1 S 18 - Mam Ostuncalco Bible

Kyma Jonatan ex Dab'i jun kyyol tu'n kyok kyekyten.

1Tb'ajlenxi'tzun yolin Dab'i tuk'i'l Sawul, kamiwkyib' Jonatan tuk'i'l Dab'i, ex e'ok kyekyten, naku'j kyitz'inkyib'.

2Atzunte Sawul, kyej tiq'i'n Dab'i texju' q'ij lu te ajb'el te, ex mixti' anj ttzaqpi'n tja.

3Atzunte Jonatan tuk'i'l Dab'i kyma jun kyol tu'n kyok kyekyten tejumajx, qu'n ok Jonatan b'a'n xjal te Dab'i kse'nxju' in tk'u'jla'ntib'.

4Expe' eltiq'i'n Jonatan tpinpa't exu' t-xb'alun oksa'nktoq, ex e'xitq'o'n te Dab'i, kyuk'i'lxi' tk'uẍtx'e'nb'il, t-smaj ex tk'alb'il.

5Tye'k'u Dab'i tojtzqib'l ex tnab'l tu'nju' taq'un in b'entile tkyaqilxu' intoq xitma'n Sawul te, qu'mtzun okq'o'n te nejenel kyeju' xjal te q'oj. Ex b'a'n ela' toj kywitz kykyaqilu' t-xjal Sawul te q'oj exqe' nejenel kyxol.

El i'k'o'n Dab'i tu'n Sawul

6Tetzunj tanjtzkyi'ju' xjal te q'oj, tkyimlenxi' Kolyat tu'n Dab'i, eb'je'tzju' qya kyojile nimaqkytanam aj Israel k'molte nimaqkawil Sawul, intoq che b'itzan ex nche b'ixin tuk'i'l tzalajb'il kyuk'i'l kychinab': chilchil ex txijtxij.

7Tetzunj intoq che b'itzan ex intoq che b'ixin, intoq kyma'n:

Mache kyim kab'k'al lajnaq (1,000) tu'n Sawul,

atzun junmutx' jo'k'al (10,000) tu'n Dab'i, chechij.

8Tzaj toj twitz Sawul tu'n tpaj, jawtma'ntzuntz tuk'i'l ttx'u'jil:

—In q'umli qa junmutx' jo'k'al (10,000) xjal xkyim tu'n Dab'i, atzunwe' naq o'kx kab'k'al lajnaq. (1,000) ¡Naq tu'n tok kyq'o'ntl te nimaqkawil ja'lo!, chij.

9Atxi'xtzunj el ik'o'n Dab'i tu'n Sawul.

10Te junq'ijtl, ulju' myab'a'n xewb'aj tu'n Qman Dyos tib'aj Sawul, ex oktojtwitz toju' tja te kawb'il. Intoq tchinb'a'n Dab'i arpa kse'nxju' ntb'incha'n, atzunte Sawul iq'i'ntoq tch'ut.

11Ex minab'en okmiltz'uj Sawul b'yolte Dab'i, kamajku' pon t-xyu'n twitz tapi tu'n tch'ut, naq ate' Dab'i tkoltib' te.

12Tzaj xob' Sawul te Dab'i, qu'n intoq oninjtz Dab'i tu'n Qman Dyos, atzunte matxitoq kyej tzaqpi'n.

13Qu'mtzun el tlaq'b'a'n tk'etz, ex oktq'o'n te chaq'ul kye jun tnej xjal q'ojil, nejlitoq Dab'i kywitz ajkyex ex ajkyultl.

14B'a'niletoq inela' taq'un Dab'i, qu'n o'ni'ntoq tu'n Qman Dyos.

15Tzaj xob'xi'xtl Sawul te, tej tka'yinte b'anile tel Dab'i.

16Kykyaqiltzunju' aj Israel ex aj Juda intoq che tzalajxi'x ti'j Dab'i, qu'n a Dab'i nk'ulkye ajkyex toj q'oj ex ajtanjtzkyi'j.

17Jun q'ij xitma'n Sawul te Dab'i:

—Kxe'l nq'o'ne' tnejel nmyale' Merab' te t-xu'jila, qama tz'oka nimaq q'ojil min xob' ex kq'ojila toju' q'oj te Qman Dyos, chij te.

Kub' t-xima'n Sawul qa myaku'te kb'el b'yonte Dab'i, xkyimku'witloj toj kyq'ob' pilistey.

18Atzunte Dab'i xittzaq'we'n:

—Mixti'we' woklen ex mixti' kyoklenju' toj njaye' kyxol aj Israel, tu'nwtlo woke' te tji nimaqkawil, chij.

19Tetzunj tpon tq'ijlalil tu'n txi' tq'o'n Sawul Merab' ju' tmyal te t-xu'jil Dab'i, mixti' xiq'o'ntl te, xi'xa'q'onatl te Adryel aj Meola.

20Atzuntlte Mikal, juntl tmyal Sawul, intoq laqj ti'j Dab'i. Tetzunj txi' q'ma'n te Sawul, tzalaj tej tb'inte,

21qu'n kub' t-xima'n tu'n txi' tq'o'n te t-xu'jil Dab'i, naqxwitlo tu'n tkub' tz'aq Dab'i tu'n Mikal toj kyq'ob' pilistey. Xitma'ntzuntz tkamaji'n te Dab'i:

—K'okyelta te njiye' ja'lo, chij.

22Tchaq'tzun Sawul kyeju' nche ajb'en te kjalu:

—Che yolinqeye' tuk'i'l Dab'i ex kymanxe' te qa ayine' nimaqkawil, nchin tzalajxi'xe' ti'j ex kykyaqilju' ajb'el weye' nche tzalaj ti'j, exqa ilti'j tu'n tok te njiye'.

23E'xi'tzu'n ajb'el te Sawul q'malte tkyaqil ja'lu te Dab'i, atzunte Dab'i xittzaq'we'n kye:

—¿Ma naqch'i'n toklen toj kywitze' tu'n tok jun xjal te tji nimaqkawil kse'n ayine' prowqine' ex mixti' woklene'?, chij.

24Exi'tzu'n ajb'el te Sawul q'malteju' tma Dab'i te.

25Atzunte Sawul, atoqna' tajb'ilju' tu'n tkub' tz'aq Dab'i toj kyq'ob' pilistey, xitma'n kye:

—Kymanxe' te Dab'i qa min nojqelan tu'n ttzaj tq'o'n kse'nxju' nkyb'incha'n xjal te twi' t-xu'jil, awe' wajb'il, ayine' nimaqkawil, tu'n ttzaj tq'o'n jo'naq (100) ttxo'w kypich' pilistey, tu'ntzun tok tu'me'l t-xel kye wajq'oje, chij.

26Aye'tzunju' ajb'el te Sawul xikyma'nju' lu te Dab'i, ex b'a'n ela' toj twitz Dab'i noqxwitlo tu'n tok te tjiju' nimaqkawil. Na'mxtoqtzun tjapun tq'ijlalil kyejni b'entti'j,

27exi' Dab'i kyuk'i'lju' t-xjal te q'oj, ex e'kub' tb'yo'n lajnaq (200) pilistey; ex exi' tiq'i'n kytz'umal twi' kytz'a'lb'il teju' nimaqkawil, tu'n tok te tji. Xi'tzun tq'o'n Sawul Milka ju' tmyal te t-xu'jil Dab'i.

28Tetzunj tka'yinte ex tej teltnik' Sawul qa intoq onin Qman Dyos tuk'i'l Dab'i exqa intoq k'u'jlanjtz tu'n Mikal ju' tmyal,

29tzaj xob'xi'xtl te Dab'i twitzju' tnejel, ex ok te tajq'oj tejumajx.

30Expe' tkyaqil maj ajkytzaju' kynejel pilistey toj q'oj, b'a'nxi'xtoq nela' tu'n Dab'i kyekywitz kykyaqil txqantl nejenel kye t-xjal Sawul te q'oj, qu'mtzun inxi'xtoq nimanjtz.