1Tzaj tma'n Qman Dyos te Moyses kjalu:
2Aye' chik'b'ab'l ja'lu tu'n t-ẍtilset jun yab' tu'n xlemtx'a'k: ati tu'n t-xi' iq'et twitz pale,
3k'elexju' pale ti'jxi'ju' najb'il tu'n tok tka'yi'n. Qa matxitoq b'anixju' xlemtx'a'k ti'ju' yab',
4kxe'l tma'n tu'n kytzaj iq'i'n kab'e' tal pich' ẍtilun ex itz'qe', tze k'ute, xb'alun kyeqka'yin ex k'ak'ul, teju' ati tu'n t-ẍtilset.
5Kxe'l tma'n tu'n tkub' b'yet junju' tal pich' tib'aj jun tx'otx' k'wil atku'x a' toj tzajnix toj t-xiklil,
6ex ktzajel tiq'i'n tal pich' itz', exju' tze k'ute, xb'alun kyeqka'yin exju' k'ak'ul, kche kb'el tak'sa'nju' ti'xti' lu exju' tal pich' itz' tu'n tchk'elju' pich' kyimnitl tib'aju' a' tzajni toj t-xiklil.
7K'okeltzun twitxk'a'n wuq maju' chik' ti'ju' kẍtilsetel teju' xlemtx'a'k, ktma'tzuntz qa ẍtilun. Atzunju' tal pich' itz' kxel ttzaqpi'n.
8Ati tu'n ttxjonte t-xb'alunju' maẍtilset, ex kb'ajel ttxjo'ntib', k'elel tjso'n tkyaqilju' t-smal, tu'ntzun tkyejten ẍtilun. Yajxi'tzuntel b'a'n tu'n tokx toju' najb'il, ex ati tu'n tkyej ten wuq q'ijtl najal twipe'n.
9Tojtzun twuqi'n q'ij k'elel t-sk'o'ji'nju' twi', kb'je'lel tjso'n t-xmatzi ex kyib'aj twitz, ex tkyaqilju' t-smal, kttx'ja' t-xb'alun ex ktxja'tib', kjeltzuntz ẍtilun.
10Ktzajel tiq'i'n kab'e' qpoj tman rit mixti' kytzakajil toj twajxaqi'n q'ij, ex jun qpoj ttxu rit te jun ab'q'i mixti' ttzakajil; ex masch'i'n kyajlajoj (14.3) lib'r tb'anil arin te jun oyaj xyuq'i'n tuk'i'l aseyt, ex nik'jan litr aseyt.
11Kb'el q'o'nju' xjal kẍtilsetel exqe'ju' ti'xti', ttziju' Ja Te Mujb'ab'ltib'il nwitzku'ye' ayine' Dyos Manb'aj, tu'nju' pale kb'inchalteju' ẍtilsab'l.
12Ktzajeltzun tiq'i'n junju' qpoj tman rit ex kb'eltq'o'n junx tuk'i'lju' nik'jan litr aseyt, te jun chojb'il tu'n tten b'a'n wuk'i'le', kxel t-se'nju' tu'me'l tu'n tkub' q'etju' chojb'il nwitze'.
13Kb'el b'yetju' qpoj tman rit ja tu'me'l xjansa'n tu'n kykub' b'yetju' alu'mj te chojb'il tu'n tpaj il ex chojb'il k'oksb'il. Aju' chojb'il tu'n tten xjal b'a'n wuk'i'le' kxe'l teju' pale, ex ikxju' chojb'il tu'n tpaj il, qu'n xjanxi'xte'.
14Kjawiltzun tiq'i'n pale ch'i'n tchk'elju' chojb'il tu'n tten xjal b'a'n wuk'i'le', ex k'okyel t-sun ti'j t-ẍkyinju' xjal in ẍtilset toj tb'a'nq'ob', ti'j tman tq'ob' te tb'a'nq'ob' ex ti'j tman twitqan te tb'a'nq'ob'.
15Ktzajeltzun tiq'i'n ch'i'n aseyt ex kb'eltq'o'n toju' tq'ob' te tnayaj;
16kb'elex tak'sa'ntzun twitq'ob'tz te tb'anq'ob' toju' aseyt tkub' toj tq'ob' ex kxel twitxk'a'n wuq maju' aseyt tu'n twitq'ob' nwitze'.
17Kjawiltzun tiq'i'n pale ch'i'n aseyt ti'ju' atix toj tq'ob' tu'n tokt-sun ti'j t-ẍkyinju' xjal in ẍtilset te tb'anq'ob', ti'ju' tman tq'ob' te tb'anq'ob' ex ti'ju' tman twitqan te tb'anq'ob', jaxju' b'jo'ka' t-suna' tchk'elju' chojb'il tu'n tten b'a'n wuk'i'le',
18atzunju' aseyt min xb'aj kjawix t-sun toj twi'ju' in t-ẍtilsa'ntib'. Iktzu'n kknetela' najsb'il tilju' xjal lu nwitze' tu'n pale.
19Kb'eltzun tq'o'n paleju' chojb'il tu'n tpaj il, iktzu'n ktb'incha'ya' ẍtilsab'l teju' mya ẍtilun; yajxi'tzuntel kb'el tq'o'nju' alu'mj te chojb'il k'ok'sb'il,
20kb'eltq'o'n tib'aj q'olb'eb'l junx tuk'i'lju' oyaj twitz awal k'ok'e'kwitz. Iktzu'n kknetela' najsb'il tilju' xjal lu tu'n pale, kyjeltzuntz ẍtilun.
21Qatzun prowju' xjal yab' ex mixti'xi'x tu'me'l tu'n, ktzajel tiq'i'n jun qpoj tman rit te chojb'il tu'n tten b'a'n wuk'i'le', kb'el tq'o'ntzuntz te jun oyaj tb'anilxi'x tu'n kynajsetju' til, tuk'i'l kyaje' lib'r tk'i' nik'jan arin tb'anilxi'x xyuq'i'n tuk'i'l aseyt, te jun oyaj ti'j twitz awal k'ok'e'kwitz, ex ch'intlmi nik'jan litr aseyt,
22ex kab'e' tal xlak'uk' mujqa kab'e' tal paloms kse'nxju' tipumal, jun tu'n t-xi' q'et te chojb'il tu'n tpaj il, atzu'n juntl te jun chojb'il k'ok'sb'il.
23Kxe'l tiq'i'n tkyaqilju' lu toj twajxaqi'n q'ij teju' pale, te ẍtilsb'ilte; ktzajel tq'o'n nwitze', ttziju' Ja te Mujb'ab'ltib'il.
24Ktzajel tiq'i'n paleju' qpoj tman rit te chojb'il tu'n tten b'a'n wuk'i'le' exu' ch'intlmi nik'jan litr aseyt, kb'el tq'o'ntzuntz nwitze' te jun oyaj tb'anilxi'x;
25kb'el tb'yo'nju' qpoj tman rit te chojb'il tu'n ten b'a'n wuk'i'le' ex kjawil tiq'i'n ch'i'n tchk'elu' qpoj tman rit, k'okyel tb'aku'n ti'j t-ẍkyinju' nt-ẍtilsa'ntib' te tb'anq'ob', ti'j tman tq'ob' te tb'anq'ob' ex ti'ju' tman twitqan te tb'anq'ob';
26ex kb'eltq'o'n ch'i'n aseyt toj tq'ob' te tnayaj,
27kxeltzun twitxk'a'n wuq maj ch'i'n aseyt nwitze' tu'n twitq'ob' te tb'anq'ob' ti'ju' aseyt ati toj tq'ob'.
28Ex ikx k'okyel tb'aku'n ch'i'n aseyt ti'j t-ẍkyinju' xjal in t-ẍtilsa'n te tb'anq'ob', ti'ju' tman tq'ob' te tb'anq'ob' ex ti'ju' tman twitqan te tb'anq'ob', jaxu' soka' tb'aku'n tchk'elju' chojb'il tu'n tten b'a'n wuk'i'le'.
29Atzunju' ch'i'ntl aseyt xkyaj kjawix tb'aku'n pale toj twi'ju' xjal in t-ẍtilsa'ntib', tu'ntzun tkub' nnajsa'ne' til, ayine' Dyos Manb'aj.
30Kb'eltzun tq'o'n pale jun tal xlak'uk' mujqa jun tal paloms, se'nxju' kb'entel tq'onteju' nt-ẍtilsa'ntib'.
31Junju' tal pich' kb'el te chojb'il tu'n tpaj il, atzu'n juntl te chojb'il k'ok'sb'il, tib'ajxi'tlju' oyaj twitz awal k'ok'e'kwitz. Iktzu'n ktk'ma'ya' pale najsb'ilte tilju' xjal nt-ẍtilsa'ntib' nwitze', chi Qman Dyos te Moyses.
32Aye'tzun xnaq'tzb'ilju' kyeju' yab' tu'n xlemtx'a'k, ju' mixti' tu'me'l tu'n kyq'onte jun oyaj nim tu'n kyẍtilsante kyib'.
Chik'b'ab'l tu'n kyẍtilsetju' ja nche sb'akyix33Tzaj tma'n Qman Dyos kye Moyses ex Aaron kjalu:
34Qama tzaj nq'o'ne' nim txqan sb'ak toj jun ja toj kytaname', kse'n ate'qe'tle' toju' tx'otx' Kanaan, ju' kxe'l nq'o'ne' kyeye' te kyetzb'ile',
35kxe'lju' tajaw ja nelteju' pale ex kxe'l tma'n te: Naku'j matxi' sb'akyixju' njaye', chiku'.
36Nejl kxel tma'nju' pale tu'n kyb'je'tz iq'i'nju' ati toj, tu'ntzun lalun che b'ajtz'ilix tkyaqilju' ati toj. K'okyextzuntz ka'yilteju' sb'ak.
37Ajtzun tok tka'yi'n paleju' sb'ak, qa atiyile twitzju' ttapiyil ja cha'xinin mujqa kyeqinin ka'yin, exqa in che'x yeq'li toju' tapi,
38k'eletz toju' ja ex ktma' tu'n tkyaj jpet wuq q'iju' ja.
39Tojtzun twuqi'n q'ij k'okel tka'yi'n jumajtlju' pale, qatzun matxi mlenju' sb'ak ti'ju' ttapiyil ja,
40kxel tma'ntzuntz tu'n kyel iq'etju' ab'j ati sb'ak kyi'j ex tu'n kyxi' xoyit jata' txqan tz'il ti'jxi' nintnam;
41Ex kxe'l tma'n tu'n tb'aj jset tkyaqilu' tojxi' ja ex tu'n tex xoyet ti'jxi' nintnam tkyaqilju' quq mab'je'l jset, jata' txqan tz'il.
42Kche tzajel iq'ettzun txqantl ab'jtz tu'n tok kyxelju' ẍe el iq'et, ex ak'a'j b'a'ntx'otx' tu'n tktxetl toju' ja.
43Qatzun masb'akyix jumajtlju' ja tb'je'lenxi' iq'etju' ab'j ex tb'ajlen jset twitz ttapiyilju' ja ex tb'ajlenxi' ktxet jumajtl,
44k'okyex jumajtlju' pale ka'yilte. Qama txi' mlenju' sb'ak toju' ja, taq'wixi'x sb'aktzuntz ex tz'iltlju' ja.
45Qu'mtzun ati tu'n tkub' xitetju' ja, ex tkyaqilx kxel xoyit jata' txqan tz'il ti'jxi' nintnam.
46Alkyexku' matz'okx toju' ja toju' tq'ijlalil kyejtma'n pale tu'n tjpet, kjelten tz'il tzmaxi'j ajqok yupj.
47Alkyexku' mawan mujqa mawtan toju' ja, ati tu'n ttxjonte t-xb'alun tu'n t-ẍtilset.
48Qatzun ajtokxju' pale ka'yilteju' ja, qama til min xxi' mlentlju' sb'ak tb'ajlenxi' ktxet jumajtl toj, ktma'tzuntz qa ẍtiluntlju' ja, qu'n matxi' kub' naju' sb'ak.
49Tu'ntzun t-ẍtilsetju' ja, ktzajel tiq'i'n kab'e' tal pich', tze k'ute, xb'alun kyeqka'yin ex k'ak'ul.
50Kb'el tb'yo'n junju' tal pich' tib'aj jun tx'otx' k'wil nojni tu'n a' tzajnix toj t-xiklil.
51Ktzajel tiq'i'ntzun k'utetz, k'ak'ul, xb'alun kyeq, exju' tal pich' itz', che kb'elex tak'sa'ntzuntz toj tchk'elju' tal pich' kyimnitl ex toju' a' tzajni toj t-xiklil, kxel twitxk'a'ntzun wuq majtz ti'ju' ja.
52Iktzu'n kẍtilsetela'ju' jatu'n tchk'elju' tal pich' tuk'i'lju' a' tzajnix toj t-xiklil, ex tal pich' itz', ex k'ute, ex k'ak'ul exju' xb'alun kyeq.
53Yajxi'tzuntl kxel ttzaqpi'n tal pich' itz' ti'jxi' nintnam, ikytzun ktb'incha'ju' tu'n t-ẍtilsetju' ja, chi Dyos.
54Aye'tzun xnaq'tzb'ilju' ti'j alkyexku' yab'il tu'n xlemtx'a'k, ẍal, tx'a'k,
55psuq' ti'j xb'alun ex sb'ak ti'j ja,
56malni ex b'je'tzni poq'li, ex tz'il majx inkyajten,
57tu'ntzun tel kynik'tzilju' ẍtilun exju' mya ẍtilun. Iktzun xnaq'tzb'ilju' tib'aju' xlemtx'a'k.
Who We AreWhat We EelieveWhat We Do
2025 by iamachristian.org,Inc All rights reserved.
