Lv 23 - Mam Ostuncalco Bible

Ninq'ij toj kyokslab'l aj Israel(Nm 28.16-25)

1-2Tzaj tma'n Qman Dyos te Moyses tu'n t-xitma'n kye aj Israel kjalu:

Aye' ninq'ij ja'lu nim kyoklen tu'n kyk'ulune' weye', ex a tb'iju' k'okyel kyq'o'ne' b'uyjtib'il xjan.

3Waqaq q'ij kche aq'unale', atzu'n toj twuqi'n q'ij mixti' tu'n kyb'inchante jun aq'untle'; jun q'ijte' te ojlab'l nim toklen ex tu'n tten jun b'uyjtib'il xjan. Jaxjaku' mache najane', te ojlab'l te' q'ij lu te ninb'ilweye'.

4Aye'tzun q'iju' nimaq kyoklen tu'n kykub' ik'setju' b'uyjtib'il xjan te ninb'ilweye', aye' q'iju' ati tu'n kyb'u'yinte kyib'e':

5Toj tkyajlajoji'n q'ij teju' tnejel xjaw, ajtok qale, kb'el kyik'sa'ne' Q'ij te Tzaqpib'l te ninb'ilweye'.

6Atzu'n toj tjwe'lajoji'n q'ij texju' xjaw lu, kb'el kyik'sa'ne' tq'ij wab'j mixti' ttx'amal te ninb'ilweye'. Wuq q'ij tu'n kywanteye' wab'j mixti' ttx'amal.

7K'okyel jun b'uyjtib'il xjan kyu'ne' toju' tnejel q'ij. Mixti' tu'n kyb'inchante jun aq'untle'.

8Wuq q'ij ati tu'n kytz'e'ysanteye' chojb'il nwitze', tojtzu'n twuqi'n q'ij k'okyel jun b'uyjtib'il xjan kyu'ne'. Mixti' tu'n kyb'inchante jun aq'untle', chi Dyos.

Tq'ij tnejel twitz awal(Nm 28.26-31)

9-10Tzaj tma'n Qman Dyos te Moyses tu'n t-xitma'n kye aj Israel kjalu:

Ajkyokxe' toju' tx'otx' kxe'l nq'o'ne' kyeye', aj tjawju' twitz kytriye', ati tu'n tpon kyiq'i'ne' tnejel manoj teju' pale.

11Tetzun juntl q'ij tik'lenxi' q'ij te ojlab'l, kb'el tq'o'nju' pale nwitze' te jun oyaj tb'anilxi'x, tu'ntzun tk'met kyeye'.

12Ax q'iju' ajttzaj kyq'o'ne' manoj triy, ktzajel kyq'o'ne' jun qpoj tman rit te jun ab'q'i mixti' ttzakajil, te jun chojb'il k'ok'sb'il te ninb'ilweye'.

13Ex ktzajel kyiq'i'ne' ch'inxmi lajoj lib'r tb'anil arin xyuq'i'n tuk'i'l aseyt, tu'n tkub' kyq'o'ne' nwitze' te jun oyaj tz'e'ysa'n tb'anil tk'ok'jal. Ex ktzajel kyiq'i'ne' jun litr b'in te jun oyaj tu'n tkub' qet.

14Lalun che wan wab'je', triy ch'i'li'n mujqa cha'x, tzmaxi'j ajttzaj kyiq'i'ne' kyoyaje' weye'. Jun kawb'ilte' lu majx kjelten, ex kjel kyma'ne' kye kyk'wale' jaxjaku' mache najane'.

15Textzunju' q'ij ajttzaj kyq'o'ne' jun manoj triy te jun oyaj tb'anilxi'x, tik'lenxi'ju' q'ij te ojlab'l, kxel kyajla'ne' wuq smanxi'x.

16Ajtzun tjapunju' twuqi'n sman tuk'i'lxi' juntl q'ij tik'lenju' q'ij te ojlab'l, kjapumel b'aj kab'wnaq lajoj (50) q'ij. Kb'eltzun kyq'o'n kyoyajtze' ak'a'j twitz triy nwitze',

17ex ktzajel kyiq'i'ne' kab'e' wab'j b'incha'n tu'n tb'anil arin tzq'ajsa'n tuk'i'l ttx'amal, ch'inxmi b'eljoj lib'r talal junjun, te jun oyaj weye' tb'anilxi'xte tnejel twitz awal.

18Che ktzajel kyiq'i'ne' kab'e' wab'j junx kyuk'i'l wuq qpoj tman rit te jun ab'q'iqe' mixti' kytzakajil, jun tman wakx ex kab'e' tman rit, te chojb'il k'ok'sb'il te ninb'ilweye', te jun oyaj tz'e'ysa'n tb'anil tk'ok'jal, tib'ajxi'ju' kyoyaje' ti'j twitz awal k'ok'e'kywitz ex ti'j b'in.

19Ex ikx kb'el kyq'o'ne' jun chib' te chojb'il tu'n tpaj il, ex kab'e' qpoj tman rit te jun ab'q'iqe' te chojb'il te b'inchjtib'il.

20Che kb'eltq'o'n paleju' alu'mj te jun oyaj tb'anilxi'x nwitze', junx tuk'i'lju' wab'j te tnejel twitz awal ex kab'e' qpoj tman rit. Kche xjansetel nwitze' teju' pale.

21Ati tu'n tkub' kyq'o'ne' jun b'uyjtib'il xjan tojxju' q'ij lu, ex mixti' tu'n kyb'inchanteye' jun aq'untl. Jun kawb'ilte' lu majx kjelten kyeye' ex kye kyk'wale' toj wiqi'nwiq jaxjaku' mache najane'.

22Ajtjaw twitz kyawale', lalun majx tek' jawju' twitz kyawale' twitzju' kytx'otx'e' ex lalun che oktene' sakwilteju' t-spiyil triy nkyaj tz'aqi. Kyq'onkje' kye prow ex kye najchaq xjal. Ayine' Dyos Manb'aj nchin q'mante, chi Dyos.

Kyq'ij chun(Nm 29.1-6)

23-24Tzaj tma'n Qman Dyos te Moyses tu'n t-xitma'n kye aj Israel kjalu:

Kb'el kyik'sa'ne' jun q'ij te ojlab'l ex jun b'uyjtib'il xjan te nab'ab'l tuk'i'l chun toj tnejel q'ij teju' twuqi'n xjaw.

25Ati tu'n tkub' kytz'e'ysa'ne' jun oyaj te ninb'ilweye', ex mixti' tu'n kyb'inchante jun aq'untle', chi Dyos.

Tq'ij najsb'il(Nm 29.7-11)

26Tzaj tma'n Qman Dyos te Moyses ikjalu:

27Tq'ij Najsb'il toju' tlajoji'n q'ij texju' twuqi'n xjaw. Ati tu'n tkub' kyik'sa'ne' jun b'uyjtib'il xjan, ex tu'n kymewayine' teju' q'ij lu, ex tu'n tkub' kytz'e'ysa'ne' jun oyaj te ninb'ilweye'.

28Lalun kyb'incha jun aq'untle' toju' q'ij lu, qu'n Tq'ij Najsb'ilte', a q'iju' tu'n tknet najsb'il kyile' nwitze' ayine' Dyos Manb'aj.

29Alkyexku' jun min xmewayin teju' q'ij lu, ati tu'n tex xla'jet toj ttanam.

30Ex alkyexku' jun matzaq'unan teju' q'ij lu, knajel wu'ne' toj ttanam.

31Lalun kyb'incha jun aq'untle'. Jun kawb'ilte' lu majx kjelten kyeye', ex kjel kyma'ne' kye kyk'wale' toj wiqi'n jaxjaku' mache najane'.

32Ati tu'n tokju' q'ij lu kyu'ne' te ojlab'l ex te mewayi'n, kxel qe kyu'ne' ajtok qale teju' tb'eljoji'n q'ij teju' xjaw ex kb'ajelxi' ajtok qale te juntl q'ij, chi Dyos.

Kyq'ij pach tq'ob' tze(Nm 29.12-40)

33-34Tzaj tma'n Qman Dyos te Moyses tu'n t-xitma'n kye aj Israel kjalu:

Kxel qeju' ninq'ij kyeju' pach tq'ob' tze toju' t-o'lajoji'n q'ij texju' twuqi'n xjaw, wuq q'ij kb'el kyik'sa'ne' te ninb'ilweye',

35k'okyel jun b'uyjtib'il xjan kyu'ne' toju' tnejel q'ij. Lalun kyb'incha jun aq'untle'.

36Kb'el kytz'e'ysa'ne' oyaj te ninb'ilweye' toju' wuq q'ij lu, atzu'n toj twajxaqi'n q'ij kb'el kyik'sa'ne' jun b'uyjtib'il xjan ex kb'el kytz'e'ysa'ne' jun oyaj te ninb'ilweye'. Jun ninq'ijte', mixti' tu'n kyb'inchante jun aq'untle'.

37Aye'tzun q'iju' nim kyoklen tu'n njaw kynima'ne' ayine' Dyos Manb'aj, ati tu'n tok b'uyjtib'il xjan kyu'ne' ex kb'el kyq'o'ne' oyaj tz'e'ysa'n weye' kyoju' q'ij lu, e'chojb'il k'ok'sb'il, oyaj kywitz awal k'ok'e'kywitz, chojb'il ex oyaj b'in, kse'nxju' q'ij in ik'set,

38kyib'ajxi'tlju' q'ij te ojlab'l te ninb'ilweye' ex kyi'jxi'tlju' q'ij tu'n kykub' q'etju' oyaj tziya'ntl kyu'ne' weye' mujqa tu'n kyk'u'je' tu'n kyq'onteye'.

39Toj o'lajoj q'ij tajlalju' twuqi'n xjaw, tb'ajlenxi' kyb'u'yi'nju'ye' twitz kyawale', kb'el kyik'sa'ne' jun ninq'ij te wuq q'ij te ninb'ilweye', tuk'i'l ojlab'l te tnejel q'ij ex twajxaqi'n q'ij.

40Toju' tnejel q'ij ktzajel kyiq'i'ne' lob'j kywitz tb'anil tze, kyxaq tut ex tb'anil tze ex e'chjaj toj nin a', ex che tzalajel wuq q'ije' nwitze'.

41Atl junjun ab'q'i toj twuqi'n xjaw, kb'el kyik'sa'ne' jun ninq'ij te wuq q'ij te ninb'ilweye'. Jun kawb'ilte' majx kjelten ex kjel kyma'ne' kye kyk'wale'.

42Tojtzu'n wuq q'ij lu kykyaqile', aj Israel qe'ye' kyitz'jlenxe', che tenb'ele' toj pach b'incha'n tu'n tq'ob' tze,

43Tu'ntzun kyb'inte kykyaqilju' kyyajajile' qa e'najanpun aj Israel wu'ne' toj pach tq'ob' tze tej kyetzwiq'i'ne' toj Ejipt. Ayine' Dyos Manb'aj, chi Dyos.

44Iktzun xitma'n Moyses kye aj Israel alkyechaq tq'ijlalil nim kyoklen tu'n kyok teku' Qman Dyos.