2 R 20 - Mam Ostuncalco Bible

Q'anet Esekyiy toj yab'il(2 Cr 32.24-26; Is 38.1-8)

1Tojtzunju' tq'ijlalil lu, tzaj jun yab'il kuwxi'x ti'j Esekyiy, ex xi'ju' Isayiy t-sanjelal Dyos tk'wal Amos ka'yilte, tmatzuntz te:

—A xtma Qman Dyos ja'lu: Q'manqe'kja mankb'il tyola kyeju' toj tjaya, qu'n kkyimela; layx q'anita, chi Dyos, chij.

2Xitzun tmiltz'u'n tib' Esekyiy twitzja ex na'n Dyos ikjalu:

3Chin kub'sale' teya Taye, tu'n ttzaj q'aq'an tk'uja wi'je' qu'n matxi' chin ajb'ene' b'a'n teya, ex tojxi'x tu'me'l in nb'incha'nju'ye' b'a'n toj twitza, chij. Ex kub' o'q' b'a'nxi'x.

4Na'mxtoqtzun tetz Isayiy nky'ajchaq twipe'n teju' tja kawb'il, tzaj tma'n Qman Dyos te ikjalu:

5Kutanjtl ti'ja ex q'manxa te Esekyiy, nejenel te ntaname', kjalu: Chi Qman Dyos ja xk'uluna' ojtxi' tchmana Dab'i, qa matxi' tb'iju' tna'j Dyosa ex matxi' tilju' ta'l twitza. Kq'ananjtzela tu'n, ex b'a'n tu'n txi'ya toj oxe' q'ijtl toju' ja te k'u'lb'il.

6Ktzajel tq'o'n o'lajoj ab'q'itl tchwinqlala. Kklonjtzela tuk'i'lxi' Jerusalen toj tq'ob'u' nimaqkawil aj Asirya. Oktkla' nintnam lu, tu'n tlaqb'il tk'u'j ti'j Dab'i ju' tmajin ex tu'n tnimanjtzu' tb'i, chiku'ya te, chi Dyos te Isayiy.

7Xitzun tma'n Isayiy kyeju' ncheka'yinte tu'n kyb'inchante jun q'anb'il iw, tu'n tok kyq'o'n ti'ju' ttx'a'k nimaqkawil tu'n tb'anix.

8Xitzun tqani'n Esekyiy te Isayiy:

—¿Ti'tzu'n jun techlal k'elela' nnik'e' ti'j qa chin b'anixele' tu'n Qman Dyos, exqa toj toxi'n q'ijtl chinxe' toj tja Qman Dyos? chij.

9Xitzun ttzaq'we'n Isayiy:

—A techlal ja'lu kxe'l tq'o'n Qman Dyos teya te jun yek'b'il qa kjapumelju' tyol tu'n: ¿Ma tajb'ila tu'n t-xilq'e ch'i'ntlju' leku'n twitz, mujqa tu'n tanjtzti'j? chij.

10Xitzun ttzaq'we'n Esekyiy te:

—Mya ch'uẍte' tu'n t-xilq'eju' leku'n twitz. Ate ch'uẍu' tu'n tanjtzti'j, chij.

11Kub'santzun t-sanjelal Dyos Isayiy twitz Qman Dyos, ex tb'incha Qman Dyos tu'n tanjtzti'ju' leku' toju' lajoj sqit matxi'toq tzik' toju' ttechb'ilq'ij Ajas.

E'tk'am Esekyiy xjal E'tzajchq'o'n B'ab'ilon(2 Cr 32.27-31; Is 39.1-8)

12Tojtzunju' tq'ijlalil lu, tb'i tpakb'alilju' nimaqkawil Merodak-B'aladan, tk'wal B'aladan, nimaqkawil toj B'ab'ilon, qa yab'ti Esekyiy, e'tzaj t-sma'n junjun t-sanjelal q'ol u'j ex jun oyaj te.

13E'tk'am Esekyiy ex b'ajx tyek'u'n tk'uwen kye, e'saqpwaq ex q'anpwaq, exqe' k'ok'sb'il, tb'anil aseyt ex k'ub'lkyeju' q'ojb'il, ex tkyaqilju' atitoq kyoju' tk'ub'l. Mixti' jun ti'xti' toju' tja te kawb'il ex toj tkyaqilju' tkawb'il mixwitti' xityek'u'n.

14Pontzu'n Isayiy t-sanjelal Dyos nelteju' nimaqkawil Esekyiy ex xit-xjelu'n te:

—¿Ja ẍetzaja'ju' ichan ẍe'ul tuk'i'la, ex titi' xkyma teya? chij.

Xitzun ttzaq'we'n Esekyiy:

—Toj jun tnam najchaq ẍetzaja'; toj B'ab'ilon ẍetzaja', chij.

15¿Titi'tzu'n xb'aj kyka'yi'n toju' tjaya te kawb'il? chi Isayiy xitqani'n te:

Xittzaq'we'n Esekyiy:

—Mab'ajkyka'yi'n tkyaqilju' ati toj. Mixti' jun ti'xti' kyoju' nk'ub'le' mixwitti' xxinyek'u'ne' kye, chij.

16Xitzun tma'n Isayiy te Esekyiy:

B'imju'ya yol lu tu'n Qman Dyos:

17Tzul tq'ijlalil, tkyaqilju' ati toju' tjaya te kawb'il ex tkyaqilju' oje b'aj kyb'uyi'n ojtxi' tyajilb'ena tzmax ja'lo, che b'ajxe'l q'i'n toj B'ab'ilon. Mixti'tlte kjel q'o'n tzalu.

18Expe' ikx junjun tyajajila che kxe'l q'i'n toj B'ab'ilon, ex che okyel q'o'n te ajb'el toj tja nimaqkawil, chi Dyos, chij.

19Atzunte Esekyiy, kub't-xima'n qa ktenb'el nak'b'il ex q'uqli tk'u'jlalil toju' tq'ijlalil tchwinqlal, xittzaq'we'n te Isayiy:

—B'a'nte' tqanil saj tiq'i'na weye' tu'n Qman Dyos, chij.

Kyim Esekyiy(2 Cr 32.32-33)

20Atzu'n jni'tl tqanil ti'j Esekyiy exu' tb'incha nim toklen ex kse'n jawa' tb'incha'n k'anb'il a' exju' tb'e a' tu'n tpon toju' nintnam, tz'ib'a'nqe' toju' tu'jil tqanil kyi'ju' nimaqkawil aj Juda.

21Tej tkyim Esekyiy, atl Manases ju' tk'wal kawin te t-xel.