Jue 8 - Mam Ostuncalco Bible

E'tzyet nimaqkawil aj Madyan tu'n Jedeon

1Tzaj kytx'u'jil tyajajil Eprayin ti'j Jedeon ex e'aq'wi wulil tuk'i'l qu'n min xitchq'o'n kytxokli tej tex q'ojil kyi'ju' aj Madyan.

2Atzunte Jedeon xittzaq'we'n kye kjalu:

—¿Ma mixtzunti' inel kynik'e' ti'j qa nimkye' xkyb'incha kyetwitzwe' xnb'incha? Nimnate' toklenju' ch'i'nkye' xkyb'incha kyetwitz txqanqe' xqb'incha.

3Mache kub' tq'o'n Qman Dyos Oreb' ex Seeb' nejenel kye aj Madyan toj kyq'ob'e'. ¿Titi'tzunwe' xb'ent wu'n kse'nju' xb'ent kyu'ne'? chij.

Kub'tzun kyk'u'j tyajajil Eprayin tej kyb'inte tyol Jedeon.

4E'pon Jedeon kyuk'i'lju' o'lajnaq (300) t-xjal ttzi nin a' Jordan, ex ilti'j e'jlajin, b'a'ntzun qa matxitoq che sikti b'a'nxi'x tu'n tpaj e'xilpe kyi'ju' ajq'oj.

5Xitqani'n Jedeon kyeju' najliqe' Sukot ikjalu:

—Kyb'inchame' xtalb'il kyq'ontz junqe' qwa, qu'n matxi' qo siktiye' b'a'nxi'x. Lepchqo'xe' knolkyeju' nimaqkawil Seb'a ex Salmuna, aj Madyan qe', chij.

6Aye'tzu'n nejenel te Sukot tzaj kytzaq'we'n:

—¿Ma matxitzun che tzyet Seb'a ex Salmuna kyu'ne', qa txi' qq'o'ne' kywaye'? chechij te.

7Xitzun ttzaq'we'n Gedeon kye:

—¡Tenkuna'j nej, naqa ẍe kub' tq'o'n Qman Dyos Seb'a ex Salmuna toj qq'ob'e', k'anjetztzun qi'jtze' ẍlat'u'lkyeye' tu'n ch'i'x intzaj ch'iy toj chq'ajlaj! chij.

8Exi'tzuntz Penwel, ex xikyqani'n kywa atzu', ex axte yolju' tzaj q'ma'n kye kse'nxju' Sukot. Tu'ntzun tpaju',

9xitma'n Gedeon kye: ¡Tenkuna'j nej, aj qkanb'ane', k'anjetz qi'je' xitulteju' ja nimin twe' lu! chij.

10Ate'toq Seb'a ex Salmuna Karkor kyuk'i'l junmutx' wuqlajk'al lajnaq (15,000) ichan, ju' o'qe'kxtoqtl xjalju' te q'oj te tjawetzq'ij ate'x, qu'n matxitoq che kyimxi' o'lajmutx' (120,000).

11Xitzun kyljo'n Jedeon kyb'e kyuk'i'lu' t-xjal toju' b'e inxi' ti'jileju' chq'ajlaj toj tjawetzq'ij te tnam Nob'a ex Jojb'ea, ex mixti' kynab'en tej toktzaqpaj q'ojil kyi'j.

12E' oq Seb'a ex Salmuna kywitz, aye'tzunkye Jedeon exilpe kyi'j ex e'tzyet kyu'n, ex majx tzaj tchewal kyi'ju' kyxjal te q'oj.

13Tej kxi'toq tanjtzkyi'j Jedeon toj q'oj toju' b'e inxi' Eres,

14kytzuy jun ku'xun aj Sukot ex ok toj xjel tu'n Jedeon; atzunte' ku'xun xi' ttz'ib'a'n kyb'iju' oxnaq wuqlajoj (77) nejenel ex tijwnaq te Sukot te Jedeon.

15E'xi'tzun Jedeon Sukot ex xitma'n kyeju' xjal toju' tnam lu:

—¿Ma na'n kyu'ne' tej qb'aj kyxmayine' tu'n kpaj Seb'a ex Salmuna? ¿Na'n kyu'ne' qa kub' kyxk'a'yi'ne' wab'j qeye', siktniqo'toqe' b'a'nxi'x, ex majx tzaj kychitpu'ne' qplaje' qa na'mxtoq kytzyet qu'ne'? ¡Luqe'tzun lu ja'lu! chij.

16Tzajtzun kyiq'i'n Jedeon txqan ch'i'x toj chq'ajlaj, kyu'ntzun ja'lu kub' kytz'e'ysa'n kywitzu' tijwnaq te Sukot.

17Ex kub' kyxitu'n ja nimin twe' te Penwel, ex e'kub' kyb'yo'n xjal toju' nintnam lu.

18Xitzun t-xjelu'n Jedeon kye Seb'a ex Salmuna:

—¿Se'n qetzunju' xjal ẍekub' kyb'yo'ne' toj Tab'or? chij.

Aye'tzunkye xikytzaqwe'n:

—Ikxi'x che ka'yinju' kse'n aya. Naku'j tk'wal nimaqkawilqe', chechij.

19Jaw t-ẍch'i'ntzun Jedeontz kjalu:

—¡Aye' witz'ine'! ¡Witz'in qeku'xi'x weju'ye' ẍekub' kyb'yo'ne'! Axxi'x twitz Qman Dyos, noqwit minti' ẍekub' kyb'yo'ne', mixti'wtlo ẍekub' qb'yo'ne' ja'lo, chij kye.

20Xitma'ntzuntz te Jeter ju' tnejel tk'wal:

—¡B'yonqe'ku'ya! chij.

Atzunte Jeter ku'xunxtoq, mixtaq'a'tib' tu'n tjawtz tiq'i'n tk'uẍtx'e'nb'il.

21Aye'tzunkye Seb'a ex Salmuna xikyma'n te Jedeon:

¡Aku'ta qo tb'yonku'ya! ¡Qu'n xi'nnela'te' ichan tnik'tzil qa minti' nxob'! chechij.

Jawtzun we' Gedeontz ex e'kub'tb'yo'n, ex eltiq'i'n kyu kykamey Seb'a ex Salmuna.

22Xi'tzun kyma'n aj Israel te Jedeon kjalu:

—Matxina' qo tkola toj kyq'ob' aj Madyan, ja'lo qajb'ile' aya tu'n tkawina qib'aje' kyuk'i'lju' tyajajila, chechij te.

23Atzunte Jedeon xittzaq'we'n kye:

—Myayinwe' ex myaye'ju' nk'wale' kqo kawile' kyib'aje'. Ate Qman Dyos kkawil kyib'aje'.

24Naq o'kx wajb'ile' tu'n ttzaj kyq'o'ne' xmilq'ob'j selkyiq'i'ne' kye ajq'oj, chij.

Aye'ju' xmilq'ob'aj q'anpwaq lu intoq che okkyq'o'nju' xjal ajq'oj, qu'n najlqe' toj chq'ajlaj.

25Aye'tzu'n aj Israel kub' kyslik'u'n jun pinpa't twitz tx'otx', ex b'ajkub' kyq'o'n xmilq'ob'j tib'aj, xikyma'ntzuntz te Jedeon:

—Luqe' lu, chechij.

26Qapelo kab'naq kab'e' (42) lib'r q'anpwaq jaw tu'n tkyaqilju' xmilq'ob'j, ex min e'okju' u'wj exqe' tal ab'j tb'anilqe' ex xb'alun sed chub'i'nkywitz toj tajlal, ju' oksa'nktoq kyu'n nimaqkawil toj Madyan, exqe' kyu kykamey.

27Tu'ntzu'n q'anpwaq lu kub' tb'incha'n Jedeon jun tilb'ilal ex kub' tq'o'n toj Opra ju' ninttanam, tu'ntzun tpaju' tilb'ilal lu min e'nimantl aj Israel te Qman Dyos, okju' lu te jun takpuje'n te Jedeon ex kyeju' toj tja.

28Iktzu'n e'kyaja' aj Madyan tjaq' kykawb'il aj Israel ex mixti' jaw kyiq'i'ntlkyib'. Kab'naq (40) ab'q'i ten nak'b'il toju' tx'otx' tej itz'toq Jedeon.

Kyim Jedeon

29-30Xi'tzun Jedeon najal tojku'ju' tja, ex ten oxnaq lajoj (70) tk'wal, qu'n b'a'npuntoq t-xu'jil.

31Ex ten jun tqya toj Sikyem, ex itz'ji jun tk'wal tuk'i'l, Ab'imelek tb'i oktq'o'n.

32Matxitoq tijinxi'x Jedeon tej kyim, ex kux mqu'n toju' muqb'il te Joas ju' tman, toj Opra, ninkytanam k'loj tyajajil Ab'yeser.

33Tkyimlenxi'tzun Jedeon, kyej kytzaqpi'n jumajtl aj Israel Qman Dyos, xi' e'k'uluna'tl kyeju' chukchaq tilb'ilal B'aal, ex jaw kysk'o'n B'aal-b'erit te kydyos.

34Ik'tna'l Qman Dyos kyu'n, ju' ojetoq klonkye toj kyq'ob' kykyaqilju' kyajq'oj kyi'jile,

35ex minti' kyaq' b'a'n tu'me'l t-xel kyeju' toj tja Jedeon, tu'n tkyaqilju' b'a'n tb'incha kye.