Is 11 - Mam Ostuncalco Bible

Tzultiq'i'n tyajajil Jese jun kawb'il te nak'b'il ex tnik'alilti'j

1Kch'iyel jun t-xul tkuchmal Jese;

ktzajel ch'iy jun t-xul ti'ju' tlok'.

2Majx ktenb'el t-xew Qman Dyos tib'aj,

ex kxe'l tq'o'n tnab'l, tu'n telk'atz,

tipumal, tu'n t-ximan b'a'n,

tojtzqib'l ex tu'n tten tchi Dyos te.

3Lay tma se'nkyten xjal naq tu'n kyka'yink,

ex lay kub'ttz'e'ysa'n kywitz naq tu'n nxitb'i'n.

4Kxjelul tojxi'x tnik'alilti'j kye prow

ex ktkla' kyoklen prow toju' tx'otx'.

Ikytyolju' kse'n b'ar tu'n ttz'e'yset kywitzju' txkupxjal,

ex kb'el tb'yo'n b'inchal myab'a'n ajt-xi t-xupi'n.

5K'okyel toksa'n ax ex tnik'alilti'j kukxju'.

6Knajaltzun xo'jtz tuk'i'l rit toj tzalajb'il,

ex kb'el paqe b'alan tuk'i'l chib' junx,

junx kch'iyelju' qpoj tman wakx tuk'i'l b'alun,

jun b'o's k'wal kxel ka'yinkye.

7Ktuk'ila'tib' ttxu wakx tuk'i'l ttxu oso,

ex che b'elpaqe kyal junx.

kwalte' b'alun k'ul, kse'n tman wakx.

8Kb'entel t-ẍchanju' k'wal toj tjul kan,

kb'entel tokxtq'o'n tq'ob' toj tpaqb'il q'antin.

9Mix-a'lo' kb'inchal taq'wix te juntl

twi'yileju' witz xjan weye',

qu'n kb'el noju' tx'otx' tu'n ojtzqib'l ti'j Qman Dyos,

kse'n a' ntnojsa'n ninnjab'.

10Tojtzu'n tq'ijlalil lu

kjawilju t-xul tlok' Jese

te jun techlal kye tnam;

k'ik'el tjoyli kyu'n nimaqtnam,

ex nimxi'x toklenju' najb'il ja ktenb'ila'.

Kanb'ab'l ajtanjtzkyi'ju' b'ajxni q'i'nqe' toj juntl tnam

11Ktyek'u' jumajtl Qman Dyos tipumal toju' tq'ijlalil lu

che kanb'etetlju' jni'tl ttanam tu'n,

che anjetz tiq'i'ntl kyoj Asirya, Ejipt,

Patros, Etyopiy, Elam,

Sinar, Amat ex kyoju' tx'otx' ttzi ninnjab'.

12Kjawil jun techlal tu'n kye nimaqtnam

che b'ajel tb'u'yi'n aj Israel b'je'xniqe' ti'jxi' kytx'otx';

che tzajel tb'u'yi'n aj Juda b'ajxniqe' sputj

toj kykyajel ttx'u'k kya'j.

13Kb'ajel ttxa'n tkyaqkyk'u'j tyajajil Eprayin,

ex kqenb'el kytx'u'jil aj Jada;

Lay tx'a'tlti'jkyk'u'j tyajajil Eprayin kyi'j aj Juda,

ex lay tzajtl kytx'u'jil aj Juda kyi'j tyajajil Eprayin.

14Kykab'ilx che kxe'l q'ojil kyi'j pilistey tkub'exq'ij

kb'je'lel kyiq'i'n kyq'inumalju' ate' tjawetzq'ij.

Kpomil kyipumal tzmax Edom ex Moab',

ex che kawil kyib'aju' aj Amon.

15Kjqetel jun kyb'e tu'n Qman Dyos toju' ninnjab' kyeq tb'i,

ktzajel tq'o'n tq'ob' kye tu'n kyjlajin toju' a' Ewprates,

ktzajel t-xupi'n jun kyq'iq' xob'ajilx

wuq tq'ob' kb'je'lila' tu'n,

che ik'etz jlajintzuntz toj, tok kyxajab'.

16Ajtzun kyanjtzju' jte'tl ttanam Qman Dyos toj Asirya,

k'okyel yal jun kyb'e nimtoj,

kse'n tej kyetz aj Israel toj Ejipt.