2 R 17 - Mam Ostuncalco Bible

Kub'ti'j Samarya ex eb'je'xq'i'n aj Israel

1Toj kab'lajoj (12) ab'q'i nkawin Ajas, nimaqkawil toj Juda, tzyet tkawin Osey, tk'wal Ela, toj Israel, ex b'eljoj ab'q'i kawin toj Samarya.

2Taq'wix b'aj tb'incha'n twitz Qman Dyos, mikxa'xi'xpe' kse'n kyb'inchaju' nimaqkawil e'ten nejtl toj Israel.

3Q'ojin Salmanasar, nimaqkawil toj Asirya, ti'j Osey ex ok te tmajin ex tchoju' unb'ab'l.

4Eltzun tnik' Salmanasar qa intoq ximan Osey tu'n tjaw tiq'i'ntib' ti'j, ex ojetoq che'x tchq'o'n junjun t-sanjelal q'malte te So, nimaqkawil toj Ejipt, expe' mixtoqti' nxi' tchjo'ntlju' unb'ab'l tu'n tq'onte atl junjun ab'q'i. Tchaq'tzu'n Salmanasar tu'n tzyet Osey ex tu'n tokx jpu'n;

5Pontzuntz kyuk'i'lju' t-xjal toj tkyaqilju' tx'otx', ex oxe' ab'q'i q'ojin ti'j Samarya.

6Tojtzun tb'eljoji'n ab'q'i nkawin Osey, kub'ti'j Samarya tu'n nimaqkawil aj Asirya, ex exi' tiq'i'n aj Israel pres toj Asirya ex e'pon tq'o'n toj Ala, toju' tx'otx' Ab'or, ttziju' nin a' Wosan, ex kyoj nimaqkytanam aj Medo.

7B'aj kyi'j aj Israel ikju' qu'n matxitoq che b'inchan il twitz Qman Dyos etzq'inkye toj Ejipt ex e'tkolpi tjaq' tkawb'il paraon, nimaqkawil toj Ejipt, extzun e' k'uluntl kye txqantl dyos.

8Axte kyb'inchaju' kse'n intoq kyb'incha'n nimaqtnam eb'je'x t-xla'ja'n Qman Dyos kywitz, ex kse'nxju' kyajni kynk'u'n nimaqkawil toj Israel kye.

9Expe' e'aq'wi aj Israel yolil taq'wix ti'j Qman Dyos, ex jaw kyb'incha'n q'olb'eb'l kye witzileb' kyoj kykyaqilju' nimaqkytanam, ex kyoju' ja nimaq kywe' te xq'uqb'il ex kyoju' nimaqtnam kuwsa'nqe'.

10Ex ikx e'jaw kyb'incha'n ab'j xjan, ex tilb'ilal Asera kywi'yile witz ex kyxeyile tze pujin,

11e'kub' kytz'e'ysa'n sturak ex b'aj kyb'incha'n ti'xti' taq'wix kse'nx intoq kyb'incha'n nimaqtnam eb'je'x tiq'i'n Qman Dyos kywitz, tu'ntzu'n tzaja' ttx'u'jil Qman Dyos kyi'j.

12Ek'ulun kye witzileb', extzun ojetoq tchaq' Qman Dyos kye tu'n lalun kyb'incha.

13Ex ojetoq tzaj tab'tzi'n Qman Dyos kye aj Israel toj kytzi kykyaqilju' t-sanjelal exqe' nyolin Dyos toj kynab'l, tu'n tkyaj kytzaqpi'n kyb'e ex tu'n kyjapunju' tchaq'b'il ex tkawb'il kyu'n, tkyaqilju' xnaq'tzb'il ojetoq taq' kyeju' ojtxi' kyyajilb'en kyu'nelju' t-sanjelal.

14Aye'tzunkye mixti'x xikyb'i'n, kub' kypi'sa'n kyib' kse'nxju' kyb'incha ojtxi' yajilb'en, mixti'x okqe kyk'u'j ti'j Qman Dyos;

15b'je'l kyik'o'nju' tkawb'il Qman Dyos exju' yol kyej b'entti'j tu'n kyuk'i'lju' ojtxi' kyyajilb'e, exqe'ju' ojetoq tchaq' kye. Expe' ek'ulun kywitz dyos mixti'x kyajb'en, qu'mtzun ikxkye e'ok mixti'x kyajb'en, xikykno'n kse'nx intoq kyb'incha'nju' tnam ate'toq kyi'jile, extzun ojetoq txitma'n Qman Dyos kye qa mixti' tu'n kyb'inchante.

16Kyej kytzaqpi'n tkyaqilju' tchaq'b'il Qman Dyos, ex kub' kyb'incha'n kab'e' tilb'ilal tman wakx q'ank'uxb'ilqe' ex jun tilb'il Asera, expe' ek'ulun kye kykyaqilju' che'w twitz kya'j ex te B'aal.

17Ex b'ajkub' kytz'e'ysa'n kyk'wal ex kymyal, e'ok ajnab'lil tu'n kymante titi' tzul yajxi'tel, ex majx xi' kyxonkyib' b'inchal myab'a'n, tu'ntzunju' lu tzaj ttx'u'jil Qman Dyos kyi'j.

18Tzajtzun tq'oj Qman Dyos b'a'nxi'x kyi'j aj Israel ex eb'je'x tiq'i'n twitz, o'qe'kxju' tyajajil Juda e'kyaj tklo'n.

19Ex ikyqe'xu' aj Juda mixti'x japunju' tchaq'b'il Qman Dyos kyu'n, qu'n ax kyb'incha'ju' kse'nx intoq kyb'incha'n aj Israel.

20Eb'je'ltzun tik'u'n Qman Dyos Kykyaqilju' aj Israel ex el kych'ixaw tu'n, eb'ajx tq'o'n toj kyq'ob' eleq' ex majx eb'je'x tiq'i'n twitz.

21Eb'je'l tpa'n aj Israel kyi'ju' tyajajil Dab'i, aye'tzunkye' aj Israel okkyq'o'n Jerob'oam tk'wal Nab'at te kynimaqkawil, atzun el txalpunkyeju' ti'j Qman Dyos ex e'xitq'o'n toj il.

22Aye'xtzun ilju' kyb'incha aj Israel kse'nx tb'incha Jerob'oam ex mixti'x elkypa'n kyib' ti'j.

23Eb'je'ltzun tiq'i'n Qman Dyos aj Israel twitz, kse'nxju' ojetoq tman toj kytzi kykyaqilju' t-sanjelal ajb'elqe' te, iktzu'n eb'ajxq'i'n aj Israel toj jitz'jtib'il Asirya, ex majx e'kyajten atzu'.

E'kub' najantl xjal toj Samarya

24Eb'ajtzaj tiq'i'n nimaqkawil aj Asirya xjal aj B'ab'ilon, aj Kuta, aj Ab'a, aj Amat ex aj Separb'aym, ex eb'aj kub' tq'o'n tu'n kynajan kyoju' nimaqtnam toj Samarya, te kyxelju' aj Israel. Ikytzu'n kub'a' kytzyu'n tx'otx' Samarya ex e'kub' najan kyoju' nimaqtnam.

25Mixtzunti'x nche k'ulun xjal lu te Qman Dyos, e'tzajtzun tchq'o'n Qman Dyos b'alun kyi'j tej kykub' najan, ex eb'aj junjun kyu'n b'alun.

26Exi'tzuntz q'malte teju' nimaqkawil toj Asirya kjalu: Aye'kye' xjal ẍepon tiq'i'na najal kyoju' nimaqtnam toj Samarya, min kyojtzqi'n Dyos nk'lunjtz toju' tx'otx' lu, tu'ntzun tpaju' mache tzaj tchq'o'n Dyos b'alun kyi'j, ex ljo'n kyb'aj ch'yo'n, chechij.

27Tchaq'tzun nimaqkawiltz aj Asirya kjalu: Kychq'onqe'xe junjun pale kyxolju' e'tzaj tzyet, tu'n kyxi' najal atzu', tu'n txi' kyxnaq'tza'n okslab'l ti'ju' Dyos nk'lunjtz toju' tx'otx' lu, chij.

28Juntzun kyxolju' pale ojetoq che ex kyiq'in toj Samarya, ul ex kub' najan B'etel, exi' t-xnaq'tza'ntzuntz tu'n kyk'ulun te Qman Dyos.

29Teyilextzun junjun nimaqtnam b'ajkub' kyb'incha'n kydyos toju' nintnam jachaq najla'qe', ex kub' kyq'o'n kyoju' xjanb'il kywi'witz b'incha'n kyu'n aj Samarya.

30Kub' kyb'incha'n aj B'ab'ilon jun tilb'ilal Sukot-b'enot; aye'tzu'n aj Kuta, jun tilb'ilal Nerkal, aye'tzu'n aj Amat, jun tilb'ilal Asima.

31Ex kub' kyb'incha'n aj Ab'a jun Nib'as ex jun tartak, aye'tzu'n aj Separb'aym intoq che kub'kytz'e'ysa'n kyk'wal te chojb'il kywitz Adramelek ex Anamelek, ju' kydyos.

32Expe' intoq che k'ulun te Qman Dyos, ex e'jaw kysk'o'n pale kyxolx tu'n kyajb'en toj k'u'lb'il kye witzileb'.

33Qu'mtzun, maskye ntoq che k'ulun te Qman Dyos, ilxtoqti'j nche k'ulun kyeju' kydyos, kse'nx nkyb'incha'ntoq toj kytanam jaeb'ajtzaja'.

34Majx xikyljo'n kse'nx ntoq kyb'incha'n nejtl, qu'n min nche k'ulun te Qman Dyos ex min nche kyanq'i'n tkawb'il ex tnuk'b'il, ex min nkyb'incha'n kse'nxju' t-xnaq'tza ex tchaq' Qman Dyos tu'n tjapun kyu'n tyajajil Jakob', ju' oktq'o'n tb'i Israel.

35Tej tkyajb'ent jun yol tu'n Qman Dyos kyuk'i'l, tchaq' kye:

Lalun che k'ulune' kye txqantl dyos, lalun che jaw kynima'ne' ex lalun che ajb'ene' kye tu'nwt txikyq'o'n chojb'ile' kye.

36Che k'ulun qe'ye' weye', ayine' Dyos Manb'aj, inetz q'inkyeye' toj Ejipt tuk'i'l nim wipumale'. O'kxtzu' tu'n kyk'uluna'ye' weye', tu'n njaw kynima'ne' ex tu'n tkub' kyq'o'ne' chojb'il nwitze'.

37Ex che japunxju' nkawb'ile' kyu'ne' b'a'nxi'x, e'nuk'b'il exqe' xnaq'tzb'il ex chaq'b'il oje che'x ntz'ib'a'ne' kyeye', ex lalun che k'ulune' kye txqantl dyos.

38Lalun tzik'tna'lju' yol oje kyej b'entti'j wu'ne' kyuk'i'le' ex lalun che k'ulune' kye txqantl dyos,

39naq o'kxtzu' weye' ayine' Dyos Manb'aj, che nkla'tzuntze' tjaq' kykawb'il kyajq'oje', chi Dyos.

40-41Aye'tzunkye' nimaqtnam lu mixti'x xikyb'i'n, xipe' kyljo'ntlju' intoq kyb'incha'n tnejel, nche k'ulunxi' twitz Qman Dyos ex xikyljo'n tu'n kyk'ulun kye witzileb'. Ax kyb'incha kyk'walju' kse'nx kyb'incha ojtxi' kyyajilb'en, ex ax xikyljo'nju'.