1¡Che b'itzan qe'ye' te Dyos tuk'i'l tzalajb'il, qu'n ate qipumal!
¡Kyajwalinktze' Dyos ja ajb'ena' Jakob' tuk'i'l sich' te tzalajb'il!
2Che b'itzan qe'ye' tuk'i'l tq'ojq'ojil tanb'orin,
tuk'i'l chnab' arpa ex tzintzin.
3Che chinb'anqe'ye' ti'j chun aj tka'yin xjaw,
ex aj t-xk'o'mix xjaw,
qu'n a ninq'iju' qe.
4Qu'n a chaq'b'ilju'
tzaj tq'o'n Dyos kye aj Israel ja k'uluna' Jakob';
5a chaq'b'ilju' tzaj q'o'n te Jse
tej tetz Dyos ti'j Ejipt.
Xinb'i'ne' jun tq'ojq'ojel wi'yj min ojtzqi'n wu'ne':
6Matxi' tz'el wiq'i'ne' iqtz ti'j tqula,
matxi' nkolpiya toju' aq'untl kuw.
7Inttxoka toju' yajb'il ex makleta wu'ne';
tzaj ntzaq'we'na tzmaxtzu' toj muj in julin;
kub' nq'o'na toj joyb'ilti'ja ttzi a' Merib'a.
8B'intzju'ya kxel woqxena'ne' teya ntanam;
¡noqwit ikj chinx tb'i'na, aya Israel!
9Lalun che kub' tq'o'n tdyosa te junxi'tl tnamqe';
ex lalun k'uluna kye junxi'tl dyos.
10Ayinwe' Dyos Manb'aj,
inetz q'inteya toj Ejipt;
qanintza twaya ex knnojsa'ya, nchije'.
11Atzunte' ntaname' mixti' ẍinx tb'i'ne';
¡Mixti'x ẍinx toksla'ne' Israel!
12Qu'mtzun ẍe kyeja' ntzaqpi'ne' toju' tch'uẍal kyanmi.
ex mache anq'in kse'nxju' kyajb'il.
13¡Noqwit ma chinx tb'i'nju'ye' ntaname'!
¡Noqwit mab'et Israel kyoju' nb'eye'
14tojwitlo jun kmujx
ẍekub'a' nme'ssa'nju'ye' tajq'oj
ex mawtlo kub' ntz'e'ysa'n kywitzju'ye' ẍeokmiltz'uj ti'j! Chi Dyos.
15Ma'wtlo che kub'mejeju' nche el ik'unte Qman Dyos,
ex ma'wtlo kyej tenju' tz'e'ysb'il kywitz tejumajx.
16Ma'wtlo tzaj tq'o'n Dyos tb'anil triy te kywaju' ttanam,
ex ta'lkab' witlo toj aq saj tq'o'n tu'n tel k'waj kyi'j. Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
