1-2Nman Dyos, o'kxtzu' in njyo'na'ye' kolb'il tuk'i'la;
¡chin tkloma kye kykyaqilju' inche jyon wi'je'!
¡Chin tkloma, qu'n naku'j b'alunqe';
jaku' chin b'ajkytzaqu'ne'
ex mix-a'lo' jun klol weye'!
3Nman Dyos,
¿ti'tzu'n matxi' nb'inchaye'?
¿Mujqa matxi' nb'icha jun nin ile'?
4¿Mujqa matxinq'o'ne' jun tu'me'l t-xel taq'wix te jun wuk'i'le' tu'nju' b'a'n xtb'incha weye'?
¿Mujqa matxi' b'aj nyajla'ne' wajq'oje mya toj tu'me'l?
5Qa matxi' nb'inchaye' ikju', b'a'ntzun njyonjtztze' tu'nju' wajq'oje;
tu'n tkub' wi'je' ex tu'n njowajlaye' tu'n twitz tx'otx',
ex tu'n tkub' t-xonju' woklene' twitz tx'otx'.
6¡Iq'i'nktz tib'a Nman Dyos tuk'i'l ttx'u'jila!
¡We'ka twitz kytx'u'jilju' wajq'oje!
qu'n ojena' tchaq'ta tu'n tb'inchetju' tnik'alilti'j,
¡q'onk tib'a te nxele'!
7B'uyinqe'tzju'ya tnam twitza
ex q'onku'ju'ya tkawb'ila kyib'aj.
8Nman Dyos, aya nokq'onkye tnam toj xjel:
b'inchama tkawb'ila weye' kse'nxju' nb'inchb'aje' b'a'n;
kanli twitza mixti'we' wil.
9Aya Dyos tz'aqli,
qu'n inxi'x el tnik'a teju' qxime'
exju' b'is toj qanmiye',
¡xitunku'ya kyb'inchb'aju' b'inchal myab'a'n,
atzunju' tnik'alti'j tzyuma tu'n lalun kub' tz'aq!
10Awe' kolb'il we aju' Dyos ati jawnixi',
aju' in klonte xjal mixti' sb'ub'l toj tanmi.
11Jun ajkawilte' Dyos tz'aqlixi'x
inel tik'o'nju' taq'wixil toj tkyaqil tab'q'iyil.
12Qa min sanjtz ti'j tk'u'ju' xjal,
kb'ajel tjqu'n te Dyos tk'uẍtx'e'nb'il;
naq tu'n txi' ttzaqpi'ntlju' t-smaj,
13naq tu'n kyxi' t-xontlju' tch'ut nche jayjon,
¡matxi' b'ent kytenju' tq'aq' tu'n tb'iyun!
14Kyka'yinxpe'ye' b'inchal myab'a'n:
ati tk'ixk'ojal yab'wnaq ti'j,
ch'onwi' tu'n taq'wixil
ex ktala' chajyolil
15Matxi' kub' tb'incha'n jun tjul nim t-xe,
tojxtzunju' tjul kb'elixa' tz'aq.
16¡Tib'ajx kb'ela' tz'aqju'
tb'inchb'en taq'wix ex ttx'u'jil!
17Kwajwali'ye' Qman Dyos qu'n tnik'alti'j;
knb'itza'ye' tb'i Qman Dyos
aju' ati toj kya'j, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.