Pr 17 - Mam Ostuncalco Bible

1Ate b'a'n tu'n qwan tmoj itzaj toj nak'b'il

kyetwitz tu'n qwan tmoj chib'j toj q'oj.

2Aju' b'a'n majen nkawin tib'aju'

k'walb'aj mixti' tnab'l,

ex ati toklen ti'ju' etzb'il kysenxju' txqantl k'wa'lb'aj.

3aye' q'anpwaq ex saqpwaq, q'aq'te' b'inchalkye;

atzun kyanmi xjal ate' Dyos ka'yilte.

4Ayeju' xjal b'inchal il ex chalyol

inxi' kyb'i'nju' chajyolil.

5Qama qo' xmayin ti'j jun prow, nakuj nqo' xmayin ti'j Dyos ch'isal;

exju' ntze'n ti'ju' nk'ulb'an, mixwittzun ti'te' chojb'il te.

6A kyninb'ilju' manb'aj aye' kyk'wal;

atzu'n kytzalajb'ilju' tijwnaq aye' kychman.

7Myab'a'n nela' teju' xnak tu'n tyolin ttxolilti'j,

ex lay tz'elb'a'n tu'n tchan yol jun tnik'alti'j.

8Aju' nchojon tu'n tb'inchanjtz xtalb'il te,

toj twitz qa tkyaqil kb'entil tu'n jaxjaku' matxa'.

9Alkyete nkub' tnajsa'n til juntl ate'qe' tamiw;

atzunju' nxi' tchitpu'n til juntl nel ik'u'n.

10B'a'nxi'x nela' tzak'b'il te jun xjal ati tnab'l

kyetwitz qama b'aj syalit jun xjal xnak.

11Aju' pi's noq njyon q'oj,

ilti'jtzun k'okyel yal juntl kuwxi'x kyetwitz.

12B'a'npete' qama tz'okyal jun tx'u'j ttxu oso qwitz

kyetwitz tu'n tb'in jun xjal jip.

13Aju' min tq'o'n b'a'n tu'me'l t-xel kse'n nb'inchanjtz te

kukx atiju' taq'wixil toj tja.

14Ikyte q'oju' ajttzaj kse'n tnimal a' ajtex piq'j;

ate b'a'n tu'n qik'b'et kyetwitz tu'n txi' toj nim.

15Kab'e' ti'xti' taq'wix twitz Dyos qama txi' tzaqpetu' ati til

ex tu'n tjtz'etu' mixti' til.

16¿Titi' k'ajb'ela' teju' xnak

tu'n tlq'onte nab'l extzun mixti'x nximan?

17Jun qamiw kyeqten tuk'i'l,

nakuj jun qtzik ajqoktz'aq twitz b'is.

18O'kxte' mixti' tnab'l nkyej tziya'n tk'asju' tuk'i'l

ex nkyej tq'o'ntib' ka'yilte tu'n tchjetu' k'as.

19Alkyete noktik'le'n juntl, tajb'il tu'n tb'ujun;

alkyete' ntnima'ntib', axte'ntzaj q'inte tq'ob' tze toj twi'.

20Aju' xjal txlaj tnab'l layx ten toj b'a'nil;

exju' xjal mya'l taq' kb'eltz'aq toj.

21B'isb'ajilx tu'n qok manb'aj te jun xnak k'wal;

mixya tzalajb'ilte' tu'n qok tman jun xnak k'wal.

22Aju' wnaq ntzalaj majx nok te q'anb'il,

atzunju' nb'isin max ntzaj qb'is tu'n.

23Aju' b'inchal myab'a'n ntk'mo'n pwaq toj ewaj,

ntxalpuj ttxolil kawb'il tu'n.

24Aju' xjal b'a'n ximan, njyon nab'l,

atzu'n xnak noqx njawje ti'ju' t-xim.

25Naqx yajb'il ex q'ol tx'u'jilj

noka' k'walb'aj xnak kye' tman.

26Myab'a'n tu'n tz'e'yset twitzju' xjal mixti' til

ex mya tu'me'l tu'n tb'aj pejitju' xjal tnik'alti'j.

27Ati tnab'lju' xjal ntjk'u'n taq',

b'a'n t-ximanteju' min jaw tx'u'jin lwiy.

28Expena' nok q'o'n xnak te ati tnab'l

qama kub' tq'o'n nak'li.