Ec CHIK'B'AB'L - Mam Ostuncalco Bible
CHIK'B'AB'LXi' tzajna' tb'i U'j Eclesiastes lu toju' poq'i'n kyu'n oxnaq lajoj (los 70), ja tzajna' yol glesi, atzu'n toj eb'rey, kyolju' ttanam Dyos ojtxi', Qohelet, atz'elpuna'ju': aju' q'ilte twitz jun b'uyjtib'il, mujqa aju' nyolin toj jun b'uyjtib'il. Ana' yol toj kryek, ekklesia, atz'elpuna'ju', b'uyjtib'il. Atzu'n toju' okslab'l ti'j Qajaw Jesukrist, atz'elpuna'ju': jun pakb'al. A ntma'nju': jun xjal twattzi tu'n tyolin, jun tx'olb'al toj ttxolilti'j, mujqa jun ajximal nximan tib'aj jun ti'xti' nim toklen: ¿Alkyeju' b'a'n nim toklen? ¿Alkyetzu'n nimxi'x toklen toju' chwinqlal, tu'ntzun atzu' tz'oka' tilil tu'n xjal tu'n tkanb'anteju' tb'is tk'u'j?Int-xjelu'n tz'ib'alteju' u'j lu toj jun tu'me'l ax ex tnik'alti'j, qa aju' q'inumal, achb'il ex aq'untl, exju' ojtzqib'l, nimxi'x kyoklen toju' kychwinqlal xjal. Eltnik' ti'j qa myaye'ju': mixti'xkye' kyajb'en tu'n tokqe qk'u'j kyi'j axi'xwit tu'n kykanb'etju'. Naku'j inyolin tz'ib'alte u'j lu tjunalx, nnoktq'o'n toklen jun ti'xti', yajxi'tl nkutmyo'n mujqa inel tik'u'n tojxi'x tu'me'l, inxi'x jyo'n alkyexi'x tb'anilju' chwinqlal.Tu'nju' xjel tojxi'x tu'me'l toju' u'j lu, nimju' ntma'n naku'j mixti'x kyajb'en ex mya tzalajb'ilqe'. Ojexi'x ximanju' tz'ib'alte u'j lu tib'aju' tchwinqlal xjal naq ch'i'ntoj ex nimu' ti'xti' nb'aj toj mya tnik'alilti'j ex b'is, ex kane toj twitzju' tz'ib'al qa mixti'x tajb'enju' chwinqlal, naq jun kmujx ex mixti'x tb'anil. Atzu'n toj b'ajsb'il teju' u'j lu, in tchik'b'a'n qa a nim toklenju' teju' ichan, aju' titi' kub'a' b'incha'na' tu'n Dyos, tu'n tniman ex tu'n tb'inte Qman Dyos, ju' ajkawil nim toklen tkyaqil ojtzqi'n tu'n. Tkyaqilju' tzalajb'il kyi'ju' oklenj qe tu'n Dyos, e' aq'untl exju' nab'l, o'kx ati kyoklen ex kyajb'enju' qa te ninb'il ex okslab'lte Qman Dyos.
