1Ex tzaj tyek'u'n Qman Dyos Joswe weye', ju' kynejel pale, wa'ltoq twitzu' tanjl Qman Dyos, ex atitoqju' anjl poqol tk'etz Joswe toj tb'a'nq'ob', tu'n tpoqon ti'j.
2Xi'tzun tma'n tanjl Qman Dyos teju' anjl poqol: ¡Awt Qman Dyos tzak'unteya! ¡Tzak'unjtzwita tu'n Qman Dyos nk'u'jlante Jerusalen! Qu'n ikyte ichan ju'lu kse'n jun ttxalq'aq' nk'ant ajtetz q'in toj q'aq', chij.
3Wa'ltoq Joswe twitzju' tanjl Dyos, tz'ilqetoqju' t-xb'alun tok.
4Xi'tzun tma'n anjl kyeju' onilte tu'n telkyiq'i'n ti'j Joswe tz'il. Ex xitma'n te: Aja'lu a tz'elpuna'ju' qa matxi' tz'el wiq'ine' tila. ¡Ja'lo knb'incha'ye' tu'n tokq'o'n t-xb'aluna tb'anil kse'n toj ninq'ij! chij.
5Tchaq'tzuntz kyeju' onilte tu'n tjaxkyq'on jun toj twi' Joswe ẍnu'l b'a'nxi'x. Jaxtzun kyq'o'n jun toj twi' Joswe, ex okkyq'o'n t-xb'alun te ninq'ij. Axtoqtzu' wa'la' tanjl Dyos.
6Xi'tzun tma'n tanjl Qman Dyos te Joswe kjalu:
7Chi Qman Dyos nimtipumal kjalu: B'eta toju' nb'eye' ex b'inchamju'ya matxi' b'ajx nma'ne' teya. Qatzun matb'inchaya, oktzun kjeltentza ka'yilteju' njaye'. Aya kxe'l ka'yinte exu' twi' tpen, ex kxe'l nq'o'ne' jun toklena kyxolju' anjl lu nche ajb'en weye'.
8B'inku'ya b'a'nxi'x Joswe, aya kynejel pale, ex tu'n kyb'inteju' tuk'i'la aye' pale, qu'n kykyaqilxe' jun techlal t-sanjelal Dyos qeye': Ktzajel wiq'inju'ye' nmajine', aju' tch'ẍu'l.
9Matxi' kub' nq'o'ne' jun ab'j wuq ttx'u'k twitz Joswe, ex ayinku'ye' chin okyel tz'ib'ante twitzu' ab'j. Ex toj jun q'ijx k'elela' wi'ne' kyilju' tnam lu.
10Ajtzun tponju' tq'ijlalil lu, che oyile' junjun te juntl ajkytene' toj nak'b'il tjaq' tqan lob'j ub'a ex tqan lob'j iw. Ayine' Dyos Manb'aj nimwipumale' nchin q'mante, chi Dyos.
Who We AreWhat We EelieveWhat We Do
2025 by iamachristian.org,Inc All rights reserved.
