1B'ajxtoq tz'oka' jun nimaqkawil toj Israel toju' tq'ijlalil lu. Ex na'mxtoq tten kytx'otx'ju' tyajajil Dan kyeku', qu'mtzun intoq che jyon ti'j jatu'n kykub'a' ten.
2Qu'mtzun exi' kychq'o'n tyajajil Dan jwe' ichan min nche xob', te nenul toj ewaj ex ka'yilteju' tx'otx', e'tzajx toj tnam Sora ex Estaol. Exi'ju' jwe' nenul toj ewaj lu kywi'witz te Eprayin ex e'pon tja Mikayiy, jae'kyaja'ten te qonik'an.
3Tej kypon tk'etz tja Mikayiy elkynik' teju' yolin ku'xun aj Leb'i, ex exi' qanilte te:
—¿Alkye tzaj q'inteya tza'lu? ¿Tiqu'n atiya tzalu? ¿Titi' in tjyo'na tzalu? chechij.
4Xitma'n aj Leb'i ojetoq kyej b'entti'j tu'n Mikayiy tuk'i'l kye, ex se'n oka' te tpale.
5Aye'tzunkye xikyma'n te:
—Qaninxa te Qman Dyos tu'n qb'inteye' qa b'a'n k'elela' qb'eye' ljo'n, chechij.
6Xitzun ttzaq'we'n pale aj Leb'i kye:
—Lalun che b'isune', che xq'uqinjtzelkye' tu'n Qman Dyos jaxjaku' mache'xa'ye', chij kye.
7Exi'tzu'n jwe' nenultz toj ewaj toju' nintnam Lays. Aye'tzu'n xjal najlqe'toq toju' nintnam lu, intoq che anq'in toj nak'b'il ex q'uq'li kyk'u'j, kse'nxtoq nche anq'ina' aj Sidon; nak'b'iltoq ta'qe' ex mixti' xitb'il kyxol, mix-a'lo' yekulkye ex tkyaqil ati kye. Najchaqtoq ta'qe' kyk'etzju' aj Sidon, ex mix-a'lo' quk'i'l ta' kymojb'ab'l.
8Anjtzun kyi'ju' jwe' nenul toj ewaj lu Sora ex Estaol, jatoq ta'qe'ju' kyuk'i'l, ju' exi qaninte kye ikjalu:
—¿Se'n ẍe oka'ye'? chechij.
Aye'tzunkye xikytzaq'we'n:
9Matxi' b'aj qb'eti'nqe' tx'otx' lu, majx tb'anilte' ¡Lwiyqe'xe'! ¡Qo'qe'ye' q'ojil kyi'j! ¡Lalun naq che kyej qeye'! ¡Ati tu'n qxi' kub'salteti'ju' tx'otx' lu!
10Okpe' kyla'ye' ajqpon atzu', q'uqlixi'x kyk'u'ju' xjal ex nim kytx'otx' ati, ex tkyaqil ati kye. Ktzajel tq'o'nte Qman Dyos tx'otx' lu qe, chechij.
11Junk'al lajnaq (600) ichan tyajajil Dan e'etz Sora ex Estaol iq'i'mile kyq'ojb'il,
12e'pontzuntz Juda ex e'kub'ten atzu', toj tkub'exq'ij te Kyiryat-jearim, toju' najb'il majx ok tb'i kyxmuj tyajajil Dan.
13Exi'tzuntz twi' witz te Eprayin, ex e'pon tja Mikayiy.
14Aye'tzu'n jwe' nenul toj ewaj ju' ojetoq kyka'yiju' tx'otx' Lays, xikyma'n kyeju' kyuk'i'l:
—Kyb'intzpekye', ati jun ẍa'y ex e'dyos kyaju' xjal najlqe' tzalu, ex ati jun tilb'ilal b'incha'n ktxu'nkti'j tu'n saqpwaq, ¿Titi' nkyxima'ne' tu'n qb'inchante ti'j? chechij.
15Eltzun kypa'n kyib'ju' nenul toj ewaj kyi'ju' txqantl kyuk'i'l ex exi' tk'etzju' ku'xun aj Leb'i tja Mikayiy, ex xikyq'olb'e'n.
16Aye'tzu'n Junk'al lajnaq (600) xjal te q'oj tyajajil Dan iq'i'mile kyq'ojb'il intoq che ayon ttzija.
17Nejtl kyb'jo'kxju' jwe' nenul toj ewaj tuja ex etzkyiq'i'n witzleb' ktxu'nti'j tu'n saqpwaq, exju' ẍa'y exqe' dyos toj kyjaju' xjal, atzu'n pale atoqtzu' ta' ttzija kyuk'i'lju' junk'al lajnaq (600) xjal te q'oj.
18Tetzunj tka'yinteju' pale intoq che okxju' jwe' toj tja Mikayiy ex intoq etzkyiq'i'n witzleb', ex ẍa'y exqe' dyos toj kyja xjal, xitma'n kye:
—¿Ti'tzu'n nb'ajkyeye'? chij.
19Xitzun kytzaq'we'n te:
—¡K'ultziya ex kuttzaja quk'i'le'! ¡Qajb'ile' tu'n tajb'ena qeye' te qpaleye' ex tu'n toka te manb'aj qeye'! ¿ma myatzun b'a'n toj twitza tu'n toka te pale te jun tnej tyajajil Israel, kyetwitz naq te jun ja xjal? chechij.
20B'a'n ela'ju' lu toj twitzju' pale, xi'tzuntz kyuk'i'l tyajajil Dan tuk'i'lju' tilb'ilal ex ẍa'y exqe' tilb'ilal toj kyja xjal,
21xikyljo'ntzun jumajtl kyb'etz kyuk'i'lju' kyk'wal, kyalu'n ex tkyaqilju' ati kye nejliqe' kywitz.
22Nimtoqtzun matxitoq txi' kyb'eti'n tej tb'aj kyb'u'yi'n kyib' Mikayiy kyuk'i'lju' tb'esin ex exi' knolkye.
23Tetzunj kyb'inte tyajajil Dan inxi'xtoq che ẍch'in lepchiqe'x knolkye, anjtz miltz'uj kyi'j ex xikyqani'n te Mikayiy:
—¿Titi' nb'ajteya? ¿titiqu'n inxi'x ẍch'ina qi'je'? chechij.
24Xitzun ttzaq'we'n Mikayiy kye:
—Mache tzaj kyiq'i'nju'ye' ndyose' b'incha'nqe' wu'ne', ex matzaj kyiq'i'ne' npaleye' ex mixti'tl xkyaj kyq'o'ne' weye', ¿extzun inx tzaj kyqani'ne' titi' xb'ajweye'? chij.
25Xitzun kytzaq'we'n tyajajil Dan te:
—Lalun jaw toj twi'ya kuw qi'je', qu'n jaku' tzaj toj kywitz junjun qxole', jakutzun che oktzaqpajtz q'ojil kyi'je' tu'n tb'aja exqe' toj tjaya, chechij.
26Atzunj tka'yinte Mikayiy nimtoq txqan kyb'aj, anjti'j tja; aye'tzu'n tyajajil Dan xikyljo'n kyb'e
27kyuk'i'lju' ti'xti' e'kub' tb'incha'n Mikayiy, exju' tpale, e'pontuntz tzmax toj Lays. Eb'ajkub' kyb'yo'n tyajajil Dan kykyaqilju' xjal atzu' tu'n k'uẍtx'e'nb'il ex okkyq'o'n tq'aq'alju' nintnam, qu'n tojtoq nak'b'il ta'qe' xjal lu ex mixtoqti' inb'ajx kyk'u'j,
28Mix-a'lo'te klonteju' nintnam lu qu'n najchaqtoq ta' tk'etz Sidon, mixtoq jalojaxta' tmujb'ab'l. Xi'toqta' toju' b'ya' te B'et-reob'. Yajxi'tzuntel jawkyb'incha'ntl tyajajil Dan nintnam ex e'kyajten najal atzu'.
29Lays tb'iju' tnam lu tnejel, aye'tzunkye okkyq'o'n tb'i Dan, te ninb'ilte tb'i ojtxi' kyyajilb'en, ju' tk'wal Israel.
30Atzuntzu' kub'a' kyq'o'n tyajajil Dan, witzileb' b'incha'n, tu'n kyk'ulun te, ex a Jonatan okkyq'o'n te pale, tk'wal Kerson ex tchman Moyses. Yajxi'tzuntl aye' tyajajil Jonatan e'ok te kypale tyajajil Dan, tzmaxi'j kyxi' iq'i'n toj juntl tnam.
31Kyxol tena'ju' witzleb' kub' tb'incha'n Mikayiy toj tkyaqilju' tq'ijlalil tej ttenju' ja xjan te Qman Dyos toj Silo.
Who We AreWhat We EelieveWhat We Do
2025 by iamachristian.org,Inc All rights reserved.
