1 S 19 - Mam Ostuncalco Bible

Kub'toq tb'yo'n Sawul Dab'i

1Tchaq' Sawul te Jonatan ju' tk'wal ex kye kykyaqilju' nejenel te q'oj tu'n tkub' kyb'yo'n Dab'i. Atzunte Jonatan, qu'n kyetoqna' kyten tuk'i'l Dab'i,

2xitma'n tqanil te, kjalu:

—Intjyo'n nmane' tu'me'l tu'n tkub' b'yo'na tu'n. Qu'mtzun tz'ewana najchi'j ja lay kneta'ya.

3Chin tzajele' tuk'i'l nmane', ja tu'me'l ta'ya. Ex chin yolile' tuk'i'l ti'ja, kxe'l nma'ntzuntze' teya titi' kb'ajel, chij.

4Yolintzun Jonatan tuk'i'l tman ti'j Dab'i. Xitma'n te:

—Nimaqkawil, lalun tb'incha junta taq'wix ti'ju tmajina Dab'i, qu'n mixti'te taq'wix matxi' tb'incha teya, nim pe'na'te b'a'n matxi' tb'incha;

5taq'u' tchwinqlal tu'ntkub'ti'ju' Kolyat, ex kyim tu'n, ikytzu'n kleta' tkyaqilju' tnam Israel tu'n Qman Dyos. Tilna'ta nimaqkawil, ex tzalaja tu'n tpaj. ¿Tiqu'ntzun tajb'ila'ya tu'n tkub' tb'yo'na Dab'i, extzun mixti' til?, chij te.

6Tej tb'aj tb'i'n Sawulju' tu'me'l tz'aqlixi'x tma Jonatan, tmatzuntz:

—Lu Qman Dyos nka'yin, lay kyimte Dab'i, chij.

7Tzajtzun txko'n Dab'i tu'n Jonatan ex xitma'n tkyaqilju' b'aj kyoli'n. Yajxi'tzuntel xitiq'i'n twitz Sawul ex ajb'en junmajtl te kse'nxju' tnejel.

8Ttzaj jumajtlju' q'oj, ex etz Dab'i q'ojil kyi'ju' pilistey ex kub'kyi'j tu'n, nim e'kub'tb'yo'n, ex txqantl e'kub' oq.

9Atzuntlte Sawul, ul yajb'aj jumajtl tu'nju' myab'a'n xewb'aj chq'o'n tu'n Qman Dyos, q'uqlitoq tja ex tzyu'nju' tch'ut, intoqtzun chinb'an Dab'i,

10xit-xon jumajtlju' tch'ut ti'j Dab'i. Atzunte Dab'i lwiy el jutzpaj, xi'pona'tlu' ch'ut twitzja. Textzu'n qonik'an lu etz oq Dab'i.

11Lwiyxi'xtzun tchaq' Sawul kyeju' t-xjal tu'n kyxi' xq'uqilte Dab'i tja, ex tu'n tkub' kyb'yo'n te prim te juntl q'ij. Atzunte Mikal ju' t-xu'jil Dab'i, xitma'n te:

—Qa min soqa texju' qonik'an ja'lo, kb'el b'yo'na najchi'j, chij te.

12Extzun q'o'n Dab'i ti'j aqwil toj tokexspik'un tu'n Mikal, kub'tzun oq Dab'itz.

13Ex tzaj tiq'i'n Mikal jun witzileb' ex okxtq'o'n toj kuẍb'il, okxtq'o'n jun tq'axwe tzmal chib', ex jax t-sku'n jun xb'alun tib'aj.

14Tetzunj tchaq' Sawul kyeju' t-xjal tu'n ttzyet Dab'i kyu'n, xitma'n Mikal kye qa yab'toq.

15Atzunte Sawul e'xitchq'o'n jumajtl jyolte Dab'i, ex xitq'o'n chaq'b'il kye:

—¡B'a'ntzunqa yab' kyiq'imitze' ex kyiq'intze' tza'lu tu'n tkub' nb'yo'ne'!, chij.

16E'okxtzu'n t-xjal Sawul toj tja Dab'i, ex o'kxte' witzileb' exju' t-smal chib' knet kyu'n.

17Xitma'ntzun Sawultz te Mikal:

¿Tiqu'n ẍin kub'a' t-sb'u'na, ex matxittzaqpi'na wajq'oje?, chij.

Xi'tzun ttzaq'we'n Mikal:

—Qu'n ttziya qatoq chin kb'el tb'yo'ne' qa min sex ntzaqpi'ne', chij.

18Iktzu'n tzaqpaja' Dab'i. Xi'tzuntz tk'etz Samwel toj Rama, ex xitma'n te tkyaqilju' matxi'toq tb'incha Sawul ti'j. Exi'tzun Dab'itz tuk'i'l Samwel najal toj tnam Nayot.

19Tetzunj tb'inte Sawul qa atoqtzu' ta' Dab'i Nayot toj Rama,

20e'xitchq'o'nju' t-xjal tzyulte. Tetzunj kyponju' t-xjal Sawul, xikyka'yi'n jun tnej t-sanjelal Dyos nche yolin ti'ju' ntzaj tma'n Dyos kye, a Samwel nejenel kye. O'kx tkub' tenju' t-xew Dyos kyib'aju' t-xjal Sawul, ex ikxkye e'aq'wi yolil ti'ju' ntzaj tma'n Dyos.

21Tetzunj tb'inte Sawul, xitchq'o'n jun tnejtl xjal, ex ikxkye e'aq'wi yolil ti'ju' ntzaj tma'n Dyos. Toj toxmaji'n xit-sma'n Sawul jun tnejtl xjal, ex ikx b'aj ju' kyi'j.

22Aku'tzun Sawultz xi' Rama, tetzunj tpon tk'etz jun nin tkb'el a' toj Seku, xitqani'n jatoq ta'qe' Samwel ex Dab'i. Ex xijask'u'n te qa atoqtzu' ta'qe' toj Nayot te Rama,

23xi'tzuntz atzu'. Ex ikxte kub' t-xew Qman Dyos tib'aj ex aq'wi yolil ti'ju' ntzaj tma'n Qman Dyos, ex xitljo'n tb'e tzmax Nayot te Rama;

24expe' eltiq'i'nju' ti'j, ex b'aj q'ij ex qonik'an ẍb'iqli nyolin ti'ju' ntzaj tma'n Qman Dyos, twitz Samwel. Atzuntzu' tzaja' qeju' yol nq'umli: ¿Ma axtzun junte Sawul sanjelal?.