Ez 17 - Mam Ostuncalco Bible

Techlal ti'j tqan ub'a ex t'iw

1Tzaj yolin Qman Dyos weye', tma:

2Ichan, q'manxa jun techlal teju' tnam Israel.

3Q'maxa kye:

A ntma'n Dyos ja'lu:

Ponju' t'iw nintzku' twi' witz Lib'ano

nimaqqe' t-xik' ex nim nktxet kyu'n,

chukchaq che ka'yinju' t-smal.

Tzyetju' tunin jun k'ute tu'n,

4tzaj ttoqi'n tq'ob' nimxi'x twe'

xi'tzuntz awalte toj jun kytx'otx' xk'aẍlel,

toj jun nintnam nim k'aẍjel ati toj.

5Jatztzun tiq'in jun ij toj tx'otx'

ex ku'x tawa'n toj jun tx'otx' tex awb'il,

ttzi jun a', nim a' ati toj.

6Jawu'l twi'ju' ij

ex ok te jun tqan ub'a pujin;

maskyepe' min ch'iyxi'x twe',

b'jaw ch'iy tq'ob' tu'me'lju' t'iw,

ex nche'xxi' lq'e tlok' toj tx'otx'.

Ex ok te jun tqan ub'a;

eb'aj tzaj tch'xu'l ex eb'je'l tq'ob'.

7Atitoqtzun juntl t'iw niminxi'x,

nimaqqe'xi'x t-xik' ex nim txqan t-smal ati.

Atzu'n tqan ub'a eb'ajx lq'exi'xtl tlok'

ex eb'ajx ch'iyu' tq'ob' tu'me'lju' t'iw,

tu'n txitq'o'n txqantl a' te, najchaq tk'etzu' ja awa'na'.

8Expe' awa'ntoq toj tb'anil tx'otx',

jata' txqan a',

jatu'n tb'aj ch'iy tq'ob' ex tu'n twitzan

ex tu'n tok te jun tqan ub'a tb'anilxi'x.

9Q'manxtzuna kye:

Chi Dyos kjalu: Lay tz'anq'inte' tqan ub'a lu.

Kjawitz xb'oqi'n tlok' tu'n tnejel t'iw,

ex che b'je'lel tz'aqju' twitz tu'n;

naq tu'n ch'i'n ipumalj ex mya nim xjal

kjawitz xb'oqliya' tuk'i'l tlok',

ex che tzqijel tkyaqilu' t-xul ẍe'tzaj.

10Maskye ma ku'x awa'ntl, lay tzaj t-xul;

ktzqijel ajttzaj kyq'iq' toj tjawetzq'ij tib'aj;

ktzqijel jatu'n ttzaja' t-xu, chiku'ya, chi Dyos.

11Tzaj yolin Qman Dyos weye', tman:

12Qaninxa teju' pi's tnam lu qa b'i'n kyu'n titi' tz'elpuna' techlal lu. Q'manxa kye: Ulju' nimaqkawil aj B'ab'ilon toj Jerusalen ex eb'jo'kx tjpu'n nimaqkawil aj Juda kyuk'i'lju' nche kawin tuk'i'l, ex eb'ajx tiq'i'n tuk'i'l B'ab'ilon.

13Jawtzun t-sk'o'n jun tk'wal nimaqkawil ex kyej b'antti'j jun tyol tuk'i'l, oktchq'o'n tu'n tmante qa ilti'j kjapumelju' tu'n, ex eb'ajx tiq'i'n xjal nimaq kyoklen toju' tx'otx'.

14Tu'ntzun tkyaju' tkawb'il Juda numjni, lay b'ent tjaw tiq'i'ntib', maskyepe' mataq'tib' tu'n tjapunju' yol kyej b'entti'j tu'n ex tu'n tten kukxju'.

15Atzu'n tk'wal nimaqkawil lu jawtiq'i'ntib' ti'ju' nimaqkawil aj B'ab'ilon ex eb'ajx t-sma'n t-sanjelal toj Ejipt qanil txqan chej ex txqan ichan nim kyajlal. ¿Ma b'a'ntzun kxe'la' yajxi'tl exqa kkletel te kamik toj kywitze'? ¿Ma ktzulo tzaqpajel jun xjal qa min xjapun tyol tu'n?

16Axxi'x, ayine' Dyos Manb'aj nchin q'mante, kkyimelte' xjal toj B'ab'ilon, ju' naqxjaw tze'n ti'ju' tyol ttziya ex min xtb'inchaju' yol kyej b'entti'j kyu'n tuk'i'l nimaqkawil okq'onte toju' q'uqb'il.

17Ajtzun ttzaju' nimaqkawil aj B'ab'ilon q'ojil ti'j, kjawil tch'uqi'n tx'otx' ex nintapi ti'jile nintnam, ajkykub' tb'yo'n txqan xjal, lay tzaj tchq'o'nte paraon jun tnej xjal te q'oj kuw onilte ex lay che tzaj tchq'o'n txqan xjal,

18naqna' xjaw tze'n ti'ju' yol ttziya ex min xjapunju' yol kyej b'entti'j tu'n; ojetoq ttziya tu'n tjapun tu'n, extzun matb'incha tkyaqil ja'lu. Qu'mtzun layx klet.

19Axxi'x nxinma'ne', ayine' Dyos Manb'aj: naqxjaw ttze'nju' ttziya weye' tu'n tjapun tu'n, ex min xtb'inchaju' tyol kyejni b'entti'j tu'n wuk'i'le', qu'mtzun k'okyel toj xjel wu'ne' ti'ju' lu.

20Kb'el nxone' pa tzuyb'il kyiẍ tib'aj, kntzyu'tzuntze' toj, kxel wiq'i'ne' B'ab'ilon, atzuntzu' k'okyela' nq'o'ne' toj xjel tu'n tpaju' min xjapun tyol weye'.

21Che kyimelju' t-xjal kuw che q'ojin toj q'oj, aye'tzu'n che kjel anq'in che b'ajex sputj toj kyq'iq' twitz tx'otx'. K'eleltzun kynik'tze' qa ayine' Dyos Manb'aj matxi' chin yoline'.

22Nxinma'ne' ayine' Dyos Manb'aj: Ex ikx ktzajel ntzyu'ne' tunun k'ute nimxi'x twe'; ktzajel ntoqi'ne' jun t-xul a'la'j ti'ju' tq'ob' nimxi'x twe', ex ayinku'ye' chin b'elix awante twi' jun witz nimxi'x twe',

23twi'ju' witz nimxi'x twe' toj Israel. Che ch'iyel tq'ob', kwitzal ex k'okyel te jun k'ute tb'anilxi'x. Che najal tkyaqil ch'ix txkup tjaq', ex tkyaqil kyyajajil pich' ktenb'el kyja toj kyxlekumanju' tq'ob'.

24K'eleltzun kynik' kykyaqilju' tze toj kojb'il qa ayine' Dyos Manb'aj. Kjawil ntx'e'mu'ne' tze njaw tnima'ntib' ex in nch'isa'ne' tze b'o's twe'. Wu'ne' nkub'a' tzqiju' tze cha'x ex wu'ne' ncha'xi'xa'jtlju' tze tzqij. Ayine' Dyos Manb'aj, nchin q'mante ex in japun wu'ne', chiku'ya, chi Dyos.