Sal 71 - Mam Ostuncalco Bible

Tna'j Dyos jun tijwnaq

1Nman Dyos, tuk'i'la njyo'na'ye' kolb'ilweye';

¡lalun chin kyej tkolb'e'na!

2¡Chin tkloma ex chin ttzaqpima,

tnik'alna'tati'j!

B'incham xtalb'ila chin tb'itza, ex chin tkloma.

3Tz'okxwita jun pik kolb'ilweye',

¡tz'okxwita te jun nin ja te kolb'ilweye'!

¡Ateju'ya wipumale' ex pik e'wb'il wib'e'!

4Nman Dyos,

chin tkloma toj tq'ob'ju' b'inchal myab'a'n,

toj tq'ob'ju' b'yol wnaq ex teju' tx'u'j twi',

5Taye, ateju'ya q'uqb'ab'l nk'u'je'

atxi'x kuxunqintoqe' q'uqlok nk'u'je' ti'ja.

6Iqa'nxtoq nwi'ye' tu'n ntxuye'

intoq okqe nk'u'je' ti'ja.

¡Initz'je' tu'na!

¡Kchin b'itzale' kukxju' teya!

7Majx nchin jaw lab'ti xjal weye',

atzunta kolb'ilweye'.

8Nim txqan nyole' te ajwalb'ilteya

inb'aj q'ij tu'n nyoline' kyi'j

9lalun chin nel tik'u'na aj ntijine';

lalun chin kyej ttzaqpi'na ajtb'aj wipumale'.

10Kyajb'ilju' wajq'oje tu'n nkub' kyb'yo'ne',

inkyb'u'yi'n kyib' ex in b'ajb'ent ti'j kxim wi'je'.

11Ex inkyma'n: ¡Che lpexe' ti'j ex kytzyunku'ye',

qu'n matxi' kyej kolb'e'n tu'n Dyos

ex mix-a'lo' kklolte! Chechij.

12Lalun tz'el tpa'ntib'a wi'je', Nman Dyos;

¡Lwix kuttzaja klol weye'!

13¡Tz'elxwit kych'ixawju' wi'je'

ex che kub'xwit naj!

¡Tz'elxwit kych'ixaw

ju' kyajb'il tu'n nkub' yajtiye'!

14Ayintzuwe' chin ayole' ti'ja kukxju',

ex kjawil nnima'nxi'xtla;

15kb'ajel q'ij wu'ne' kxe'l nchik'b'a'ne' kye xjal

qama qo' tkola ex matb'inchaya tnik'alilti'j qeye'.

¡Layx kane te'lu toj nwitze'!

16Nman Dyos, kxe'l ntx'olb'a'nju'ye' tb'inchb'ena tb'anilxi'x;

¡kxe'l npakb'a'ne' qa o'kxta tz'aqli!

17Nman Dyos,

aya tzaj xnaq'tzan weye' atxi'x toj ju' nku'xumale',

ex inx che'x npakb'a'ne' tb'inchb'ena tb'anilqexi'x.

18Nman Dyos lalun chin kyej tkolb'i'na

maskye matxi' chin tijine' ex saqtl nwi'ye',

na'mxna' nb'aj yolinwe' ti'ju' tipumala

kyeju' xjal ate' ja'lo ex kyeju' che ul yajxi'tel.

19Nimxi'x toklenju' tkawb'ila tnik'alti'j Nman Dyos;

nim ti'xti' matxi' che tb'inchaya;

¡mix-a'lo' juntl kse'n aya!

20Maskyepe' matxi' tb'inchaya tu'n nlonteye'

txqan yajb'il ex b'is,

ktzajel tq'o'n jumajtlju'ya nchwinqlale';

kchin jawitz tiq'i'na tzmax t-xexi' tx'otx',

21ktzajel tq'o'na woklene' nimxi'x

ex ktzajel tq'uqb'a'n jumajtla nk'u'je'.

22Ayintzunwe', tu'nju' toklena nim,

kchin b'itzale' teya ex kjawil nnimsa'na

tuk'i'l chnab' arpa ex tzintzin,

Nman Dyos, aya Xjan Kydyos aj Israel.

23Okxi'x chin tzalaje'le' ajnb'itzane' teya,

ex tu'n tkyaqil nk'u'je', tu'n oje chin tkola.

24Ex tkyaqil kmuj kxe'l ntx'olb'a'ne' qa tnik'alti'ja,

matxi' tz'el kych'ixawju'

kyajb'iltoq tu'n nkub' yajtiye', chiju' b'itzal.