Ez 26 - Mam Ostuncalco Bible

Tpakb'alilju' tzul ti'j nintnam Tiro

1Tzaj yolin Qman Dyos weye' toj jun tajlal xjaw toj junlajoj (11) ab'q'i, ex tma:

2Matxi' yolin Tiro ti'j Jerusalen kjalu:

¡Matxi' b'ajkub' piẍju'

tjpel k'aẍjel kyxol nimaqtnam!

¡Matxi' pon kmoj weye'!

Chin q'inumaxelwe'

Atzunte kjel xitj, chij.

3Qu'mtzun inma'ne', ayine' Dyos Manb'aj, kjalu:

Tiro, chin okyele' te tajq'oja.

Knb'incha'ye' tu'n kyq'ojin txqan nimaqtnam ti'ja,

kse'n njaw ttolob' ninnjab',

4ex tu'n kyb'aj kyxitu'n nintapi ti'jileya

tu'n kykub' kytx'u'yi'n ja nimaq kywe' toja.

Okpe' kb'je'lel wiq'i'ne' quq jata',

naq jun pik sqitli kjel nq'o'ne'.

5Kjelten kse'n jatu'n kytzqijseta' pa

toj nky'ajchaq ninnjab'.

Ayine' Dyos Manb'aj nchin q'mante.

Kb'je'lex kyalq'a'n nimaqtnam toj Tiro,

6ex che b'ajelju' tnej ja toj kuw tx'otx'

tu'n k'uẍtx'e'nb'il.

K'eleltzun kynik'tze' qa ayine' Dyos Manb'aj.

7Ayine' Dyos Manb'aj nchin yolin:

Ktzajel wiq'i'ne' Nab'ukodonosor

nimaqkawil aj B'ab'ilon toj tb'a'nq'ob'kya'j

aju' nimaqkawil nimxi'x tipumal,

tu'n tq'ojin ti'j Tiro.

Tzul kyuk'i'l chej ex karwaj, ex chejil,

kyuk'i'l txqan xjal te q'oj b'u'yi'nkyib'.

8Che kb'el tb'yo'n najlqe' kyoj tzb'oj tjaya toj kuw tx'otx'

tu'n k'uẍtx'e'nb'il;

kjawil tb'incha'n jun maqb'il ti'jileya,

kjawil tch'uqi'n tx'otx' tu'n tq'ojin ti'ja

ex che ultchq'o'n xjal te q'oj ti'ja q'i'nile kykolb'il.

9Kb'ajel t-xitu'n nintapi ti'ja tu'n pab'l

ex che b'jawil tqotx'pi'n tjaya nimaq kywe' tu'n k'uxb'il.

10ajtokx nimaqkawil aj B'ab'ilon kyoju' tjpela

kse'n aj kyokx lipan eleq' toj jun nintnam,

nim txqan chej che okyex,

kb'el jupliya tu'n quq kjawil kyu'n;

che lu'lulju' ninttapiya

tu'n kyq'ojq'ojel tkarwaj ex tchej;

11Che b'etelju' kychej tuk'i'l kyxajab'

kyoj kykyaqil t-xk'ichb'eya.

Che kb'el tb'yo'n ttanama tu'n k'uẍtx'e'nb'il,

che b'elt-xonju' tqan tjaya kuwqe' twitz tx'otx'.

12Kxe'l kyiq'i'n tkyaqilju' tq'inumala,

kb'ajxe'l kyelq'a'n tk'aẍjela,

che b'ajel kyxitu'n nintapi ti'jileya

che kb'el kyxitu'n tja ninkawb'il toja;

che b'ajex kyxonju' kab'jil toj ninnjab',

e'tptzo'nil ex tkyaqilu' ttx'anqa'ntl.

13Ikytzu'n kmankul kytxa'n tb'itza wu'ne',

ex lay b'injtztl kyq'ojq'ojel tchinab'a arpa.

14Kjel sle'jixa wu'ne' kse'n jun sk'o'j pik,

jatu'n kysa'yeta' pa.

ex layx jaw b'incha'n jumajtla.

Ayine' Dyos Manb'aj matxi' chin yolin;

nchin q'mante.

15Ayine' Dyos Manb'aj, nxinma'ne' te Tiro: Che lu'lulju' tnam ttzi ninnjab' ajkyb'inte tq'ojq'ojel ajtkub'ti'ja, nxi'x t'i'njeya toj k'ixb'len ex nche b'yonjtzju' xjal najlqe' toja.

16Kykyaqilju' nimaqkawil ttzi ninnjab' che eletz toju' kyq'uqb'il, kb'je'lel kyiq'i'n kypinpa't ex kyxb'alun tz'so'n tilb'ilal toj; xob'jniqe'xi'x, che kb'el qe twitz tx'otx', nche ch'ikch'on tkyaqil kmuj ex k'okyil tchi kyi'j ajtka'yinjtza kyu'n.

17Oktzun xelkyb'itza'n b'itz te kyimni ti'ja kjalu:

¡Se'n taq'wi xkub'xitja,

se'ntaq'wi xkub'naja ttzi ninnjab', nintnam nxi'x jaw nima'na!

¡Nimxi'xtoq tipumala kyuk'i'l xjal najlqe' toja, toj ninnjab'

kub' tq'o'na xob'el toj tkyaqilju' tnej tx'otx'!

18Atzu'n ja'lo matxi' kub'ti'ja,

nche ch'ikch'onju' nimaqtnam ttzi ninnjab' tu'n kyxob'el.

Tu'ntzu'n matxi' kub'naja,

matxi' tz'ok tchi kyi'ju' piẍ tx'otx' toj ninnjab', chechi.

19Qu'n a inma'nju'ye', ayine' Dyos Manb'aj: Xitjnitla kjel nq'o'ne', kse'nqe' nimaqtnam mix-a'lo' najli kyoj. Knb'incha'ye' tu'n tkyaj mulq'aja toj a' t-xe ninnjab',

20ex tu'n t-ximulq'aja tzmax ja ta'qe' kyimni, aye' xjal e'najan ojtxi'. Kb'elex nx'ona tzmax t-xexi' tx'otx', toju' tx'otx' noq tik'lentl tejumajx, ex ktenb'ela kyxolju' oje che kyim. Lay che najantl xjal toja, ex lay jaw b'incha'ntla twitzju' tx'otx' kyxolu' nche anq'in.

21K'okyela wu'ne' te xob'sb'il, ex lay najantla. Kjyonjtzela, ex lay knetla. Ayine' Dyos Manb'aj nchin q'mante, chi Dyos.