Dt CHIK'B'AB'L - Mam Ostuncalco Bible
CHIK'B'AB'LAju' Deuteronomio atz'elpuna'ju' Tkab' chaq'b'il mujqa Q'mab'l tetlju' Chaq'b'il. Nche knet kab'e' tnej tpakb'ab'l Moyses teju' tnam toj, na'mxtoq kyokx toju' tx'otx' q'o'ntl kye, tchik'b'a jumajtlju' chaq'b'il tzaj tma'n Qman Dyos twi' witz Sinayi kye. Ntzaj tna'n tkyaqilju' b'aj toj b'e tej intoq che b'et toju' kab'naq ab'q'i tzajx kyetzlen toj Ejipt. A tnab'l u'ju', myanaq o'kx mattzaqpi Qman Dyos ttanam sk'o'n tu'n ex intk'u'jla'n, ex ikx matxi' tk'iwla ex mat-ẍaqlu toj tkyaqilju' tab'q'iyil ẍe b'et toj chq'ajlaj. Ati tu'n ttzaj kyna'n aj Israel tkyaqil ja'lu, ex tu'n kyajwalinte Qman Dyos ex tu'n kyk'u'jlante, tu'ntzun kyk'monte ky'i'wb'il kukxju'. Aye' tqek' tyol Dyos nim kyoklen toju' u'j lu aye': (6.4-6), ex axi'xpe' tqek' jwe', ju' tma Qman Jesukrist qa a nim toklenju' kyxolju' chaq'b'il aju' intma'n: K'u'jlama Qman Dyos tu'n tkyaqil tanmiya, tu'n tkyaqil tk'u'ja ex tu'n tkyaqil tipumala, chij.Aju' tnejel tpakb'ab'l Moyses, jun tqanil toj jte'x yol ti'ju' eb'jik'a' toj chq'ajlaj, (kyoju' tnej 1-4); atzu'n tkab', jun nab'l chik'b'a'nxi'x tzajni toju' Lajoj Chaq'b'il, e'kub' ttz'ib'a'n chaq'b'il, nuk'b'il ex b'a'npun ab'tzib'l tojile ttxolil, (kyoju' tnej 5-26); ex xitq'o'n Moyses xnaq'tzb'il kye aj Israel se'ntoq tu'n kyokxa' toju' tx'otx' kanaan (kyoju' tnej 27 ex 28); ex b'inchet ch'i'ntlju' yol kyej b'entti'j twi' witz Sinayi (kyoju' tnej 29 ex 30); te b'ajsb'iltzun, tej tna'nte Moyses tzaqpinkyeju' ttanam Dyos qa xi'toq tponb'aju' tchwinqlal, eb'aj tq'olb'e'nju' tnam, oktq'o'n Joswe te t-xel ex naq xitka'yi'nju' tx'otx' tziya'ntltoq kye najchaq, kyimtzuntz twi' witz Neb'o (kyoju' tnej 31-34).