1 Cr 12 - Mam Ostuncalco Bible

Aye' xjal kymujb'a kyib' tuk'i'l Dab'i

1Tej exnitoq oq Dab'i twitz Sawul, ju' tk'wal Kyis, e'pon jun k'loj xjal te q'oj min nche xob' tk'etz Dab'i toj tnam Siklaj, tu'n kymojb'ante kyib' tuk'i'l, ju' oktoq che onil ti'j toj q'oj.

2Iq'i'miletoq kysmaju' xjal te q'oj, ex b'a'ntoq che xon ab'j tuk'i'l chik'tze ex tu'n kyxon tuk'i'l smaj, tu'n kyb'a'nq'ob' mujqa tu'n kynayaj. Aye' ja'lu:

Twitze'l Sawul, kyxol tyajajil B'enjamin:

3Ayeser, ju' nejenel, ex Joas, tk'wal Semaaqe', najlqe' toju' tnam Wib'ea; Jesyel ex Pelet, tk'wal Asmab'etqe'; B'eraka ex Jewu, najlitoq toj tnam Anatot;

4Ismayiy, aj Kab'aon, jun kyxolju' junaq lajoj min nche' xob' ex nejenel kye; Jeremiy, Jaasyel, Joanan, Josab'ad aj Wedera,

5Elusay, Jerimot, B'ealiy, Semariy; Sepatiy, ju' aj Arup;

6Elkana, Isiy, Asarel, Joeser ex Jasob'eam, tyajajil Koreqe';

7ex Joela tuk'i'l Seb'adiy, tk'wal Jeroamqe', ju' aj Wedor.

8Ex kymujb'a kyib' junjun tyajajil Kad tuk'i'l Dab'i tej atitoq toju' ja te ipumalj toj chq'ajlaj. B'a'nqe' te q'oj ex min nche xob', xnaq'tza'nqe' te q'oj ex iq'imiletoq kykolb'il ex kych'ut. Naku'j b'alunqe' ex kuwtoq che ojqelan toj k'ul kse'nte msat.

9Aye' ja'lu: tnejel, Eser; tkab', Ab'diy; toxi'n, Elyab';

10tkyaji'n, Mismana; tjwe'yi'n, Jeremiy;

11tqaqi'n, Atay; twuqi'n, Elyel;

12twajxaqi'n, Joanan; tb'eljoji'n, Elsab'ad;

13tlajoji'n, Jeremiy; ex tjunlajoji'n, Makb'anay.

14Nejenel qe'toqju' tyajajil Kad lu kye xjal te q'oj. Aju' naqch'i'n toklen kyxol, tok toklen kyib'aj jo'naq (100) xjal, atzu'n nim toklen, kyib'aj kab'k'al lajnaq (1,000) xjal.

15Aye'tzun e'jlajinju' toju' nin a' Jordan ttzyetlen jb'alil, tej intoq ch'iyju' nin a' ex b'je'x qojl ti'jile, ex eb'aj oq kykyaqilju' ate'toq kyoju' b'ya' toj tjawetzq'ij ex toj tkub'exq'ij kyu'n.

16Expe' e'pon junjun ichan kyyajajil B'enjamin ex Juda toju' ja te ipumalj ex kymujb'a kyib' tuk'i'l Dab'i.

17Etztzun Dab'i k'lulkye ex xitma'n kye: Qa toj nak'b'il ẍe tzaja'ye' ex tu'n kyonine' wuk'i'le', kche nk'ma'ye' tuk'i'l tkyaqil nk'u'je' tu'n kymujb'ante kyib'e' wuk'i'le'; qatzun mache ule' tu'n kyjaw miltz'uje' wi'je' ex tu'n nxi' kyq'o'ne' toj kyq'ob' wajq'oje', extzun mixti' wile', ¡awt Qman Dyos tzaj ka'yinte ex tu'n tkub' ttz'e'ysa'n kwitze'! chij.

18Atzunte Amasay, nejenel kyeju' junaq lajoj (30) xjal, noj tu'n T-xew Dyos ex tma:

¡B'a'nwt tena'ya Dab'i, tk'wal Jese!

¡Tenxwita toj nak'b'il!

¡Che tenxwite' toj nak'b'il kyuk'i'lju' inche onin ti'ja,

qu'n matxi' tz'oninjtza tu'n Qman Dyos! chij.

Etk'amtzun Dab'i ex xitq'o'n kyoklen kyxolju' nejenel kyeju' t-xjal te q'oj.

19Ex kymujb'a'nkyib' junjun tyajajil Manases tuk'i'l Dab'i, tej txi' najal kyxol pilistey tu'n tq'ojin ti'j Sawul. Expe' mixti' b'ent tonin Dab'i kyi'ju' pilistey tej kyq'ojin ti'j Sawul, qu'n e'yolinju' kawil pilistey ti'j ex kyej b'entti'j kyu'n tu'n tel kypa'n Dab'i kyi'j, qu'n kyma: ¡Jaku' tz'ok miltz'uj Dab'i qi'j ex jaku' tz'anjtlti'j tk'etz Sawul ju' tajaw! chechij.

20Aye' ichan ja'lu, tyajajil Manasesqe', kymujb'a kyib' tuk'i'l Dab'i tej txi' toj Siklaj, aye': Adna, Josab'ad, Jedyael, Mikael, Josab'ad, Elyu ex Siletay, nejenelqe' kye nimaqk'loj xjal te q'oj tyajajil Manases.

21Aye'tzun e'oninju' ti'j Dab'i, kyuk'i'lu' xjal te q'oj, qu'n kykyaqil nimaq q'ojilqe' min nche xob' ex e'ok te nejenel kyeju' xjal te q'oj.

22Atl junjun q'ij ljo'nxi'xtoq kypon txqantl xjal onilte Dab'i, tzmaxi'j tchmet-xi'x kyb'aju' t-xjal te q'oj.

T-xjal Dab'i te q'oj

23A kyajlal xjal ja'lu b'incha'n kyten te q'oj kymujb'a kyib' tuk'i'l Dab'i toj Eb'ron, tu'n txi' kyq'o'n tkawb'il Sawul te, kse'nxju' tchaq' Qman Dyos:

24Wuqlajk'al (6,800) ichan tyajajil Juda, iq'i'mile kykolb'il ex kych'ut, b'entni kyten tu'n kyq'ojin.

25Wuqlajk'al o'lajnaq (7,100) xjal te q'oj tyajajil Simeon, min nche xob', b'entni kyten tu'n kyq'ojin.

26Atzun junlajk'al lajnaq (4,600) Kyxolju' aj Leb'i,

27tuk'i'ltzun b'eljojk'al jo'naq (3,700) kyxolju' toj tja Aaron, tuk'i'l Joyada, nejenel kye,

28ex Sadok, jun ku'xun te q'oj min xob', kyuky'i'l junaq kab'e' (22) nejenel kyxolju' toj tja.

29Wuqk'al lajnaq (3,000) ichan tyajajil B'enjamin, aye'xu' tyajajil Sawul, qu'n aye' kynimal minti' e'jaw miltz'uj ti'j Sawul toju' tq'ijlalil tkawb'il.

30Kab'mutx' kab'lajk'al (20,800) xjal te q'oj kyxol tyajajil Eprayin, min nche xob', nimxi'x kyoklen kyxolu' k'loj kywitze'l.

31Kab'mutx' jo'k'al (18,000) kyxolju' nik'jan tyajajil Manases, q'ma'ntl ti'j tu'n kyb'ajx q'olokte Dab'i te nimaqkawil.

32Lajnaq (200) nejenel kyxolju' tyajajil Isakar, aye' npon kynab'l kyi'ju' tq'ijlalil tu'n kyojtzqinte titi' tu'n kyb'inchante aj Israel, kyuky'i'lxi' kykyaqilju' xjal ate' toj kyq'ob' kyxolju' tnej kyyajajil.

33Qaqmutx' jo'k'al (50,000) ichan kyxolu' tyajajil Sab'ulon, b'entni kyten tu'n kyq'ojin tuk'i'l tkyaqil kyq'ojb'il, majxkub' kyxima'n tu'n kyonin tuk'i'l Dab'i.

34Kab'k'al lajnaq (1,000) nejenel kyxolju' tyajajil Neptali, kyuk'i'l kyajmutx' kab'lajk'al lajnaq (37,000) ichan iq'i'mile kych'ut ex kykolb'il.

35Oxmutx' junlajk'al lajnaq (28,600) xjal te q'oj kyxolju' tyajajil Dan.

36Jo'mutx' (40,000) xjal te q'oj kyxolju' tyajajil Aser, b'entni kyten tu'n kyq'ojin.

37Expe' o'lajmutx' (120,000) ichan jlajxi' nin a' Jordan, kyxolju' kyyajajil Rub'en ex Kad exju' nik'jan tyajajil Manases, iq'i'mile' tkyaqilu' kyq'ojb'il.

38Kykyaqilju' ichan te q'oj lu, b'incha'mile kyten tu'n kyq'ojin, majxkub' kyxima'n ex tu'n tkyaqil kyk'u'j exi' toj tnam Eb'ron q'olokte toklen Dab'i te nimaqkawil tib'aj tkyaqilu' tnam Israel; exqe'ju' txqantl aj Israel axtoq kyximju'.

39Oxe' q'ij e'ten atzu' tuk'i'l Dab'i, intoq che wan ex intoq che k'wan, qu'n b'ajkub' b'incha'n kywa kyu'n kywnaqil.

40Exqepe'ju' kyb'sin exqe'ju' kyyajajil Isakar, Sab'ulon ex Neptali, pon kyiq'i'n wab'j kye, kyi'j b'ur, kamey, mul ex kyi'j wakx. B'aj pon kyiq'i'n: chen triy, muqin iw, twitz ub'a tzqijsa'n, b'in, aseyt, tman wakx ex rit; nim xikyiq'i'n, qu'n nimxi'xtoq tzalajb'il kyxol aj Israel.