Is 34 - Mam Ostuncalco Bible

Tz'e'ysb'il kywitz aj Edom tu'n Dyos

1Che lq'eqe'tze' b'ilte, tnam;

kyb'inku'ye' nimaqtnam.

Tu'n tb'inteju' tx'otx' exqe' ate' twitz,

tu'n kyb'inte twitz tx'otx' exqe' nche tzaj ch'iy twitz.

2Qu'n nq'ojin Qman Dyos

kyi'ju' nimaqtnam ex kyi'j kykyaqil kyxjal te q'oj,

matxi' kub'tb'incha'n tten tu'n kykub'najset ex tu'n kykyim.

3Che kjel tzaqpi'n kyimni,

okxi'x che b'eltzu'wixju' kyimni

ex kqojlel chik' kse'n a' kywi'witz.

4Che kb'el yulj kykyaqilju' che'w twitz kya'j,

kjawil tb'altz'i'ntib'ju' kya'j

ex kykyaqilju' che'w che b'elyupj,

kse'n nkub' tzqij ex nkub' tz'aq

jun t-xaq ub'a mujqa t-xaq iw.

5Qama jawb'ent tk'uẍtx'e'nb'il Qman Dyos twitz kya'j

ex kb'eltz'aq tib'aj Edom,

matxi' kyimju' tnam q'ma'ntl tu'n tb'aj.

6Kb'ajel txa'j tk'uẍtx'e'nb'il Qman Dyos toj chik' ex unt,

kse'n ajkykub' b'yet qpoj tman rit ex ttxu chib' te chojb'il.

Ktb'incha' Qman Dyos jun chojb'il toj B'osra,

nim b'yojxjali'n kb'ajel toj Edom.

7Che kb'el b'yo'n kse'nqe' tojk'ul wakx,

qpoj tman wakx ex tman wakx;

Kb'ajel txa'ju' kytx'otx' tu'n chik',

ex kb'ajel naju' quq tu'n unt.

8A q'iju' lu tu'n tok tu'me'l t-xel tu'n Qman Dyos,

a ab'q'iju' tu'n tel k'as tu'n tpaj Syon.

9Che jawil b'entju' a' toj Edom te q'ol,

atzu'n quq te atz'an;

kk'antelju' tx'otx' kse'n q'ol.

10Lay yupj q'ijtl ex qonik'an;

kb'uqchajel t-sb'el kukxju'.

Nimtoj tq'ijlalil kjel tzaqpi'n;

milo k'ik'ela'tl jun xjal atzu'.

11Atzu' che najala' tukru ex xitx',

ex kkyb'incha' joj ex ẍchin kyja.

Kjel tq'o'n Qman Dyos tx'otx' lu

chq'ajlajtl ex tz'inun toj.

12Lay tentl jun nimaqkawil tu'n tkawin toj;

che kb'el naj kykyaqilju' nejenel toj.

13Che ch'iyel ch'i'x kyoju' tja nimaqkawb'il,

ex la kyoju' ja kuwsa'nqe'.

K'okyel te kynajb'il xo'j

ex kykolb'ilkyib' pich' naku'j t'iw.

14Che tenb'elju' twiẍ k'ul junx kyuk'i'l xo'j,

kb'ajel kytxko'nkyib'ju' chib'.

Atzu' knajala' xob'tzal nxob'san te qonik'an,

ex k'elelyal tnajb'il jatu'n tojlana'.

15Ktb'incha' tukru tpaqb'il atzu'.

kjoyol ex che itz'jel tal,

ex che b'ajel tb'u'yi'n tu'n kyklet tu'n.

Ex atzu' kyb'u'yi'ya'kyib' q'anjel,

junjun ma' tuk'i'l junjun ttxu.

16Kyka'yinku'xe' tuj Qman Dyos ex kyẍch'inku'xe':

Kykyaqilju' txkup lu che tenb'el,

kykyaqilju' ma' ktenb'el jun xuj kye,

qu'n aku' Qman Dyos xkub' ximante

ex che b'ajel tb'u'yi'n tu'n jun xupin.

17Matxi' tzaj tyek'u'n kynajb'il teyile junjun,

matxi' tzaj tyek'u'n kytx'otx',

ex che b'elten twitz tejumajx;

che najal toj tkyaqil tab'q'iyil atzu'.