Sal 32 - Mam Ostuncalco Bible

Q'mab'l il ex najsb'il il

1Tzalajb'ilte' teju' xjal

matxi' kub' najsa'n til ex tb'inchb'aj myab'a'n.

2Tzalajb'ilte' teju' xjal mixti' t-xim taq'wix

ex mixti' jun til nnelyal tu'n Qman Dyos.

3Tej na'mxtoq tjatz nma'ne' wile',

kxi'toq nkub'numje'

tu'n oq'e'n atl junjun q'ij,

4qu'n q'ijtl ex qonik'an

nchin k'ixb'iye' tu'n tq'ob'a,

naku'j jun b'ech nkub' tzqij toj q'ijal,

iktoqtzun nna'ju'ye' xi'toq nkub'numje'.

5B'jatztzun npa'n wiltze' ex nb'inchb'aje' myab'a'n teya

mixti' kub' wewa'n juntle',

b'jaw nma'ne' wile' teya,

atzunta Nman Dyos, b'ajkub' tnajsa'na.

6Qu'mtzun che kub'salju' okslalqe'xi'x teya

toju' kmuj te k'ixk'oj,

b'a'ntzun qa ati tnimal a' in toloq'in,

lay pon kanun kyi'j.

7Aya kolb'ilweye':

nchin tklo'na teju' xob'ajil,

nttxoli'na wi'je' kyu'n sich' te tzaqpib'l.

8Intma'n Qman Dyos kjalu:

Majx toknwitze' ti'ja.

Ayine' chin xnaq'tzalteya,

kxe'l nq'o'n tnab'la,

kxe'l nyek'u'ne' b'e teya ju' ati tu'n txi' tiq'i'na.

9Lalun tz'oka naku'j chej,

minti' nb'in ex mixti' tnab'l

ati tu'n tokx k'uxb'il toj ttzi tu'n ttzaj jk'et,

qatzun min lay tzaj lq'e tk'etza.

10Aju' tk'u'jlalil Qman Dyos,

nktxunkyeju' q'uqlok kyk'u'j ti'j,

aye'tzu'n b'inchal il kche yajtel b'a'nxi'x.

11Che tzalajxe' ti'j Qman Dyos,

aye'ye' b'a'n xjal qe'ye' ex tnik'alkyi'je' twitz Dyos;

¡che tzalajxe' ex che ẍch'inqe'ye' tu'n kytzalajb'ile'!, chiju' b'itzal.