Sal 5 - Mam Ostuncalco Bible

Na'j Dyos ajqsqix

1-2Nman Dyos, b'intzju'ya nyole',

chin tb'intza ajtjaw tq'ojq'ojel nwi'ye', Nimaqkawil weye'

b'intzju'ya nkub'sb'ile',

qu'n teya nchin k'ulna'ye'.

3Intzaj tb'i'nju'ya tq'ojq'ojel nwi'ye' te prim;

qlax inxi' nchik'b'a'n wib'e' teya,

ex nchin ayone' te ttzaq'web'la.

4Qu'n aya Dyos minti' ntzalaj ti'ju' il;

lay b'ent kyanq'inju' b'inchal myab'a'n tuk'i'la,

5exqe'ju' njaw kynima'n kyib' lay che ten twitza.

Inche el tik'o'nteju'ya b'inchal taq'wix,

6inche kub' t-xitu'nju'ya chalyol ex nche el tik'o'nju'ya xmletz' exqe' b'yol wnaq.

7Ayintzunwe', kb'antel wokxe' toju' tjaya,

tu'nju' tk'u'jlalila wi'je';

¡kb'entel nk'ulune' teya tuk'i'l tkyaqil ninb'il

tu'n nxi' ka'yine' tu'me'lju' tjaya xjan!

8Nman Dyos, chin tiq'ima toju' tnik'alilti'j,

tu'n lalun chin b'o'lje' kyu'n wajq'oje.

Chin tiq'inxa toju' b'e b'a'n.

9Min nche yolinkye' xjal lu ax;

¡nojniqe' tu'n taq'wixil!

Ikykyqulju' kse'n tjulil kyimni k'ab'li;

¡twi' chalyolju' kyaq'!

10¡Tz'e'ysanku'ya kywitz, Nman Dyos!

¡Xitunku'ya kyxim myab'a'n!

ik'unqe'mila tu'n tpaju' kyil nim,

qu'n matxi' jawkyi'nkyib' ti'ja.

11Che tzalajxju' q'uqlok kyk'u'j ti'ja;

che b'itzanx tu'n kytzalajb'il kukxju'

qu'n aya klol kye.

Inche tzalaju' inche k'u'jlanteya,

12Nman Dyos, nche tky'i'wla'n teju'ya tnik'alkyi'j;

ex ktxu'milekyi'j tu'na, naku'j tu'n jun kolb'il tu'nju' t-xtalb'ila, chiju' b'itzal.