Zac 1 - Mam Ostuncalco Bible

Ttxokb'il Qman Dyos teju' ttanam

1Toj twajxaqi'n xjaw teju' tkab' ab'q'i nkawinju' nimaqkawil Dariy, tzaj tma'n Qman Dyos Pakb'ab'l lu te Sakariy ju' t-sanjelal, tk'wal B'erekyiy, ttchman Ido. Tma kjalu:

2-3Ayine', Dyos Manb'aj nimwipumale', tzaj txqan ntx'u'jile' kyi'ju' ojtxi' kychmane'. Qu'mtzun q'manxa toj nb'iye' kyeju' tnam ja'lo: Kutanjtz kyi'je' wuk'i'le', ex chin tenb'ilwe' kyuk'i'le'. Ayine', Dyos Manb'aj nchin q'mante.

4Lalun kyb'inchakye' kse'nqe' ojtxi' kychmane', xiq'ma'n kye kyu'n ojtxi' nsanjelale' tu'n tkyaj kytzaqpi'nju' kychwinqlal myab'a'n exju' kb'inchb'aj taq'wix, aye'tzunkye min kyaj tu'n tkub' kyb'i'nju' nxi' nmane'. Ayine' Dyos Manb'aj nchin q'mante.

5Atzu'n ja'lo, ¿Jatzun ta'qe' ojtxi' kychmane'? ¿Ma kukxtzun kynajan nsanjelal ju'ye'?

6Aye'tzunwe' nyol ex nchaq'b'ile', ojetoq txinma'ne' kyeju' nmajine' sanjelal e'pon kyeju' ojtxi' kychmane'. Aye'tzunkye anjtzkyi'j wuk'i'le', qu'n elkynik' qa ayine' Dyos Manb'aj nimwipumale', nchin tz'e'ysante kywitz kse'nxju' tu'me'l kyb'inchb'aj, chij.

Yek'b'il kyi'j aj chejil

7A tpakb'al ja'lu wu'ne', ayine' Sakariy t-sanjelal Dyos, tk'wal B'erekyiy, ttchman Ido, nk'ame' te Qman Dyos toju' q'ij junaq kyaje' (24) te tjunlajoji'n (11) xjaw (aju' xjaw tok tb'i Seb'at) te tkab' ab'q'i nkawin nimaqkawil Dariy.

8Tzaj yek'un jun ti'xti' weye toj jun qonik'an: wile' jun aj chejil ti'j jun chej kyeqti'j. Wa'ltoq toj jun b'ya' kyxol junjun ktxab' ex ate'toq jun tnejtl chej ti'jxi', junjun kyaq kyi'j, junjun sb'u'j kyi'j ex junjuntl saq kyi'j.

9Atitoqtzun jun anjl nyolin wuk'i'le', xinqanine' te: ¿Taye alkyeqe'tzu'n aj chejil lu? nchije'. Tzajtzun ttzaq'we'n anjl weye' kjalu: Kxe'l nyek'une' teya alkyeqe', chij.

10Atzunju' ati kyxol ktxab' tzaj tma'n: Aye'kye' lu e'xi'tchq'o'n Qman Dyos ẍaqlulte tkyaqil twitz tx'otx', chij.

11Xi'tzun kyma'n aj chejil teju' tanjl Qman Dyos atitoq kyxolju' ktxab': Matxi' b'aj qb'etine' tkyaqilju' twitz tx'otx', ex maqile' toj nak'b'il ta'ya', chechij.

12Tmatzu'n Qman Dyos kjalu: Qman Dyos nimtipumala, matxi' b'ent oxnaq lajoj (70) ab'q'i ttzajlen tq'oja ti'j Jerusalen ex kyi'ju' nimaqtnam toj Juda ¿Jte'tzun ab'q'itl tu'n tik' tu'n ttzajlaqj tk'u'ja kyi'j? chij.

13Tzajtzun ttzaq'we'n Qman Dyos kyuk'i'l tb'anil yol te q'uqb'ab'l k'u'jb'aj teju' anjl nyolin wuk'i'le',

14Tchaq'tzu'n anjl weye' tu'n txinma'nju'ye' tqanil lu: A ntma'n Qman Dyos nimtipumal kjalu: Nxi'x nk'u'jla'nwe' Jerusalen exju' witz Syon.

15Qu'mtzun matxi' tzaj txqan ntx'u'jile' kyi'ju' nimaqtnam lu mixti'x nche ximan, tej naqtoq ch'inju' ntx'u'jile', mache b'inchanxi'xtl il nwitze'.

16Qu'mtzun ja'lo, ayine' Dyos Manb'aj nchin q'mante: Matxi' tzaj q'aq'an nk'u'je' ti'j Jerusalen, knb'incha'ye' tu'n tjaw b'inchet jumajtlju' ja te k'u'lb'il ex tkyaqilu' nimaqtnam, Chi Dyos chiku'ya, chij.

17Tzaj tma'ntlju' anjl weye': Ex q'manxju'ya lu kye: Intma'n Qman Dyos nimtipumal kjalu: knb'incha'ye' tu'n kyjawb'ent jumajtlju' nimaqntaname'; knq'a' jumajtle' tipumal Syon, ex k'okyel jumajtl Jerusalen te nintaname' sk'o'n wu'ne', chiku'ya, chij.

Tzaj yek'un kyi'ju' uk'a exqe'ju' tx'nol K'uxb'il

18Tzaj yek'un juntl ti'xti' weye', ex wile' kyaje' tuk'a (wakx)

19Ex xinqanine' teju' anjl intoq yolin wuk'i'le' titi' ntechla'nju' kyuk'a (wakx) lu, atzunte ate tzaj ttzaqwe'n weye': A ntechla'n uk'aju' lu aju' kyipumalju' ẍe b'ajx sputi'nkye najlqe' toj tnam te Juda, Israel ex Jerusalen.

20Yajxi'tzuntl e'tzaj tyek'u'n Qman Dyos kyaje' tx'nol k'uxb'il weye'.

21Xi'tzun nqanine' te: ¿Ti'tzu'n sul kyla' tx'nol k'uxb'il lu? nchije', tzajtzun ttzaq'we'n weye': Ikytzu'n kse'nqe' kyuk'a (wakx) lu nkyechla'n kyi'ju' ẍeb'ajx spuntinkyeju' xjal aj Juda ju' mixtoq a'lo'x tu'n tklontetib', mache ulju' tx'nol k'uxb'il xob'tzalkyeju' nimaqtnam ex majx che elel kyjonju' kyuk'a, qu'n tu'n kyuk'a eb'ajxa' kyspunti'n xjal najlqe' toj Juda.