitma'n te:
—¡Iq'i'mixju'ya qya lu tza'lu, ex jpumixa ja b'a'nxi'x twitz!, chij.
18Etztzun tiq'i'nju' majin tuja, ex kyej jpu'nju' ja b'a'nxi'x. Atzunte Tamar, toktoq jun t-xb'alun ku'j tb'anilxi'x, kse'nxju' intoq okkyq'o'n kymyal nimaqkawil na'mtoq kymje,
19kub' tlaqu'n ex jax tchto'n tza'j toj twi', xi'tzuntz intoq oq' toj b'e, atokx tq'ob' toj twi'.
20Xi'tzun tqani'n Ab'salon ju' t-xib'en te:
—¿Ma a Amnonju' t-xib'ena xb'inchante lu teya? Qana'tzun aju', lalun txi' tma'na Tamar, qu'n t-xib'ena'ya. Lalun txitq'o'nxi'xa lu toj tk'u'ja, chij te.
Tetzunj tka'yinte Tamar, qa matxi'toq kyej kolb'i'n, axtzu' kyeja' tja t-xib'en Ab'salon.
21Tetzunj tb'inte nimaqkawil Dab'i ja'lu, tzaj txqan ttx'u'jil; extzun min xittzak'u'n Amnon, qu'n intoq tk'u'jla'n tu'nju' a tnejel tk'walju'.
22Mixtzunti'te Ab'salon xitma'n te Amnon, atzu'n toj tanmi inxi'xtoq tx'a'lti'j tk'u'j ti'j qu'n matxi'toq tz'el tiq'i'n tch'ixawju' tanab'.
Oktq'o'n Ab'salon tu'me'l t-xel te Amnon23Tb'ajlenxitzun kab'e' ab'q'i, xiniqetoq t-xjal Ab'salon jol kyi'j trit toj B'aal-asor, nqaku' tk'etz ttanam Eprayin, e'ttxoktzun Ab'salon kykyaqilju' tk'wal nimaqkawil toj jun wan.
24Expe' xiku' tk'etzu' nimaqkawil, ex xitma'n te:
—Wajb'ile' tu'n ttena nimaqkawil kyuk'i'lju' nejenel kye t-xjala toj jun wan njaye', ayine' ju' ajb'el teya, xiniqe'ku' nxjale' jol kyi'j nrite', qu'mtzun wajb'ile' tu'n kytene', chij.
25Atzunte' nimaqkawil xittzaq'we'n te:
—Lay, nky'ajul, myab'a'n tu'n qxi'ye' qkyaqile', qu'n jaku' nimxi'x tpwaqa b'aj, chij.
Ok il Ab'salon ti'ju' nimaqkawil, ex mixti'x taj tu'n txi', naq o'kx xitqani'n ky'i'wb'il tib'aj.
26Xi'tzun tma'n Ab'salontz te:
—Qatzun mixti'x tu'me'l tu'n txi'ya, maskye o'kxu' ntzike' Amnon, chij.
Atzunte' nimaqkawil xitqani'n te:
—¿Tiqu'ntzun tajb'ila'ya tu'n txi' Amnon?, chij.
27Tu'ntzunju' ok ilxi'x Ab'salon, chab'ax taju' nimaqkawil tu'n txi' Amnon kyuk'i'lju' txqantl tk'wal.
Matxi'toqtzun kub' tb'incha'n Ab'salon jun ninwan kse'nte jun nimaqkawil,
28ex ojetoq txitma'n kyeju' tmajen: B'a'nx che ka'yine' ti'j Amnon ajttzyet twi', ajtzun txi' nma'ne' tu'n tkub' kyb'yo'ne', wix kub' kyb'yo'ne'. Lalun che xob'e' ti'j, qu'n nchaq'b'il we'. Qu'mtzun, kuwqe'xe' te, chij kye.
29Qu'mtzun, ku chiqeju' tmajen Ab'salon, kub' kyb'yo'n Amnon. Tetzunj kyka'yinteju' txqantl tk'wal nimaqkawil eb'jaw we', eb'aj oqtzuntz kyi'j kychej.
30Inxtoqtzun che b'et tej tponaj tqanil te Dab'i qa matxi'toq che kub' tb'yo'n Ab'salon kykyaqilju' tk'wal.
31Jawe'tzun nimaqkawiltz, b'aj tlaqu'nju' ti'j te yek'b'il b'is ex kub' joqetzuntz twitz tx'otx'. Ex kykyaqilju' nejenel kye t-xjal ju' ate'toq atzu' b'ajkub' kylaqu'nju' kyi'j;
32atzunte Jonadab', tk'wal Sima, ju' kyitz'inkyib' tuk'i'l Dab'i, yolin ex tma:
—Lalun kub' t-xima'na nimaqkawil qa matxi' che kub' b'yo'n kykyaqilju' tk'wala. Naq o'kxte Amnon xkub' b'yo'n, qu'n iky kub' t-xima'n Ab'salonju' atxi'x tej tkub'tyaju'n Amnon Tamar ju' tanab'.
33Qu'mtzun, lalun kub' t-xima'na nimaqkawil qa matxi' che b'aju' tk'wala. O'kxte Amnonju' matxi' b'aj, chij.
34Tetzunj txi' oq Ab'salon, xitka'yi'n ku'xun intoq xq'uqin, nim txqan xjal ljo'ntoq kyku'tz toj tb'eyil Oronaym, tk'u'j witz. Xi' ojqelantzun ku'xuntz q'malte teju' nimaqkawil qa exi' tka'yi'n txqan xjal ljo'ntoq kyku'tz toj tb'eyil Oronaym.
35Atzunte Jonadab' xitma'n teju' nimaqkawil:
—Luqe'ju' tk'wala che ul nimaqkawil, kse'nxju' xkub' nximane' ayine' ajb'el teya, chij.
36Naqtzun inb'aj yolin, tej kyponju' tk'wal nimaqkawil, ex e'kub' oq' b'a'nxi'x. Ex ikxju' nimaqkawil kub' oq' kyuk'i'lju' nejenel kye t-xjal.
37-38Atzunte Ab'salon xi' oq tk'etz Talmay, tk'wal Amyud, nimaqkawil te Kyesur, ex kyejten oxe' ab'q'i atzu'. Atzunte Dab'i intoq oq' tkyaqil q'ij ti'j Amnonju' tk'wal,
39tetzunj tik' tna'l tu'n, tajb'ilxi'xtoq tu'n tok tka'yi'n Ab'salon.
Who We AreWhat We EelieveWhat We Do
2025 by iamachristian.org,Inc All rights reserved.
