Pr 8 - Mam Ostuncalco Bible

Ntxokonju' nab'l

1Intxokon nab'l;

ex njaw tq'ojq'ojel twi' k'atzil.

2Inkub'we' twi' b'us,

nkub' we' toj kyajb'e,

3nkub'ten janqo okxa' toj nintnam,

njaw tma'n kuw ttzi nintnam kjalu:

4Inchin yoline' kyeye' xjal.

5Ku'xun mixti' kyojtzqib'le' ex xnakqe'ye',

¡che okxe' ati kynab'le' ex che ximane' b'a'n!

6Kyb'intzpeye', che kxe'l nma'ne' yol nim kyoklen

che kxe'l nma'ne' tu'me'lqexi'x kyeye'.

7Axte' kxe'l nma'n kyeye';

inel wik'o'nwe' chajyolil.

8tkyaqilju' nyole' japumnixi'x;

mixti' chajyolil toj.

9Chik'li qe'we' nyol teju' xjal k'atz,

ttxolilti'j teju' nkane toj twitz.

10Kyknome' xnaq'tzb'il ex ojtzqib'l wu'ne',

te t-xel q'anpwaq ex saqpwaq. Chij.

11Nimxi'x toklenju' nab'l kyekywitzju' tb'anil ab'j;

¡jni'xpe' achb'ajil toj kywitz xjal layx pon ikyju'!

12Ayine' nab'l, junx qele' tuk'i'lju' k'atzil,

ayine' q'ol tb'anil nab'l.

13Qama jaw qnima'n Qman Dyos, k'elel qik'o'n taq'wixil.

nnel wik'o'ne' nimjtib'il ex jamjoni'n,

e'tb'eyil taq'wix ex chajyolil.

14Weye' xim ex wu'ne' njapuna',

ayinwe' k'atzil exju' ipumalj.

15Wu'ne' nb'enta' kykawin nimaqkawil

ex wu'ne' nkyq'o'n oklenju' ajkawil.

16Wu'ne' nche' kawinju' nejenel kye nimaqtnam

exqe' ati kyoklen nkub' kyq'o'n kykaws xjal.

17Atiwe' nk'u'j kyi'ju' nche k'u'jlanweye',

ex nchin knete' kyu'nju' nche' jyon wi'ye'.

18Wuk'i'le' ta' q'inumal ex oklenj,

nimaq oklenj ex tkyaqilju' nche jawb'ent.

19Tb'anilxi'x ju'we' inq'o'n kyetwitz q'anpwaq;

tb'anilxi'x ju'we' inq'o'n kyetwitz saqpwaq.

20Tzinun ti'ju' nb'eye',

toj tb'eyil tnik'alilti'j.

21Inxi' nq'o'ne' kyetzb'ilju' nche' k'u'jlanweye':

noju' toj kyja tu'n k'uwenj wu'ne'.

22Ayinwe' nb'ent tnejelxi'x tu'n Qman Dyos,

na'mxtoq ttzyet tb'inchet tkyaqil.

23Nkub' tb'incha'ne' atxi'x t-xe tnejel,

nej nkub' tb'incha'ne' twitzju' tx'otx'.

24nitz'je' na'mxtoq tb'inchanjtzju' ninnjab',

na'mxtoq tpoq'chaju' nin a' exju' t-xiklil a'.

25Na'mxpetoq kywe'xi'xu' witz exqe' k'ul,

ojetoq chin b'entwe' tu'n Qman Dyos;

26na'mxtoq tkub' tb'inchanju' tx'otx' exqe' kojb'il,

jni'ju' quq kytx'otx'al tkyaqil.

27Atinqintoqwe' twitz Qman Dyos

tej tkub' tb'incha'nju' kya'j tib'aj ninnjab'.

28Tej tb'antju' muj twitz kya'j

ex kub' tb'incha'xixu' t-xiklil a' toj ninnjab',

29tej txi' tma'n teju' ninnjab'

tu'n lalun tz'ex ttziyile,

tej tkub' tq'o'nju' tq'uqlil tx'otx',

30majxtoq atinqine' tuk'i'l.

Ayinqintoqe' ttzalajb'il kukxju',

atl junjun kmuj nchin xchane' twitz;

31nxchane' tej tb'antu' twitz tx'otx',

¡intoq chin tzalaje' kyi'ju' wnaq!

32Atzu'n ja'lo, nk'yajul chin kyb'itze';

tzalajb'ilte' kyeye' qama che lpeye' wi'je'.

33Kyb'inxju'ye' xnaq'tzb'il;

lalun kyik'u'ye' nab'l.

34B'a'nta'te' xjal nchinx tb'i'ne',

ex nchin tjyo'ne' toju' njaye' atl junjun q'ij.

35Qu'n alkyete' machin knete' tu'n, inknet tchwinqlal

tuk'ilju' t-xtalb'il Qman Dyos;

36alkyetzunte' matz'el tpa'ntib' wi'je', qab'anx twitz;

¡alkyete machin neltik'u'ne', nlaqj ti'j tkamik! Chiju' nab'l.