Jer 12 - Mam Ostuncalco Bible

Xitma'n sanjelal te Qman Dyos

1Nman Dyos, qama chin kutene' yolil tuk'i'la tu'n tpaj jun ti'xti';

naq o'kxta ax tyola;

wajb'iltzunwe' tu'n txinqani'ne' lu teya:

¿Tiqu'ntzun b'a'n nnela' tkyaqilju' ntb'incha'n b'inchal myab'a'n?

¿Titiqu'n toj nak'b'il ta'qe' njaw kyi'jkyib'?

2Inche ku'x tawa'na,

ex nche lok'an, nche ch'iy ex inche witzan.

ajkyyolin naku'j nqaku' ta'qe' tk'etza,

atzu'n toj kyanmi najchaq ta'qe'.

3Atzunta Nman Dyos, tojtzqi'nqina;

toktwitza wi'je'

ex kanli twitza tkyaqilju' nxime' ti'ja.

¡Iq'inqe'xju'ya xjal lu toj b'i'yb'il naku'j ritqe';

q'onka kyechel tu'n kykub' b'yet ajtpon q'ij kye!

4¿Ma kukxtzun ktenb'il tx'otx'ju' tzqij

ex ch'u'ẍqe' itzaj toj kojb'il?

Ljo'n kyb'aj kyimu' txkup ex pich'

tu'n tpaj kyilju' xjal twitzju' tx'otx'

toj kynab'l qa min ntka'yi'na nkyb'incha'n.

Tzaq'web'l tu'n Qman Dyos

5Qa ma'xi'x kub' siktiya tu'n tojqelb'ena kyuk'i'l xjal nche ojqelan tu'n kyqan,

¿se'ntaq'wi tu'n tok tq'o'ntib'a ojqelal kyuk'i'l xjal nche ojqelan ti'j chej?

Min nb'ajx tk'u'ja toj jun tx'otx' ati nak'b'ila toj,

¿ti'tzu'n ktb'incha'ya toju' nin xaq ttzi Jordan?

6Ma'pena' che jaw miltz'uju' titz'inku'xi'xa mo ttzika ti'ja,

ex njaw toj kywi' nche ilin teya ttz'elti'jxi'ya.

Lalun tz'okqe tk'u'j kyi'j,

b'a'ntzun qa majx b'a'n che yolin tuk'i'la.

Nb'isun Qman Dyos ti'ju' ttanam

7Matxi' kyej nkolb'i'ne' ntaname',

matxi' tz'el wik'u'nju'ye' wetoqe',

matxi' kub' nq'o'nju'ye' tnam inxi'xtoq nk'u'jla'ne',

toj kyq'ob' tajq'oj.

8Aju' tnam lu, etza'ntoq wu'ne',

ja'lo naku'j b'alun toj k'ul weye';

intzanunk wi'je', qu'mtzun nel wik'u'ne'.

9Iky ntanamju'ye' kse'n jun pich' tb'anilxi'x t-xik',

inche q'ojin txqantla pich' ti'j.

¡Kukytzaje' kykyaqile' tojk'ul txkup;

kyb'uyintz kyib'e' tu'n kyule' toju' ninwan!

10Nim txqan nejenel ajq'ojqe' matxi' kub' kyxitu'n wawale' ub'a,

matxi'xi'x b'aj kywab'e'n nkojb'ile',

matxi' kub' kyxitu'nju' tx'otx' nchin laqje' ti'j

matxi' kyej chq'ajlajix kyu'n.

11Matxi' kub' kyxitu'n, matxi' kyej chq'ajlajtl kyu'n

ja'lo nnul toj nk'u'je'.

Tkyaqilju' tx'otx' chq'ajlajtl,

ex mix-a'lo'xte nb'ajx tk'u'j ti'j.

12Eb'ajtzaj xjal xitul

kyib'aj kykyaqil b'us toj chq'ajlaj,

qu'n ati jun nk'uẍtx'e'nb'ile', ayine' Dyos Manb'aj

tkyaqilju' tx'otx' kb'el nxitune' tzajx toj jun ttxa'n ex kpomelx toj juntl,

ex mix-a'lo'qex ktenb'ila' nak'b'il.

13Triy xikyawa'n, atzun ch'i'x jaw kyb'u'yi'n;

kub'o'lj tkyaqilju' kyaq'unb'en.

Mixti'xte twitz kyawal jaw

qu'n matzaj ntx'u'jile' kyi'j. Chi Qman Dyos.

Tzaj ttziya'n Qman Dyos tyol kyeju' tnam Nqaku' ta'qe' tk'etz Israel

14Intma'n Qman Dyos kyi'ju' tnam b'inchal myab'a'n, nqaku' ta'qe' tk'etz Israel, aye' e'kub' xitunteju' tx'otx' xitq'o'n te tetzb'il Israel ttanam: Che jawil nxb'oqi'ne' toju' kytx'otx', ex k'elitz wiq'i'ne' Juda kyxol.

15Kyb'jawlenxi'tzun nxb'oqi'ne', ktzajel q'aq'an nk'u'je' kyi'j, che anjetz wiq'i'n jumajtle' tojx kytx'otx' toj kytanam.

16Axxi'x aye'nakye exi' yek'unte kye ntaname' tu'n kytziyante kyol toj tb'i B'aal, atzu'n ja'lo b'a'n kykub'ten kyxolju' ntaname', qama kyoksla kyokslab'lju' ntaname' exqa makytziya kyol toj nb'iye': Toj tb'i Qman Dyos, qa chechi.

17Aye'tzu'n nimaqtnam min nchin tb'i'ne', kjawil nxb'oqi'ne' tuk'i'lxi' tlok', ex kb'el nxitu'ne'. Ayine' Dyos Manb'aj nchin yolin, Chij.