1Tojtzu'n q'ij lu kb'el ttz'e'ysa'n Qman Dyos
twitz Leb'yatan, ju' kan kuyi'ntib',
aju' Leb'yatan, kan b'iyol,
kb'el tb'yo'n tu'n tk'uẍtx'e'nb'il xob'ajilx, yaqinxi'x ex kuw.
2Ktma' Qman Dyos toju' q'ij lu:
Che b'itzan qe'ye' teju' tqan ub'a tb'anilxi'x.
3Ayinwe' Dyos Manb'aj nchinx ka'yinte
ex q'achq'al nkub' nq'o'ne' a' tib'aj.
Nxinka'yine' q'ijtl ex qonik'an,
tu'n mlalun kub' yaju'n.
4Min nchin q'ojinwe' ti'j.
Naqwit ati ch'i'x ex taq'wix k'ul toj,
mawtlo tz'ok q'oj wu'ne' kyi'j
tek'witlo ẍeb'aj ntz'e'ysa'ne'.
5Qa tajb'il tu'n nkolone' ti'j,
lalun q'ojintl wi'je',
iku', lalun q'ojintl wi'je', chi Qman Dyos.
6Klok'alte' ttanam Jakob' toju' tq'ijlalil tzul,
kxulil Israel ex kb'echal,
ex knojel twitz tx'otx' tu'n twitz.
7B'ajx kub'a' ttz'e'ysana'te Qman Dyos kywitz aj Israel
kse'n t-se kyi'ju' e'yajunkye,
ex b'ajx che kub'a' tb'yo'n aj Israel
kse'n e'kub' tb'yo'na' xjal ekub'yonkye.
8Makub' ttz'e'ysa'n Dyos kywitz ttanam
mache'x t-xla'ja'n toj chq'ajlaj,
jun xupinx ẍe exa' t-xla'ja'n,
kse'n ntzajumin kyq'iq' toj tjawetzq'ij.
9Oktzun b'eltnajsa'n kyil tyajajil Jakob'
majx kb'el naju' kyil:
qama che kub'kytxiju'n tkyaqilju' q'olb'eb'l kye witzleb',
kse'n nche kub'quqixa' tab'jil txun,
tu'n lankyajkyq'o'ntl xmil xjansa'n
ex q'olb'eb'l tz'e'ysb'il sturak nimkye junxi'tl dyos.
10Xitjnitlju' nintnam kuwsa'n,
kse'n ja mix-alo'tl najalte,
kse'n chq'ajlaj mixti' xjal najli toj.
Naq te k'ik'leb'l wakxtel,
nche b'ajtwan tq'ob' tze ex nkupaqe.
11Nche kub' toqju' tq'ob' tze ajkytzqij;
intzun che'xju' qya sk'olte ex nok te kysi.
Jun tnamte' mixti'x tnab'l.
Qu'mtzun layx tzaj laqjtk'u'j
ju' ch'isante, aju' kub'inchante.
12Ktb'incha' Qman Dyos toju' q'ij lu,
tzajx Ewprates ponx ttzi nin a' toj Ejipt,
kse'n ntriyit triy;
aye'tzunkye' aj Israel che jawil q'i'ne' toj junjunali'n.
13Kxel q'ajtza'n ninchun toju' q'ij lu,
aye'tzu'n tzpetniqe' toj Asirya,
exqe' b'ajxniqe' toj Ejipt,
che tzajel k'ulul te Qman Dyos
toj Jerusalen, twi' witz xjan.
Who We AreWhat We EelieveWhat We Do
2025 by iamachristian.org,Inc All rights reserved.
