Is 18 - Mam Ostuncalco Bible

Tpakb'alilju' tzul kyi'j aj Etyopiy

1¡Layqe'xwitju' najlqe' toju' tx'otx' janjumina' kyq'ojq'ojel naku'j secha'l,

aju' tx'otx' kyi'jxi'ju' nin a' toj Etyopiy,

2nchex tchq'o'n t-xel ttzi nin a' Nilo,

nche b'et kyoj b'ark ajlajqe' tib'aj a'!

Kukyxi'ye', sanjelal ojqel che b'ete',

ka'yilte jun tnam nimin twe' ex nqoptz'aj ttz'umal,

jun nintnam xob'le'n toj tkyaqil plaj,

jun tnam kuw ex nimaltib'

najli toj jun tx'otx' a'li'n kyu'n nimaq a'.

3Kykyaqile' najlqe'ye' tkyaqil twitz tx'otx',

kkyla'ye' ajtjaw techlal twi' witz,

kkyb'i'ye' ajtq'ajti chun.

4Tzaj tma'n Qman Dyos weye':

Ktzajel nka'yi'ne' tzmax jata'qine'

kse'n spik'un toj jun q'ij q'ijal,

kse'n muj toj ta'l che'w ajtjaw awal.

5Ajtb'aj tb'echanju' tqan ub'a,

ex ajtokju' tb'echil te lob'j ub'a,

na'mtoqtzun tpon tq'ijlalil tu'n tb'uyet,

kb'je'lel ẍtilsa'n tq'ob' tu'n kchil,

kb'je'lel tx'e'mu'n ex che elex xon.

6Tkyaqil che kjel xon kywi' witz

kye pich' ch'yol txkup

ex kye tojk'ul txkup.

K'elexju' q'ijal na'tz kyu'n pich',

ex kykyaqilju' tojk'ul txkup

che kjelten atzu' toju' jb'alil.

7Tojtzu'n tq'ijlalil lu

kb'ajtzajel q'in toyaju' tnam

te Qman Dyos nimtipumal

aj nimin twe' ex nqoptz'aj ttz'umal,

jun nintnam xob'le'n toj tkyaqil plaj,

jun tnam kuw ex nimaltib',

najli toj jun tx'otx' a'li'n kyu'n nimaq a'.

Che ulel q'i'n twi' witz Syon,

ja nna'njtza' Qman Dyos nimtipumal.