Is 65 - Mam Ostuncalco Bible

B'ajsab'l Kyeju' B'inchal Myab'a'n

1Intma'n Qman Dyos kjalu:

Aye'ju' mixti'xi'te tzajkyqani'n weye'

ẍe kub'san nwitze';

machin jyete' kyu'nju'

b'ajx chin kyjoya'xi'ye' nejtl.

Te jun tnam b'ajx kub'sana' nwitze'

xxanma'ne' kjalu: Luqine' lu nchije'.

2B'aj q'ij wu'ne' xinq'o'n nq'ob'e'

tu'n ttzaj wiq'i'ne' jun tnam pi's

ljo'ntoq tb'e, myab'a'n

axnxitiq'i'nju' tnab'l myab'a'n;

3jun tnam nwitzku'xi'xe'

in oka'toq tq'o'n ntx'u'jile' kukxju';

intoq kub' tq'o'n chojb'il kye witzleb' kyoj awal

ex intoq kub' ttz'e'ysa'n sturak kyib'aj q'olb'eb'l tzq'ajsa'n loq';

4intoq kub' qe kyxol muqb'il

ex nb'aj qonik'an tu'n kyoj e'wb'il

intoq ch'yon tchib'jil b'och

nojni tk'wil tu'n ta'l chib'j tzu'wtl.

5Intma'n kjalu: Axtzun tenkja'ya na'tz, lalun chin tzaj tyeku'na;

qu'n xjanqinxi'xwe', chij.

Ikyqe'kye xjalju' lu kse'n q'aq' nk'ant nb'aj q'ij;

in okkyq'o'n ntx'u'jile' naku'j sib' toj qwitz.

6Tkyaqiltzunte' lu tz'ib'a'ntl nwitze',

ex lay naqwit kb'el nchle'n nq'ob'e';

k'okyel nq'o'ne' tu'me'l t-xel kye,

7tu'n tpaju' b'yojxjali'n xkyb'incha

ex xb'aj kyb'incha'n kyman.

E'b'aj tz'e'ysan sturak kywi' witz

ex b'jo'k kyq'o'n ntx'u'jile' kywi'witz.

Nejtl che okyel toj xjel wu'ne'

kkychja'tzuntz toj kyil, chij.

Aku' Qman Dyos q'mante.

Ttziya Qman Dyos tu'n ttzaj tq'o'n k'i'wb'il

8Intma'n Qman Dyos kjalu:

Qa nim ta'l ub'a ati

min nkub' kytxa'ju'nkye xjal,

qu'n nim b'in inel toj.

Ikytzunwe' knb'incha' tu'n nk'u'jlalile' kyi'ju' nmajine';

lay kub' nxitu'ne' tkyaqilju' nintnam.

9Knb'incha'ye' tu'n kychmet tyajajil Jakob'

ex tu'n kyten xjal aj Juda najal kywi'witz weye'.

Aye' sk'o'nqe' wu'ne' che tzyulteju' tx'otx',

che najalju' ajb'el weye' twitz.

10Nim txqan tritju' njyon wi'je'

che tenb'el toju' b'ya' Saron

ex che wal kywakyix toju' b'ya' Akor.

11Aye'tzunkye' nelkypa'n kyib'e' wi'je'

ex nik'tna'lju' witz xjan weye' kyu'ne',

nkub' kyq'o'ne' wab'j ex b'in kywitz Kad ex Meri,

aye' witzleb' janche qanina' xjal kyswert,

12myab'a'n tzul kyeye':

che kb'el b'yo'ne' tu'n k'uẍtx'e'nb'il.

Qu'n e'ntxokye' ex min ntzaj kytzaq'we'ne';

nyoline' kyeye' ex min nkub' kyb'i'ne';

xikyb'incha'ne' min nkub' toj nwitze',

a jawkysk'o'nju'ye' nel wik'u'ne'.

13Tu'ntzunju' nxinma'ne' kyeye':

Ktenb'el kywaju' nche ajb'en weye',

aye'tzunkye' che okyele' twitz we'yaj;

ktenb'el kyk'wa'ju' ajb'el weye',

aye'tzunkye' che najele' tu'n k'waj;

che tzalajelju' ajb'el weye',

aye'tzunkye' k'elel kych'ixawe';

14che b'itzalju' ajb'el weye'

tu'nju' tzalajb'il ati toj kyanmi,

aye'tzunkye' che ẍch'ile' ex che oq'ele'

tu'n b'is ex yajb'il nik'xkyu'ne'.

15K'ajb'elju' kyb'iye' kyu'n sk'o'nqe' wu'ne'

tu'n ttzajkytxko'n taq'wix ex kamik kyi'j txqantl xjal,

aye'tzunwe' nmajin knch'exb'eye' kyb'i.

16Alkyexku' xjal toju' tnam lu matqani jun k'i'wb'il,

ktzajel tqani'n weye' ayine' Dyos njapun nyole';

ex alkyexku' xjal toju' tnam lu matma jun tyol tu'n tjapun tu'n,

ktma' toj nb'iye' ayine' Dyos njapun nyole'.

Mab'jik'tna'lju' yajb'il e'tena' ojtxi',

lay tz'ok nka'yi'n jumajtle' yajb'ilkye.

17Kyka'yintzpe'ye', kb'el nb'incha'ne'

jun ak'a'j kya'j ex jun ak'a'j tx'otx'.

K'ik'el tna'lte' matxi' b'ajik',

mix-a'lo'tlte ktzajel na'nte.

18Che tzalajxe' tejumajx

tu'nju' kb'el nb'incha'ne',

qu'n knb'incha'ye' jun Jerusalen tzalajb'il ktenb'ela'

ex knajal jun tnam tuk'i'l tzalajb'il toj.

19Kchin tzalajelku'we' ti'j Jerusalen

ex knna'we' tzalajb'il ti'ju' ntaname'.

Lay b'injtz jumajtl oq'e'n toj

ex lay b'injtztl sich' tu'n b'is.

20Mixti'tlte k'wal okwit kyimel b'o'sx,

ex mixti'tlte tijwnaq laywit japun tchwinqlal.

Ku'xunte' qama kyim ajtel jo'naq ab'q'i,

qatzun min xjapun toj jo'naq ab'q'i, qani'n myab'a'n tib'aj.

21Kjawil kyb'incha'n xjal kyja ex che najal kyoj,

k'okyel kyawa'n tqan ky-ub'a ex che wal ti'j.

22Mya junwt kjawil b'inchante ja ex junxi'tlwit knajal toj,

mujqa junwt k'awal ex junxi'tlwit kwal ti'j.

Ktenb'el tchwinqlalju' ntaname' nimtoj kse'n junwi' tze,

kche walju' ntaname' ti'ju' kyaq'unb'en

23Lay kub'najte' kyaqunb'en

ex lay che kyim kyk'wal qa na'mxtoq tb'aj kychwinqlal,

qu'n aye' kyyajajilju' oje che tk'i'wla Qman Dyos,

ex ikyche tenb'ela'ju' kyyajajil che ul yajxi'tl.

24Na'mtoqpe' kytzaj yolin weye',

chin xe'l tzaq'wiye' kye

che b'elnb'i'ne',

na'mxtoq kyb'aj yolin.

25Che walju' xo'j junx kyuk'i'l qpoj tman rit,

kwal k'ulju' b'alun kse'n wakx,

atzu'n kan kwal tx'otx'.

Mix-a'lo'te jun kb'incha; taq'wix te juntl

twi' witz xjan weye', chi Dyos.