Cnt 7 - Mam Ostuncalco Bible

Tyol chmilb'aj

1¡Xa'wanqeku'xi'xu' tqana

kyoju' t-xajab'a, tmyal nimaqkawil!

Majx tulin ti'ju' tal t-ẍo'pa,

kse'nqe' tilb'ilal b'incha'n q'anpwaqqe',

b'incha'n kyu'n xjal b'a'n kyb'inchante.

2Iky tmuxju'ya kse'n jun tkb'el k'wab'j tulinti'j

kukx tk'wet b'inju' toj;

iky tk'u'ju'ya kse'n jun b'yoj triy

txoli'n ti'j tu'n b'ech rojs.

3Ikqe' timi'ẍju'ya kse'n kab'e' ttxu msat,

kab'e' tal msat yuẍqe'.

4Iky tqulju'ya kse'n jun ja nimin twe' ẍnu'lb'aqile ti'j;

ikyqe' twitzju'ya kse'n kab'e' xoch ẍtilunqe'

toju' nintnam Esb'on,

tu'me'l ttzi nintnam B'at-rab'im;

iky ttxa'na kse'n ja nimin twe' twi' Lib'ano,

t'ikylo'ktz tu'me'l nintnam Damask.

5Ikytka'yinx twi'ju'ya

kse'n toktza' witz Karmelo;

ikyqe' t-xya'mal twi'ya kse'n q'in kyeq smo'n tk'i' cha'x:

¡kyajni ye' jun nimaqkawil toju' xpatx'b'ente twi'ya!

6Aya qya nchin laqje' ti'ja, qtze'tz kyoj twitza,

¡achb'ajila ex xa'wankuxi'xa!

7iky tka'yinxju'ya kse'n tka'yinx jun tut;

ikyqe' timi'ẍju'ya kse'n jun tq'ob' lob'j txijli twitz.

8Wajb'ile' tu'n njaxpwe'tzane' ti'ju' tut

tu'ntku'tz wiq'i'ne' tq'ob' txijli.

Che okyeltzun timi'ẍtza kse'n tq'ob' ub'a txijli;

iky t-xewju'ya kse'n mansan npuk'chaj;

9iky toj tk'o'nju'ya kse'n tb'anil ta'l ub'a,

chab'a nku'x b'ililin toj ttziya

ex kyxe twitzteya, chij.

Tyol xu'jilb'aj

10Te qinwe' ichan nchin laqje' ti'j:

tu'nju' nxi'x laqj wi'je' nula' nk'etze'.

11¡Kuwxa, aya nchin laqje' ti'ja, qo'ya toj kojb'il!

K'elix qonik'an qu'n kyxol b'ech alenya.

12Qo xe'l toj tqan ub'a te prim,

ka'yilte qa matxi' che b'echin,

ka'yilte qa nche poq'chaj,

qa matxi' che b'echinju' kranad.

¡Atzuntzu' kxe'la' nq'o'n nyole' teya!

13Inxi'x che puk'chaju' lob'j mandrakora.

Chukchaq lob'j ati ttzi qja:

twitz lob'j tzqijsa'n ex tzmaxi'x ẍetzaj t'uxit,

mache elnpa'ne' teya, aya nchin laqje' ti'ja.